قتل الحب (2)

البحر بيضحك ليه؟
عليك
بلبل رجليك
شالك حطك
والكل بيرسى في أرض الناس
ولا حد بيهوب شطك
دوب سكر
اشرب شايك
افتح ورقك
امسك نايك
الدنيا حزينة
وهاجراك
امسك طبلك
وكإن مفيش
غضبان قبلك
ولكل سواد الكون غني
بإيقاع أحلى
بإيقاع أغرب
بص لأعلى
القاع قرب
وانا مش بتماهى
انا بهرب
ألمس اوتاري
اتكهرب
هتاخدلي بتاري
لو مرة
كملت اللحن؟

قتل الحب (1)

لا يَزال شِعري تابع
للمنابع والأصول
واختلاف الفُصول
والمواسم
لا يزال شِعري راسم
بين مدارس رسم غيري
بَتنِقل
نفسي أتلَحَّف عبايتي
وامشي في صحراء روايتي
وامّا أسمَع وَحي آيتي
أتقِتِل