يوم شروق الصندوق

هشتري صندوق وافتحه
والبحر هدوق أملحه
رغم اني ماحبش اعوم
لكني بحب اطفو
وأبص لأوسع مشهد
وانا متأمل أغفو
وانا غافي أشد لحافي
واقعد ابعتر أهدافي
وأشوط يمين وشمال
واكسر كل الأمال
المتعلقة في الغُرفة
واحرق بِدَلي الجُمال
المرصوصين عالدرفة
وأوزع صورة الكعبة
أصل انا مش هطلع عرفة
وهعيد توزيع المَرأَى:
أنا واقف وسط الفرقة
ماسك عصاية الساحر
وبقول للأشياء كوني
ومع هَزِة جفوني
صوت المزيكا بيبدأ
مع الطبل اللي دقدق
صوت المزيكا بيبدأ
مع الولد اللي زعّق
صوت المزيكا بيبدأ
مع الغاز اللي فرّق
صوت المزيكا بيبدأ
مع الموت اللي حلّق
وانسدلت الأستار
على الشهيد اللي ثار
وسقطت الأقنعة
عن جوقة الإمَّعة
وكان الجيشين واقفين
مُتَقابِلي الأوصاف
وقت شروق الحقيقة
كان الجيشين واقفين
وكان وقت انتصاف
ليل المدينة الرقيقة
صاحبة ميدان طلعت
و"والله ما طَلَعت"
صاحبة أغاني إمام
ووقفِة الشورى
وكل قصة حزينة
في قلوبنا منشورة
منشورة زي الزينة
أو زي لِبس اتهَجَر
بتهَوّي فينا الأمل
أو تحمي نار الحَجَر
بتقول وجودكم باقي
أو السلاح انتصر
بتدعي رب الساقي
أو تختبئ مـ المطر
القصة واحدة، لكن
العملة ذات أوجُه
وجه الكتابة الساكن
ووجه الملك في أوجه
بتقول مايجتمعوش
مَلِك يوَدّي جيوش
وكتابة تحمل أمم
بتقول مايجتمعوش
الحق مالُه وشوش
القصة محفوظة
لكن الوشوش تنعدم
يا أمة محظوظة
بالحس ارووا النغم
وادعوا لسبيل القلم
واحكوا حكايات العَلم
لما اترفع منّا
ده اللي سجن روحه
عمره ما يسجنّا