تحذير..

لو الكلام مش مفهوم فانا معترف، مش كل من حاول يعبّر اتفهم. بس الأهم من فهم الناس .. الإحساس.

الصبر

شكلك هتفضل تستنى
يا مؤمن صبرك عالجنة
يا عاشق صبرك عاللُقا
اتعلموا الصبر بقا
حتى تنالوا المُراد
ولو منلتش هو الخير
من حِكمة رب العِباد
رازق النملة والطير !

تبيعوه

تبيعوه وعمره ما باعكم ؟

- الطبع دايماً بيغلب

تخونوه وعمره ما خانكم ؟

- الدُنيا دايماً بتقلب

تسيبوه في وسط الموجة

- اهو يتعلم العوم

تلوموه لو مرة سابكم !

- لسانه شبع اللوم !

بعترف

بعترف ان انا بتوّه

وفـ وسط الزيطة بزيط

وكمان انا عارف إني

مكشوف وجبان وعبيط

كل المواضيع كان فيها

كلمة غريبة في الثنا

إنتي اللي انا لما الاقيها

بتنطط فرحة وهنا

كل الأفكار عن إنك

مُحتلة أرض فـ راسي

كل الأشعار كت عنك

ملت الأوصاف كُرَّاسي

كل الحكايات مكتوبة

والنجمة العالية هطولها

و"بحبك" فيها صعوبة

لكنّي فـ مرة .. هقولها !

كتبت؟

هكتب .. وانا بسمع ابتهال ديني

من شيخ معروف مش فاكر اسمه

برسم بقالي كتير وطالع ديني

وضلوعي رغم الألم .. بيبتسموا

..

كتبت ؟ كتبت رباعية

بوصّف فيها المزاج

غبت حبة عن الصورة

ونسيت نفسي المكسورة

ونسيت كمان حاجات كتير

أهمها

إني أطير

ويخف وزني لما أنفّض عن كتافي همّها

دايماً بصاحب السرير

هو الوحيد

بلاقي في كلامه العلاج

إيه الجديد ؟

بكتب وبسرح مع البحر

بكتب وبكلم نفسي في الكتابة

"لا داعي للكآبة"

مفيش حد اكشر في وشه

مفيش حد يسألني مالك

مليش ولو ليّا مكنتش سكّت

كنت هسيب الكتابة

واقضي أيامي كلها

أعجن وألِت !

تجليات في الأبعاد (1) : من على سطح الكوكب المجهول

الزمان : قبل تحديد التاريخ وفهمه

المكان : كوكب مش فاكر اسمه

الصورة : كوكب بنفسجي

فيه سائل طاير في الجو

من فوق يجي عشرين قمر

والمخلوقات بيبتسموا

والقصة بدأت تحلو ..

فكر كتير

فكر كتير

اكتب بسرعة

كلامك هيدخل

مسابقة وقُرعة

كلامك يحج

ويطوف المدينة

ويمكن يأثر

في بنت اللذينة

في ثورة ومناورة

وقصة وعشق

بيوتك هتفتح

مشارف دمشق

وتديله جرعة

ياخدها ويطير

فيكتب بسرعة

ويفكر كتير !