مش فاكر

الكنبة الكنبة .. رَمَتهُ فَقام

سريره البمبا .. ناداهُ فنام

إن كُنتَ نديماً فاسقيني

أو كنت غريماً حاربني

أو مستعجل إمشي وسيبني

أو كنت القهوجي حاسبني

أنا مش فاكر .. شربت بكام

هنبات في زنازين العمر

أسرح

حبة

في الأوضاع

وألمح

بس

ماشوفش القاع

والقى المطرة وادعي واقول :

اللَهُمَّ العيش والفول

ونحقق بعدين الثورة

ونظلل حلمنا بالدوح

وبحِب امّا نعيد الدورة

على أحلام

أي طَموح

أرقام في قوانين العمر

أسرح

حبة

في المنقلة

وألمح

صورتي

في المسألة

والقى العَقل يجيب ويوّدي

واسكُت أصل محدش قدّي

وابدأ اداري عشاد الحسد

وارجع اعيد , مرة والتانية

وافضل اجاوب زي الأسد

وارجع أجيب .. صفر فـ ثانية !

نهايات في بدايات العمر

أسرح

حبة

في اللاب توب

وألمح

أول

كلمِة حُب

والقى الشات يتملي بقلوب

واسكُت في وجود المحبوب

وابدأ اجيب سيرتُه فـ أشعاري

وارجع اقول : للحُب نهاية

وبحِب العِشق العشتاري

لما بيكتب أي رواية

ورقات جوة لجان العمر

أسرح

حبة

في المقلمة

وألمح

أول

بيتا وجاما

والقى سؤال في الورقة مُهين

واسكُت في وجود المُعيدين

وابدأ الملم فوق أفكاري

والعب بيها ملك وكتابة

وبحِب الفِكر العبقاري

لما بيكتب أي إجابة !

نكهات في بتنجان العمر

أسرح

حبة

في المعلقة

وألمح

أول

طبق اتسَقَى

والقى الزيت يلعب في النار

وادلُق خل واحُط خيار

وابدأ اضيف ملح وكمّون

وارجع أقِيد عالوجبة التانية

وبحِب الأكل المضمون

لما بيقلب بطني فـ ثانية !