حدود الطب: القراءة الأولى

قاعد على باب

قصادي لوح

مش بقرا كتاب

بقرا روح

في كل قراية

بحاول اكشف

في حدود الطب

المسموح

انا لما هحب

الناس تزيد

الميا تقب

النيل يفيض

ويقوم الحسين

يقتل يزيد

صاحبك راح فين

صاحبك بعيد

ده بيتبع كل

شيطان مريد

وانا بزرع فل

وعندي عيد

بإيد بحيي

وبكتب بإيد

طب شفت زيي؟

أكيد ماشفتش

غرقت في النوم

صحيت ماموتش

ودبت في اليوم

ودوشته

واهو عدى الزمن

دي مشيته

فين أماني النفس؟

حاشته؟

فين أغاني الأمس؟

عاشته؟

ده تراب الكنس

ومقشته

ودي غيوم القهوة

وصدى ليلها

عدى طيف الأم

وعيلها

وطاف عليها الست

ومنديلها

جيله عدى وفات

بعد جيلها

هحكيلها الحكايات

لما اجيلها

واشتكيلها

إن العمر غفوة

وإنه قبل ما تبرد القهوة

وإني من فوق لسّاني بهوى

وإن اسمها من لساني سهواً

سقط مع كل اللي سقطوا

الله يرحم كل اللي نطوا

جريوا من شياطين

تطفش بلد

مخلوقين من طين

ومن كمد

يومها شافوا

في السما باب

يومها عرفوا

في الرحمة دين

يومها سكتت كل الإجابات

لما سألوا كتير نروح لمين؟

يومها راحوا

بس مش لحد

سكة اللي يروح

من أبو جد

وانا بكتب جالي

أبو فهد

قالي ايه يا غالي

يا أبو عهد

خدته رحنا ركبنا

أبو جمل

رحنا عند حبيبنا

أبو أمل

قلنا يابا نسيتنا؟

قال لاء

دي كنيسيتنا

مليانة آباء

وأنا عاوز اشوف

ابو خروف

سمع الضيوف

قال ماء

دي قصيدة رثة

ورثاء

فيها شبه قصة

واسكتش

انا هسكت

عشان انت هتنزل

بس مخي مكمل

ماسكتش 

سفر الرؤية (3): المسرة

ملقتش حاجة برة

دخلت جوة وفتشت

شفت في أحلامي مسرة

اكتر من اللي شفته لو عشت

شعري وقف في كابوس

كسرت عليه ألفين مشط

حجيت جبل المجوس

وطفيت شموع دير زرادشت

ملقتش حاجات كتير

فبديت أدور عالقليل

الصبح بقى شرير

فبقيت بستنى الليل يليل

أكتب شعر السرير

واستنى فلم حلمي يحمل

وادخل بسيف أمير

وشيطان الأحلام يكمل

لكل قصة بداية

وكل حلم حارسه شيطانه

تايهين في بحور سمايا

وكل بحر ليه قبطانه

من كل بحر بوزن

بيت الشعر اللي عطشانه

من كل كلمة أرحب شجرة أطيب

تملا غيطانه

بساتين الحلم واسعة

عن أضعاف بساتين الكوكب

وأنا عندي الحاسة التاسعة

في وقتي الفاضي بقعد ألعب

ألعاب مفيهاش خسارة 

كل حركة جديدة مكسب

أنا جناح الطيارة

وأنا الطيار وأنا اللي هركب

سفر الرؤية (2): الضوء

بنتمي للفن

هل الفن بينتميلي؟

كونك شمس

هل ده منعك أن تميلي؟

بكتب شعر

مش لزمني ومش لجيلي

بكتشف العكس

من أوضة جوة فيلي

بلعب كورة

وفي البداية شوطت رجلي

بكتب صورة

فيها شموع بتحترقلي

في كلامي أنوار

بس الليل بعيش في ظلي

حواليا أسوار

وروحي سافرت افتحيلي

بكتب هادي

مش محتاج لقطر فوري

مملكتي بعيد

فمش محتاج لفعل ثوري

هكتب وأعيد

العالم بشكل دوري

وصفات الناس

لحد ما مرة ترتاحيلي

كانت ضيقة

فلقيت الوسع جوة

الناس سيئة

بس لقيت الوحدة قوة

الحرب مقلقة

فحفرت بيني وبينها كوة

مالقيتش سبيل

فوليت وجهي وبنيت سبيلي

مشيت كتير

لحد لما بلغت أسباب

ساعات أطير

وساعات يلقفني سرداب

طالع ونازل

في دنيا ألعاب

يا دنيا جايلك .. وانتي .. تعاليلي!

