يوم شروق الصندوق

هشتري صندوق وافتحه
والبحر هدوق أملحه
رغم اني ماحبش اعوم
لكني بحب اطفو
وأبص لأوسع مشهد
وانا متأمل أغفو
وانا غافي أشد لحافي
واقعد ابعتر أهدافي
وأشوط يمين وشمال
واكسر كل الأمال
المتعلقة في الغُرفة
واحرق بِدَلي الجُمال
المرصوصين عالدرفة
وأوزع صورة الكعبة
أصل انا مش هطلع عرفة
وهعيد توزيع المَرأَى:
أنا واقف وسط الفرقة
ماسك عصاية الساحر
وبقول للأشياء كوني
ومع هَزِة جفوني
صوت المزيكا بيبدأ
مع الطبل اللي دقدق
صوت المزيكا بيبدأ
مع الولد اللي زعّق
صوت المزيكا بيبدأ
مع الغاز اللي فرّق
صوت المزيكا بيبدأ
مع الموت اللي حلّق
وانسدلت الأستار
على الشهيد اللي ثار
وسقطت الأقنعة
عن جوقة الإمَّعة
وكان الجيشين واقفين
مُتَقابِلي الأوصاف
وقت شروق الحقيقة
كان الجيشين واقفين
وكان وقت انتصاف
ليل المدينة الرقيقة
صاحبة ميدان طلعت
و"والله ما طَلَعت"
صاحبة أغاني إمام
ووقفِة الشورى
وكل قصة حزينة
في قلوبنا منشورة
منشورة زي الزينة
أو زي لِبس اتهَجَر
بتهَوّي فينا الأمل
أو تحمي نار الحَجَر
بتقول وجودكم باقي
أو السلاح انتصر
بتدعي رب الساقي
أو تختبئ مـ المطر
القصة واحدة، لكن
العملة ذات أوجُه
وجه الكتابة الساكن
ووجه الملك في أوجه
بتقول مايجتمعوش
مَلِك يوَدّي جيوش
وكتابة تحمل أمم
بتقول مايجتمعوش
الحق مالُه وشوش
القصة محفوظة
لكن الوشوش تنعدم
يا أمة محظوظة
بالحس ارووا النغم
وادعوا لسبيل القلم
واحكوا حكايات العَلم
لما اترفع منّا
ده اللي سجن روحه
عمره ما يسجنّا

سف القوافي

جملة جملة.. ضيقة
القصيدة سيئة
جملتين أو تلاتة
البيتين صاروا بتاتا
يا لساني اللي هجرني
القصايد مش شحاتة
شاعر ايه في الزمن ده
لو رميته قام وهاتى
قام يدور عاللي نوّر
ويُميت اللي أماته
في الخيال اللانهائي
أو في شفرة جوة جاتا
القصيدة ماشية عارجة
اشتريلها جزمة باتا
شفت عينك في قافيتي
جاي راصدها من هناكا
اصلي جاي وفي نيتي
اعتصر مطر السحابا
قولي رأيك في قصتي
شاعر الوزن اللي فك
والقوافي ذوات حك
والأغاني معلقة
جملة جملة.. ضيقة
القصيدة سيئة

لوحة موت وإحياء

اذا كان لابد من حكمة لشاعر بادي
اوعى تنادي عكس طريقك
اوعي تطفي لمع بريقك
خد اوراقك وابلع ريقك
وانطلق
العالم
يحترق
والأغنية
تفتتح
الرصاصات
تخترق
والإيقاعات
تصتدح
الألغام
تنفجر
والأنغام
تُسكِر
الصواريخ
تنهمر
والورود
 تُمطِر
لو هتحزن مين هيدعو للفرح
لو هتعجز مين هيقدر
لو هتقعد مين هيمشي
لو هتمشي مين هيحضر
مين هيحضر
شايك اسود
ولا اخضر
جاي تبيّت
ولا تسهر
اصلي ميت
لأ ده مظهر
طيب اظهر
للورق
اصلي ميت
م الغرق
جوة بيري
اللي اتسرق
كنت واقف عادي لكن
شفت حلم من الأماكن
خضت أحيائي في نطة
أصل إحيائي دي غلطة
ضمن قايمة اللوازم
بس فينه عم حازم
يشتبك معي وضدي
سوف أسكت ما سكتتي
واكتفي بوجودي وحده
وانشطر ليا وليه
وانا ماشي اخد نصيبي
م الشجون اللي ماليه
يمكن اقابل حبيبي