جواب (4)

رب اشرح لي
عايز افهم
العالم اصبح
مبهم
فاكرني؟
انا هيثم
ايه أخبار السموات؟

بكتب من بعد فراق
لميت كل الأوراق
وناديتك بالأسماء
واستأنفت الجوابات

العالم أصبح كافر
العدل في أرضك سافر
وفي ناس لسة بتعافر
قدام جنود وآلات

يارب العلم اتطور
وكلام الدين اتحور
وخلاص الكوكب كَوّر
واتلاشت المسافات

وابتدا عصر العولمة
والإنسان وصل السما
واللي زمان اتعمى
بقى بيعِد النجمات

وادي نور القرن انطفى
والسمك الميت طفى
والدم اِحمَرّ وصفا
تحت جموع الأموات

وادي العصر التنويري
وده كان مجمل تقريري
من أحمس للحريري
ومرورا بالقيادات

أما احنا فطَفّوا بريقنا
ومامتناش لما غرقنا
تحت عيونك،
في طريقنا
إبعت لنا العلامات...

جواب (3)

إليك يارب

طالب طَلب

مش استحالة ..

تالت رسالة :

إنَّ الذينْ

مش ممتازين

في الإنسجام

زيي تمام

خلّوني شاعر

بَلمس مشاعر

وانا الحزين

رغم الكلام

دايماً بَضِل

واصبُر واستنّى

نفسي استضِل

من شَجَر الجنة

نفسي استَزين

من مَنهجُه

إنَّ الذين

تابوا نجوا

جواب (2)

يا خالق الغيث والرعد

يا صادق ولا تخلف وعد

أنا واقف على طول عالباب

تاني جواب .. أمّا بعد

...

أنا لسّة محتار صدّقني

الدُنيا بتجري وتسبقني

تعميني وتِطوّل دقني

وانا مش ببدي أي ردود

أنا خايف يومي الموعود

أنا عارف إني محدود

مع ذلك فبحاول اهو !

عمر الناس دول مانتبهوا !

أنا هرمي جوابي دالاهو !

على بيت الشِعر المسكون

أفكاري مليانة سكون

لمّا تقولّي كُن سأكون

...

المُرسِل عبدَك شوماني

العنوان عندَك عنواني

الموضوع .. جوابي التاني !

جواب (1)

إنتا قَريب ؟

أنا مش شايفَك !

إنتا حَبيب ؟

أنا ليه خايفك ؟!

آبانا اللي في السماوات

اُنظُر .. في هذي الدعوات :

يعني يارب تسيب الشاعر يتحَسّر عالصفر فِخانتُه

إغفرلي عقلي وتَخانتُه

فـ التعبير عـ الصورة الكاملة

وإن عبّرت بقلبي هضيع

وهبيع مـ القافية كام بيت

وإن خَدْت قوافي وترابيع

ممكن فكرتي تهرب سيكا

أيوة هعوّض في المزيكا

لكنّي بتمنى رضاك

تشفي وتعلل مَرضاك

وتنَجّي الماشي بأرضاك

وتوفّق أفكاري ولَحني

وتكمِلّي جمال الصورة

وبإيدَك إنتا تنَجّحني

أنا ولا شاعر ولا أسطورة

أنا ثاير حاير مُتواضع

من صِدر الدُنيا أنا راضِع

برفَعلَك صوتي , أيا واضع

قوانين الفُلك وحساباتُه

ومقَدّر دورُه وثباتُه

ولّي الوَجه لمَن بيباتوا

فوق الكوكب من أمثالي

هَستَكمِل في جوابي التالي

أنا آسف .. طوّلت سؤالي