سفر الرؤية (1): المكان

الشاعر عينه بتلمع

وانا عيني مطفية وغامضة

والمعنى في بطن الشاعر

وانا كل حياتي في الشنطة

والشعر فن الدهشة

وانا صاحب فن الخضة

والنور مكانه في قلبك

وانا نوري في قلب اللمضة

النور مكانه في قلبك

هل أنا ليا مكان جنبك؟

فيه فنان خض جن

فيه إنسان عض كلبك

فيه ناس يمشولها بلاد

وانا من لبنان لبعلبك

حتى محدش ركبلي

ولا خطالي مسلك

وحيد في مدينتي

مع الجن اللي خضيته

أبو الأشعار بنتي

وده الكلب اللي عضيته

حاسب انا هنا دافن

كل شاعر في بيته

كل اما جالي ندا

جريت بعيد ولبّيته

في ايدي سبحة وكاس

الاحتياط واجب

اللي يآمن للناس

غرقان في طوق سايب

إكتب على الكراس

عقلك هو الصاحب

وقلبك الوناس

ودراعك الحاجب 

سفر أخبار الأحلام (2): الاحتمالات

وزعت جزء من روحي

على كل إنسان

لحد ما روحي خلصت

فرجعت أجمع اجزاء

من أرواح الناس

بس لما رجعت البيت

بصيت

جمعت رجل

واربع ايادي

وودن

وخمس عينين

منهم اتنين عور

فرتبت اجزاء الروح الجديد بالدور

ونمت

حلمت بأخطبوط على جسم قط

واقف برجله الوحيدة على جرف شط

والبحر جف وقاع المحيط سارح

والسمك ساب الشبك في السما سابح

والأخطبوط بيهدد عاوز ينط

نطيت.. صحيت

وجريت على ورقي

فتحت ومحيت

معرفش في الحلم

انا اللي عايش

ولا أنا اللي غرقان في المحيط 

سفر أخبار الأحلام (1): الصدفة

عاوز ابقى مواطن سيريالي عايش في اللوحة

أو اكون نظرية كلاسيكية تايهة في أطروحة

أو كلمة نسيتها واستدعيتها فبيتي ووزنت اشعاري

أو آلة استبدل بيها دماغي تنظم أفكاري

الدنيا خيوط مرسلة يوم عن يوم تجري

والعقدة يوم عن يوم تضيق وتتشبك

وانا واقف على طرف الخيط بنظم شعري

وبحيك جلباب دايما يطلع واسع ومحبك

فبعري كلامي كحل مؤقت للأزمة

إن صادفك في الشارع أي كلام لابس جزمة

افتكر إن أنا قلت كناية

وسبتها على طرف ملاية

ودخلت الحلم لقيت آية

فمعرفتش أكمل تركيزي لآخره

كان عندي رصيد حكايات، هدخره

والآية بقت آيات، يا مخداتي اتاخروا

انا ملك العالم في الاوضة الضلمة

هانت لي الدنيا بالفكرة وبالكلمة

وعيوني لو فاتحة منتبهة ولو قافلة بتلمع

وانا ساكت بس لأفكاري همسة ركز واسمع 

سفر التسمية (2): الطوبة

بقيت بكتب شعر واسقعه

فحرارة مشاعري تبرد

بقيت بكتب شعر وأركنه

فكثافة أفكاري تنفض

بقيت بكتب شعر وبدفنه

لحد ما اجيد الفن وأتقنه

أو يظهر شيخ علم يلقنه

أو أحد الخطباء يلقيه

أنا في الصحراء هلقيه

في أول بير ألقيه

الشعر رواني فهرميه

حتى يجد الباحث يرويه

فأنا هكتب شعري وهكويه

لو كتبت الشعر وطبقته

هبقى بيت المتنبي وسقطه

على راس الشاعر الشجيع

خلى تمن الكلم البديع

حياة مقرونة بالاستعارة

