كسلت آكل شربت جسمي اتقمص شرقت مخي وقف عرقت تمام كدة كفاية فقمت من قعدتي سقف المغارة وطي دورت على شنطتي لقيتها جوايا فيكي ايه يا شنطة فيكي ناس في ورطة وناس عايشين اونطة أبطال بلا رواية جربت أمشي شبر وكل ما امشي متر ينزل من قلبي حبر فالبحر جه ورايا هو انا موسى الناجي؟ ولا الأسطى حراجي؟ وانا ليه كل اما اجي يحصل كدة معايا؟ مشيت كمان خطوة وطيت اجيب مطوة ولقتني مع عطوة وفي ايدي تمناية والقهوة بقت استاد وانا كنت راس عماد كل اما جوني يتعاد بيرفعوا الراية صفرت ليه يا حكم سبيت بكل الكلم وعبدت روح الصنم وقلبي جمراية فتحت نص رموشي على ميت قلم في وشوشي يا شعب دي جيوشي؟ ولا الجيوش جاية؟ لسة السقوف بتطبل لسة الحيطان بتْقَبِّل لسة الحديد بيكبل وبتنتهي الزوايا فيه عوالم مش بتدور ومزارع من غير نور وطيور بتجر قبور وحفرة لكل بداية لكل باب أكرة ولكل يوم بكرة ولكل لأ شكرا ولكل سير غاية يادوب فتحت الباب لقيت خمس أعتاب عن كل عتبة ثواب وكل باب آية وكل كنز فتحته لقيت الرحلة تحته تفتحلي طريق سرحته وصاحبتي العصايا تحفر الرمل يمتد ولو مددْت تنهض في الليل عصايتي أسد والصبح رملي مرايا أنا نور الكواكب وانا بحر المراكب وانا اللي هقوم احاسب ستاشر كوباية؟
