العصبية لأي حاجة ساعات بتطلع أسوأ ما في الإنسان , الإحساس بالتميز اللي بيخلي إنسان يعتقد إنه أحسن من إنسان في صفة معينة , دين أو عقيدة أو وطن أو انتماء سياسي أو حتى كروي , بتبدأ من مساجلات تافهة وبتوصل للتقسيم والكراهية , لما حد يفتكر انه احسن من حد عشان هو مصري والتاني سوري بلده اتخربت مع انه مش ذنبه , والتاني فلسطيني بلده اتشردت مع انه مش ذنبه , والتاني والتالت والرابع.
العصبية الوطنية المقيتة اللي تخلي حد يعاير حد بأحداث تاريخية في بلده هو مكنش اتخلق حتى وهي بتحصل , ما بالك بقى ان حتى وأي حاجة بتحصل هو ما بيده أي حيلة , واللي بيعايروا السوريين عشان جايين يتفسحوا ويكسبوا عشان يعيشوا في مصر - زي البني ادمين - وقال يعني سايبين بلدهم في اللي هي فيه وجاينلنا واحنا فينا اللي مكفينا , او الفلسطينيين اللي جايين مصر وسايبين الأقصى أسير.
انتصروا للأخوة الإنسانية وماتخلوش انتماءكم لحاجة يتحول لتعصب يكون بداية لخطاب الكراهية وتقسيم الناس لمراتب بعضها فوق بعض.
يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَى * وَجَعَلْنَاكُمْ شُعُوبًا وَقَبَائِلَ لِتَعَارَفُوا * إِنَّ أَكْرَمَكُمْ عِندَ اللَّهِ أَتْقَاكُمْ * إِنَّ اللَّهَ عَلِيمٌ خَبِيرٌ
