غزل فكري

عارف لما بيجيبوا الحرامي وهو بيعدي من اشعة الليزر الكتير فشخ ويفضل يلوي جسمه فشخ ويروح يمين وشمال عشان الليزر مايلمسوش؟ ده نفس احساسي وانا ماشي في الجامعة وبتفادى اني اعدي في اي كادر من كادرات الزبين كاميرا اللي مفتوحين في كل مكان وفي كل وقت ومن كل الزوايا ، مستحيل! لدرجة اني بتخيل لو فيه داتابيز للصور دي هبقى طالع فيها من كل الزوايا عالأقل! فانا ممكن اتوقع النهاردة اني اتصورت مرة من وشي في المحاضرة ومرة من جنبي اليمين على شمال القبة ومرة من ضهري في نفس المكان بس قدام شوية .. وهكون لابس بني .. ايام تانية هكون لابس اخضر او اسود او احمر او بنفسجي .. Its interesting .. im exited now! مبسوط اني بقدر اعمل الشئ من اللاشئ .. النهاردة في التدريب على تصميم صفحة مبدأية على النت ولما كانت كل الناس بتجرب اي كلام .. انا كنت بعمل حاجة مفيدة احب اعملها وافيد بيها اللي حواليا واسليهم .. الأدب العربي.. كانت تجربة صغيرة بس مثيرة وانا عامة مبسوط؛)

يوميات ثائر متقاعد (3) : النوم

النوم النوم
حل الحيران
من هَم اليوم
اليوم خلصان
و نهار عدَّى
وآدي ليل تاني
إتقاس
على دقّة ألحاني
ونعيدها مشقّة
وزن وقافية
مجاش بالذوق
نكتبه بالعافية
الشعر كيان
من كون في خيال
شاعر إنسان
قد عاشَ ليال
وانا كنت جبان
وانا يومها وقفت
لحظي الحلو
وحظي الزفت
وحظ الناس
أهو مات وانا عِشت
مكنتش ماني
ولا زرادشت
فـ قلبي أماني
فـ عيني النور
الحظ نَساني
فَجَت في الأطهر
مات الحلم بإيد العسكر
" ماتكتّرش "
ولا أكتَّر!
شايف بُقّي بينضَح حكمة ؟
نَظَرك هان
أنا بتحايل علشان كلمة
وانا تَعبان
لَكن هرضَى والرضا نعمة
ورضا إنسان
وآدي الشِعر بيوت وشوارع
كَلِت الشاعر قبل الناس
وآدي الليل بينادي مواجع
تِقلِب ذكرى على إحساس
وآدي صباح
ونهار عدّى
وادي العُمر
عمره ما هدّى
وآدي الشِعر
لما امتَدَّ
جد ولِعب
ولِعب وجَدَّ
أبني بيت
بيت يتهدَّ
أظبط قافية
وزن يروح
سبحانك مِن يبنوا صروح
كانوا محترفين في الغُنا ولّا العُمران ؟
كانوا منهمكين في البُنا ولّا المواويل ؟
قلنا الأول إن النوم حل الحيران
ربِّ اوهبني
راحة قلب
وصبر جميل