الزوابع (3)

كنت أكرة في باب في أوضة
كنت تلج وداب في صودا
كل يوم في أي موضة
وأي لامع

اتحضنت وكنت قاسي
امتحنت وكنت ناسي
بعد صبر هروح لكاسي
ومش متابع

أي حلو أكلته ناكره
كل سوء لسة فاكره
لو كأني بنام مذاكره
وبصحى اراجع

جينا ناكل قالوا صمنا
جينا نقعد قالوا قمنا
قلنا ننعس قلقوا نومنا
في المضاجع

هما مين.. حد يعرف؟
اسأل الكاتب.. محرف
اسأل الشاعر.. مخرف
في الزوابع

كان بيكتب ورقه طار
كان بيحلم قرصه فار
ثم وصف الانبهار
بالمواجع

لو تقوله قصيدة سكة
لو تقوله ناقصة حبكة
لو تقوله يا رب مكة
مش ممانع

صار إلى أبعد مصاير
زي سمكة وزي طاير
ساعي زاهد في البصاير
والمسامع

الزوابع (2)

كنت ماشي في المتاهة
رجلي فوق راسي تحت
حاجة لخبطت اللي راسم
واما تاه، اتمسحت
بس عدت في وش باسم
خد ف ايده شهر نحت
بعد ثانية من القذيفة
هو مات، واتشرخت
كنت ماشي في الورق جنب الإله
حاجة لخبطت الروائي حتى تاه
ثم قال إن شيئا ما أتاه
واني في السرد المشوش، انفلتْت
كنت غيمة كبيرة واقفة في الظلال
عند نص الحلم في الزمن اللي طال
رن جرس الباب وفتحت عين طلال
روحي سكنت بيتزا سخنة واتأكلت
والتقطني من بولاق ايريال اذاعي
كان قصير بقى أطول من دراعي
كل تغيير لا يبالي ولا يراعي
والعجل بيدور بدون أي داعي
وانا من راديو لساعة ثم ساعي
أنقل الأشعار من البصرة لحيفا
وابقى ناعي للي ماتوا بالقذيفة
والرسايل لو تقيلة أو خفيفة
لو مضحكة أو مخيفة
ورق في الجيب
والحبر اللي اتشال مع السنين لا يرسم
إلا خط الشيب
وكل خط وكل جملة حدف عملة
حدف عملات
واللي بيسأل فين
كلها محلات
تحل فيها
بقايا اصوات
تُسمع تُقال
ونام طلال

الزوابع (1)

انا فرحان وسعيد
لابس بلالين العيد
وبطير جواها بموز
واتعرفت على الهوز
والهوز دي قبيلة عجيبة
عايشين على راس زبيبة
وبياكلوا جذوع الطيطن
والطيطن شجرة طويلة
تنمو على جسم فتيلة
والعة مع اعواد ديناميت
لما انفجرت صحيت