وبناء بالمونة والمحارة

أسسه على رمل بيتحرك

ساب الواقع لخيال ابرك

فيه من كلمة راس وقلب

الطوبة هناك بتحب كلب

والكلب هناك شغال وزير

والوادي مليان ألف بير

من كل بير ستين حكاية

في بداية كل قصة آية

بسم الله وبسم كل راس

خلقت من كل كلمة شكل

وبين كل شكل وشكل فكرة

تتقال اليوم، وتكون بكرة

سفر التسمية (1): الوردة

هبقى جيمر والعب

خريطة الكوكب مابي

هجيب يميني حكيمي

وعلى الشمال امبابي

من الشمال الفايكنج

بيخبطوا في ابوابي

وانا في الحرب شاعر

ماسك سيفي وكتابي

كل صفحة بقتيل

من اللي كرهوا الحب

كل مقتول يوسف

نجي في غيابة الجب

وكل الكلام من بير

كل اما يفضى اصب

كتابي يكبر في ايدي

ويتقل وسيفي يبرد

وشعري يختل ويميل

ودرعي يمرض

وشعري يبيض ويزيل

وروحي تصعد

من أسفل البير

لأعلاه

من أضعف التعبير

لأكمله

وأعيد سؤالي

من أوله

عن المدينة اللي

تسعى فكري

فيها المعاني

أنهار بتجري

وعلى الأغاني

يتهادى شعري

وكل الأماني

مكتوبة أخبار

مفيش ثواني

وساعات وأعمار

مليانة ناس

من كل جنس

من كل جن

ومن كل انس

من كل فيلم

ومن كل لعبة

فيها من العلم

ألف شعبة

والقلعة لابسة

والقصر كعبة

والثورة دايرة

والطايفة ثايرة

والعلم قال

مفيش إجابة

قبل السؤال

فتعالوا نسأل

قبل ما نتسأل

والوزن يتقل

والحمل يتنقل

والوردة تدبل

واللعبة تتقفل

سفر العد (3): الناس والحجارة

العالم أكذوبة

أشلاء في جو منفجر

شظايا في سما معتمة

حجارة من أرض متقسمة

إعراب ضمير مستتر

تقديره لا أحد

أعراب بلا ألسنة

فرسان بلا أحصنة

حكام بلا مستند

جيوش تحارب ظلالها

ليالي مايجيش أطولها

غير لما أطول برج يقع

فيه ناس بتشوف الصراخ نشوة

والدم بقع

فيه ناس بتشوف التراب عشوة

والجنازات جمع

وناس شايفة القلوب حشوة

والمبادئ قطع

وقاعدة تزكي ناس تدخل حروب

بالبق

بعينه يكسر سدود وبالصباع

بيزق

وبحاجبه يفتح حدود وبالخدود

بيشق

ويجيب بتمن الأراضي جوقة الأوبيريت

يمجدوا الحامي فاتح بيبان البيت

ويطلعوا يغنوا للعيشة في بلاد تانية

يا خلق عالمكم مقسوم بعدد الخلق

ماتقولش عالم واحد قول كذا مليار

وكل عالم فيهم مبني على خيبته

يدور في سككه وتجذبه هيبته

يقيمه صلبه وتهدمه شيبته

ولحد ما نلقى القدر هنسيب صور

لمحمد الدرة اللي ساب ملايين درر

طايفين في كل مدينة يحفروا الأثر

إلى كل مستعمر طيرا ترميه بحجر

ولكل بطل من غير دراما انتصر

سفر العد (2): أوعية، ماء وإحياء (أجزاء الواحد)

حزين

هكتب رواية تكفي الحزن

سعيد

هكتب قصيدة تكفي السعد

أما بعد

هكتب رسالة

هقطعها

الحكمة صعبة

هصنعها

سفر العد (1): اللغة والقدرة (بين صفر وواحد)

