وانا قاعد وحدي
ذهني مش صافي
النار اشتَعَلِت
فَطَلَبت مطافي
فلقيت عفريت
فَقَفَلت السكّة
وطلعلي حَزين
قاعد عالدِكّة
قلتله إحكيلي
حصل إيه المرّة دي
قالّي فيه عشرة
اتخانقوا قُصادي
شقّيت الأرض
وهربت انا !
وانا شُفت النشرة
بتقول القاضي
لسة في قضيّة
من ميت سنة !
وانا كُنت فـ شجرة
ولا حد قَطَفني
وانا كُنت فـ ضيقة
ولا حد نصفني
ولبِست نضيف
مش مستَنضَفني
وانا دمّي خفيف
مش مستلطفني
وانا كنت جنيه
ولا حد صَرَفني
وانا بسأل ليه
ضربوني وقالوا
حرزوا سؤالُه
فَسؤالُه جريمة
وده شكلُه نشيط
في جماعة لئيمة
وانا قلت عبيط
وانا قُلت هزار
وطلع فيه ناس
بيحبّوا حُمار
يُحكُم بسلاح
من صُلب ونار
والجَهل مُباح
في شاشات العار
ولقيت تُفّاح
عند البقّال
فأكلت ونِمت
والنوم قتّال
وفي نومي حلِمت
إني رحّال
ماشي على الرَملة
في صحاري طوال
وبقول الجُملة
مرتاح البال
ولا أملك عُملة
ولا أملُك مال
سأسير بِحَملة
وسأبلُغ بَلَدا
وسنُصبح دولة
ننتَظِرُ المددا
وسنخسر جولة
وسنكسب عددا
ونشيل أعلام
ونجُر جيوش
وبواقي كلام
نفعوا مانفعوش
إن قال عدّوه
هنقول ياسلام!
آدي الحُكّام!
وإن قال هاتوه
هنقول أفلام
كُنا بنكتبها !
أو دي الأحلام
بنفَسَّر غيبها !
وأديني كَتَبت
معقول وغَريب
وصَبَحت سَكير
وسهِرت خَطيب
وآدي وَحش حابسني
وآدي جِنّ عَجيب
طاير في الجو
كل اللي ناقصني
يطلعلي حَبيب
فالغُنا يحلَو !
