معاني الحب (2)

بقالي كتير
بسرح واحتار
وانتشرِت سيرتِك
في الأفكار
دوّرت كتير
وانا جوة البير
وانا قلبي كبير
مليان بيكي
برسم وخيالي
خيال نملة
واكتِب ولا أجدع
ميكانيكي!
وانا بيري فِضي
عايز أملا
وانا قلبي رضي
شاف الأمَلَة
وكلامي صريح
محتاج خفة
وكلامي بيتقَل
عالشِفّة
من بعد ما كان
بيلف بلاد
طب كان ياما كان
كان فيه يا ولاد
شاعر عفريت
جاي من تكريت
بلسان قرشي
وبنيان حبشي
وجَلَد شامي
وعِزّة صعيدي
فين أيامي؟
جاية وراحة
راحِة إيدي
إيدي اتحَشَرِت
يمكن جايز
عفريتي مجاش
بس انا عايز

عايز أمل
أكتب عشانه
وحَدَث جَلل
اتنبّى بيه
ومَلِك قوي
أقعد مكانه
وحبيب حنيّن
أحب فيه

معاني الحب

بقالي يومين

بسرح واحتار

وانتَشَرِت سيرتِك

في الأشعار

وكتبت كتير

من جوة البير

وانا قلبي كبير

املاه وأصُب

كلام سحري

خيالات تجري

خِلصِت من شِعري

معاني الحُب

فقُلت أدوّر عالمعنى

واتصوّر صورة تجمّعنا

لو حتى فـ عالم مش موجود

أنا راضي دي حتى كرامة و جود

أو حتى في كلمات جوة الحِبر

ماهو ربّي وربّك ذكر الصبر

أو حتى فـ فكرة من عَقلي

أزرعلِك بذرة من حقلي

وارويلك من مطر الجنة

ونغنّي في الليل أشجانّا

وارسلملك صورة على قلبي

أنا ولا متردد ولا سلبي

باسيبني أحب , وأحب أسيب

حبيبي الحلو يروح لحبيب

وانا يكفيني أشِم ورود

لو حتى فـ عالم مش موجود

وأروح قدّام القلعة واقول :

القلعة اتبنت على شرف الملك

والخالق خلقك ما أجملك

والطوبة تعود لعصور الشاه

وطريقك صعب انا هتمشّاه

والحرب انتصرت فيها الروم

إعطِ إلى السائل والمحروم

وأروح من قلب الصحرا واقول :

الشمس هنا دافية على طول

دي رسالة من كاتب مسطول

قد تاه في براري الصحرا سنين

ولا عارف حتى يغنّي لمين

حتى أمّا ينادي لطير بيطير

وتملّي بيغرق جوة البير

ولا شئ مـ البير هنا أسخى لي

- التائه في الرُبع الخالي

وأدور حوالين الأرض وأقول :

عارفة ؟ الأقمار هنا كترت أوي

والكوكب كروي مش مستوي

والجانب المظلم شكله مثير

والجو خريفي وريحته أثير

والنجمة اللي هناك بتشاور

بتشاور للنجمة اللي هنا

وبلوتو بيبعِد ويناور

تيجي نُسكُن فيه , إنتي وانا ؟