أهد وابني

أهد وابني
وابني وأهِد
وأشد وارخي
وارخي وأشِد
فصل بلوتارخي
في تاريخ فينيقي
وتأملات
الصمت الموسيقي
وحبيب طلعلي
من عُقد صوفي
وحبيب نزللي
يشرب حروفي
وحروفي سَمّت
لما اتأذيت
وحروفي لمّت
بيت بعد بيت
وبيوتي وصلت
بين ألف جِد
فأهد وابني
وابني وأهِد

أهد قيمة
وابني حقيقة
ضايقت عيون
الجميلة الرقيقة
سامحي جنون
الأديب يا صديقة
ماهو نص عقله
طار في الخيال
وده نص قلبه
حار في الأمال
ودي روحه سارحة فـ
فروض الجمال
ودي قصة جارحة
لكن بتوزِن
سبحان اللي خلى الفرحة
تحزِن
ودي مطارحة
ولا مجادلة؟
من وسط صحرا
شاعرنا أدلَى
بالدلو كله
والبير كبير
وصاحبنا إن مات
هيموت أمير
وساعات سكوتي
بيغُر ناس
وبنيت بيوتي
على ميت أساس
وبيوتي وَصَلِت
بين ألف جِد
ودي حكاية حصلت
وانا مستعد
أنزَع في سور الصين لو يسِد
وأهد وابني
وابني وأهد

أهد مصنع
وأبني شجرة
تكفيني أقعد
تحتيها واقرا
واستنى يمكن
القى ملاك
أو مرة يلسع خدّي
هواك
يتعلّق الفكر مع طيف معدّي
ويخلّق
خيالي
شِعر مادّي
وانا شِعري جدّي
ولا هزار؟
وده أصله بيت
ولّا مزار؟
والعقل حار
في دي القضية
وحمامي طار
بالرسالة دية
من ابن فارس
لـ بنت سيّد
وده كان في مارس
وحكاية حصلت
وبنيت بيوتي
وبيوتي وصلت
رسمت رسالة
على أرض خالية
ونَقَلْت حالة
من قمة عالية
وحروفي غالية
لما تطاوعني
وانا عارف انك موجود
سامعني؟
ودي حرب دايرة
في أسود
وتيران
في مجرة ثايرة
بتشع أحزان
وانا ببني فوق الهوا
حقل أوزان
فـ إوعى حَقلي
لا تُخش عَقلي
وأبني فيك
أو فوقيك
وارصُف
وأمِد
وأهِد وابني
وابني وأهد !