 

انا عايش في سحابتي

لغتي كتابتي

وخيالي مرتبتي

وانا ناسي النوم

قاعد محتار

بين كرسي مكتبي

وسلالم مكتبتي

اللي بطلعها ادوار

وبعدي من بين صفحاتها

فوق الأسوار

باصص على عالم تاني

فيه لسة الناس اللي بتتكلم عربي

بتعرف تختار

الشفاء في دعاء الكروان

الخل على دين خليله

والاهبل على دين بهاليله

كانت ماشربتش من نيلها

وهتكون ماشربتش من نيله

ما تبطل تمشي بحنية

ابراهة راكب على فيله

إدالنا خازوق قد الدنيا

طب ليه مش قادر يديله

اللي سرق الميا من تربتي

واللي دفن جدي برا أرضه

واللي نهش دمه هتك عرضه

واللي فقر الشعب من قرضه

وعاوزيننا نختاره برضو؟

يعني ايه اختيار؟ اه المسلسل

ممثل في دور ممثل

واحنا هنا بناكل نكسل

وفي التافهة نصدر نحفل

طول الليل ننجم نكنسل

وفي ايدنا لي المعسل

وعلى الله طريقنا السوادي

لا تسل عالهوا يا فؤادي

أنا مش فاضيلك الساعادي

وعندي مؤتمر السنادي

وبعديه انتخاباتي وتجديدي

برنامج ايه ده شعبي وحبيبي

كلمة تنفع على قد ايدي

والناس تتصور في اللجان

ونعمل كام حفلة في الميدان

ونجيب بلاك تيما ومروان

ونغني دعاء الكروان

الملك لك لك لك لك لي

الكرسي دايما يسلك لي

ومرايتي دايما تضحك لي

فرحان بثروتي وبأكلي

شكلي هجدد تاني شكلي

ولا أعلن السلطنة وارتاح

ونوفر وقت

الحلم قالي يا عبدالفتاح

ده يوم السبت

وفي ايده كان ساعة ومفتاح

وعلى راسه نحت

ركزت وانا في الحلم لقيت

ان ده تمثال

وفهمت اني كنت وبقيت

طبيب رحال

بحط ايدي عالسوسة

وبشفي الممسوس

والممسوسة

وصحيت على قرصة

ناموسة

قالتلي الملكة قابوسة

على الجوال

فعدلت عمتي على راسي

وقلت: عمتي وتاج راسي

أنا لسة أمتي محتاجة

ومفيش غير ميا في التلاجة

فلو دعتك أي حاجة

مسافة السكة

احنا في عرض

أي فكة

خديلك أرض

كشبكة

واسألي برضو

أهل مكة

هم زباين

قسمنا الدولة كباين

والشاري ييجي ويعاين

قبل ما يدفع

تسمحي هستأذن مش كتير

عندي زيارة يادوب اطير

جالي استدعاء من يائير

وارجع، ينفع؟

أسفار حتى (2): معجم العالم السابع

هملا العالم نقط فوق بعض:
هملا البحر، هملا الأرض
لغتي: حرية مش فرض
بلدي: مشاركة مش طرد
هتكلم بالطول والعرض
واملا كتب
ويقولوا ده بنى عالم سابع
شوما حتب
عالم مش تابع، مش متسارع
عالم مش مهدوم، مش واقع
عالم نافع:
فيه كلمة بتفيد كلمات
وتفيد عيشة
مفيهوش ناس ماسكة الفيشة
بتقطع وتمن
عالم: غير عالم الإنسان والجن
المسكون بشيطان اليورو والين
عالم مفيهوش حلم بعيد
عالم كله جديد في جديد
مفيهوش تقليد ولا منافسة
عالم من غير نكبة ونكسة
وقصص باكسة
بتلغي الإبداع
كونه بدعة
وتقول أعجاز
ستة تسعة
عالم كل شجراته فرعة
من غير مناشير
عالم، كل محيطاته ترعة
من غير تأشير
كل ألوانه جوة الاسكتش
وتحت التوقيع:
عالم H