وادي الشعراء

أيها الشاعر خُذ قيثارتك
وألحانك
وسيب مكانك للي عنده كلام
خطوة لورا أو خطوتين قدّام
في طابور كبير
في بير
مليان حروف
كتير
وفيه حماس
وناس
جايين يغنوا
يقولوا
ويقيسوا ليلنا
وطوله
وفين دليلنا
روحوله
خلوه يجيلنا
ويملّي
إحنا اللي قاعدين
تملّي
مستنيين
التَجَلّي
واقفين نوطّي
ونعلّي
ماشيين
على حبال
المشاعر
في جبال
هيمالا يا شاعر
إحنا صوفية وأشاعر
متلحفين بالقلوب
وقلوبنا طفحت ذنوب
واللي يفكر يتوب
يتوب ويرجع ويسمع
خطوب ومغنى وقصايد
ونكتب اربع بيوت
ونصلّي أربع فرايض
إحنا اللي جاريين
بلادي
واقفين في وادي
ننادي
ننادي عاللي سمعنا
ونكتب إحنا
رجعنا
ونقول لريحنا
تهِب
ولِقلوبنا تصفَى
وتِحِب