الفوضى في كل حتة , في أعضاء هيئة التدريس اللي بيردوا عالميل بمزاجهم وفي اي وقت حتى لو بعد اسبوع , لا قصدي اللي بيعملوا كل حاجة بمزاجهم . في الناس اللي عايزة تنظم الناس وهي مش عارفة تنظم نفسها الأول . اللي بيفكروا يحلوا الاختلالات الخارجية من غير ما يفكروا في اختلالاتهم . في فشل محاولات جمع الناس على الحد الأدنى من الاحترام المتبادل والحوار والرقي . وفي فشل محاولات نقل قيم التعاون والإيثار . في فشل استراتيجيات التنظيم الذاتي اللي قايمة على الناس مش على هيكل النظام لوحده ولا على المُنظم اللي مع الوقت والفوضى مش هيلاقي حاجة ينظمها , والنظام هيتداعى بالناس زي ما كان هيترسخ بيهم . في بيئة تعليمية فاسدة أول ما أفسدها طالب محركه الأساسي هو الخوف من الدرجات ومن الدكتور , طالب العلم اللي بقى طالب الروتين والملل . انا مُحبط من وجودي مع طالب بياخد ومابيديش , بيشكي ومابيصلحش , بينجح ومابيتعلمش . انا وقعت في فجوات مكنتش فاكر انها بالوسع ده , ولو بالوسع ده فمكنتش فاكر انها هتثبت ومش هتضيق بالوقت , انا قطعت اشواط طويلة بس يبدو إني قطعتها في طرق خاطئة , انا هسحب نفسي من المجال العام بالتدريج , التجارب لازم تكتمل بتجلياتها الصحيحة والخاطئة لحد ما تاخد أشكالها النهائية اللي مش هتتغير , والتجارب هي تجارب جماعات مش افراد , أصيبوا , اخطئوا , واتعلموا ; أما أنا , فمحتاج وقت ألملم فيه شتاتي , واعيد ترتيب اولوياتي , واتأمل المشهد وادرسه , واتعلم لحد ما اقدر أولاً افسر حاجات كتير في الطريق واخُد درسها , وثانياً امهد طريقي الجديد وارسم معالمُه.
ومن ضمن الدروس ان فيه حاجات ينفع تتغير بالتدريج وفيه على الناحية الأخرى أنظمة فاسدة بتُصيبنا في حياتنا اليومية بس شكلها حلو فبناخُدش بالنا منها .
وماتحمّلوش الكلام أكثر مما يحتمل .
