وصال

بيكتب ويحفظ
كتابته لنفسه
رغم انه كان
دايما في نفسه
يوصل كلامه
للمقصودين
لكنه كوم
جوابات كتير
حطها فوق بعض
وصل للسما
إنما
ماوصلش لأصاحبها

قتل الحب (2)

البحر بيضحك ليه؟
عليك
بلبل رجليك
شالك حطك
والكل بيرسى في أرض الناس
ولا حد بيهوب شطك
دوب سكر
اشرب شايك
افتح ورقك
امسك نايك
الدنيا حزينة
وهاجراك
امسك طبلك
وكإن مفيش
غضبان قبلك
ولكل سواد الكون غني
بإيقاع أحلى
بإيقاع أغرب
بص لأعلى
القاع قرب
وانا مش بتماهى
انا بهرب
ألمس اوتاري
اتكهرب
هتاخدلي بتاري
لو مرة
كملت اللحن؟

ديوان الفتح (2) : البزوغ

انا .. كسلان
كسلان ملة
انا انسان
على فلة
عايش على كوكب
ذربيحخ
ووحيد اخواتي
من غير اخ
اسمي جواتي
شصط قبيلتي
وانا بتمطع
دست حبيبتي
وقاعد زهقان
في نهار ليلتي
ببعت احزان
لفضاء شاسع
شافها فنان
خياله واسع
وانا جائع
هاكل نفسي
وانا راجع
هجيب بيبسي
وانام ماشي
على ايدي
بص يا سيدي

أرض مصر

يا مصر مالك
ده مالك
جاوب سؤالك
وطالع
اكتب معايا
المطالع
يا تاريخ أصيل
مش ملاوع
عن شعب مصري
مُدافع
زلزل بصوته
الشوارع
نزل يدافع
يقرر
مين اللي يقدر
ينازع
في أرض مصر؟
ماحدش
حارب وحلق وكلبش

 جيل يناير
لسة ثاير
جيل حداشر
المحاصر
في السجون
لا يخون
جيل يغيّر
ينتفض
شعب وطني
 متحد
صنافير
وتيران
أرض مصر
للأبد

رعشة السمك (1) : هزيمة أمل دنقل

هل ترى؟
هي أشياء
تُشترى
والأعداء
تُحتَرَم
ومعاهدات تتبَرَم
تبقى بقاء
الهرم
الأوزون
اتخرم
وأبو الهول
اتكسر
لما شموخه
اتأسر
ودخل كوخه
وانعزل
بكرة يدوخوا
مـ الغزل
فنحاربهم
ودي خدعتنا
يدخل بيتنا
ياكل يشرب
يدخل ديب
يصبح أرنب
يبقى حبيب
ننزل نلعب
مش إرهابي
ساكن على أشلاء الشعب
كمل لعب
وسياسة
إحنا بشر
حساسة
انتو الحُكما
والساسة
واحنا الناس
المجانين
قالّك قدس
وفلسطين
عالم بؤس
راسهم طين
طين الأرض
المنتهكة
كوكب أزرق
وأنا السمكة
لو أطلع من بيتي
أموت
واتّآكل
أنزل
أغرق أحيا
تحيا
دماغنا
بلا مشاكل
فين المَغنى؟
والسُطَل؟
وآدي قصيدَك
يا أمل
بتصرف
من لجأ
للأحرُف
ثُم خيّم
وانتظر

المغني

استخدم تفاصيل الصورة
 في رواية باقي الأسطورة
القصة دي محتاجة لحبكة
من راوي ضليع
في فن الأزمة
دماغي ماتجيبش
دماغي دي جزمة
باينها اتش
باينها ام
وشعري خفيف؟
شعرك سم
تاخودش رغيف؟
قصيدة طازة
ودور مخلل
وقولي انا بكتب ايه
وعلل
بايني ماشي
ف طريق مضلل
او اني عايم
غريق مبلل
 هدومي قومي
يا بنت قلبي
انا ايجابي
لكني سلبي
دماغي غارسة
ف واقع مجاري
قالوا الممارسة
تعلم اكتر
وانا كنت خايب
وصرت اشطر
بعرف الاعب
وانا بخاطب
قوم بينا نسرح
فوق المصاطب
ونبني زي
جدودنا طوب
احفادنا يملوه
كلام قلوب
اولادنا ييجوا يزعقهولهم
احفادنا يضحكوا ويصبعولهم
 وكل ده وده
واحنا كبرنا
على المهاودة
احنا في بيرنا
التراب حايشنا
عن المشاركة
وان كنت حزنان
من البداية
فانا قمت فرحان
بعد النهاية
دندنت الحان
ورسمت عاركة
وكسبت فيها
يا ألف بركة
بحر القوافي
عملته بِركة
ومليت فيافي
بحنفية سالكة
بلت رمال الصحاري اللي جفت
بلت رمال الصحاري ورمالي
ودي أمالي
ودي بدايتي
 شابكة في نهايتي
وقصتي
انا المؤدي
وانا المتابع
وانا المغني
ودي رقصتي
ارووها عني