ما الحب

تسألني ما الحب ، فأقول : لا تشرطه حالة ولا يحده مظهر ولا تحكمه نزوة ولا تخطئه عين ، هو النور الذي ترقى سمائه الروح في صورتها الأولى وعين طريقها القلب لا النظر ، فنحن نحب الله دون أن نراه.

يوم الدفاع الجوي

في اليوم ده انا حسيت يعني ايه خيانة

كنت قاعد على تويتر ومتابع ان جماهير الزمالك رايحة الماتش بأعداد ضخمة , كانت الجماهير لسة راجعة من قريب وكنا فرحانين بكرنافالات المدرجات اللي رجعت تاني , روح الشباب اللي تكسب الأهلي لو خسران لآخر دقيقة , القوة اللي بنحس بيها واحنا واقفين في كتلة واحدة بتتحرك حركة واحدة وبتغني بصوت واحد , الأغاني اللي كانت أكبر من تشجيع نادي , الأغاني اللي كانت صرختنا من أكتر نقطة منورة في الكون , صوتنا اللي بيغني بحرية في جنّته الخاصة بعيدا عن عفن الواقع , الشباب اللي لو اتجمعوا هيقضوا على كل الأفكار السودا اللي بتحكم الشعوب , الشباب اللي بيخافوا من تنظيمهم وصوتهم وأفكارهم وحياتهم نفسهم , الخطر اللي بيحسوا بيه لما الجماهير تغني للحرية وللوطن اللي هما مش عايزينه ولا عايزينها , الوطن الطاهر اللي زرعه بيتروي بدم شُهدا ماتوا للفكرة , الوطن الاخضر اللي طلعوا منه وبيحاربوا الدنيا عشانه.

يومها كنت مرهق من الكلية ومن القعدة واخر حاجات شفتها قبل ما انام ان فيه مناوشات بسيطة بين الجماهير والأمن , قلت عادي بتحصل مرات كتير حاجات جانبية كدة والماتش هو الأهم والجماهير عارفة ان ناديهم هو الأهم , ونمت.

وانا في النعاس كانت مريم بتكلمني افتكرتها عاوزة حاجة بخصوص الحركة فكملت نوم وقلت هشوفها لما اصحى , قلقت بعدها بساعات وبصيت في الموبايل لقيت 19 ميسد كول ! استغربت وقلت في سري ايه يا مريم ايه المهم اوي يعني اللي عاوزاني اعمله دلوقتي , كلمتها وقلتلها ايوة يا مريم فيه ايه ؟ قالتلي انت كويس؟ قلتلها ايوة فيه ايه؟ وكنت لسة صاحي وفي مود النوم لقيتها بتقولي الحمدلله اطمنا عليك اصل الأمن ضرب الألتراس وفيه ناس ماتت

مش هكون ببالغ لو قلت ان دي أسود لحظة عدت عليا في حياتي , اللحظة اللي بتحس فيها انك عريان وشرفك منتهك ومانتاش عارف تحميه , انك لو نمت شوية وصحيت اصحابك هيموتوا بالظلم في الشارع

حسيت قد ايه الدولة بتقهرنا ومش بس مش عايزانا نفرح , الدولة عايزانا نموت ونموت وننتهي بالرصاص او بالحزن , فضلت منهار الليلة كلها وانا فجأة بفتح عيني من نوم على الصفحات بتعد الشهدا اللي وقعوا , اللي كانوا صاحيين قبل ما انام وبيغنوا للزمالك

حسيت للحظة اني في فانتازيا زي اللي بكتبها ساعات في بروفايلي , لما بقول ان الاحداث هتتطور بسرعة وهتحصل مجازر في السنين اللي جاية , بس فجأة الواقع غلب الفانتازيا كلها وطلع المعدل الطبيعي والواقعي اللي بنتوقعه لتطور الأحداث مش شرط هو اللي يحصل ومش شرط اننا نكون جاهزينله , الواقع بيعلي علينا كل مرة بمصايب أجدد وطرق قتل وقهر أحدث وأكثر تنوعاً ,

النظام الحاكم نظام مجرم يستحق عقوبات السما والأرض , اللي يرمي غاز على ناس في قفص قاتل , واللي يرمي غاز على ناس في عربية قاتل , واللي يحرض على جماهير ناديه قاتل , واللي يضرب عشان يُقر النظام والدخول بالتذاكر قاتل , واللي يحمي إيد شُرطة بتتوحش وبتنتهك كل الحرمات قاتل , كل مسئول عن دم مصري برئ قاتل وكل قاتل هيتحاكم ولو بعد حين

{ إِلَّا الَّذِينَ آمَنُوا وَعَمِلُوا الصَّالِحَاتِ وَذَكَرُوا اللَّهَ كَثِيرًا وَانتَصَرُوا مِن بَعْدِ مَا ظُلِمُوا * وَسَيَعْلَمُ الَّذِينَ ظَلَمُوا أَيَّ مُنقَلَبٍ يَنقَلِبُونَ }

المجد لشهداء الحرية

المجد لشهداء الوطن

مصاير مصر

يقول المنتمين للدين :
شريعة الصالحين
تمشي على رقاب العباد
وأما المحتمين بالرصاص
بيقولوا إنه
لا مناص للحر
من سجنه
وأما المنتمين للمصلحة
بيقولوا
ادي العيش لخبازه
وسيبهوله
كل ابن ادم
ابن كلب
ولا عزيز
إلا
حامي المصالح
لا تصالح
غير
لو كان التمن يستاهل
بيع الوطن للجاهل
في المزاد
خِربت؟
بيع يا عواد

ليلة أغاني

محدش لاقي ساقي بيسقي راحة؟
ويملا منها إيدي قَد راحة
حبيب راح للطبيب يعمل جراحة
يبطل بيها حُب وشَحتفة

اتشفى؟

طال الكلام
قام الطبيب
قال عندي بعدَك
مليون حبيب
كتب الروشتة
وقاله نظرك
ستة في ستة
وخلي بالك
في كل حتة
هتلاقي دايما
فيه منها حتة
وذكرى باقية
بتحكي عنها
وإن المكان ده
كان يوم مكانها
ويومها اسمك
جه من لسانها
مولود جديد
وكان يومها عيد
بس القريب
هيكون بعيد
وده حال زماننا
يا طير تَغَنّى
يا شاعر احكي
يا قيثارة ابكي
وقسّم يا عود
على لحن تاني
ودي في النتيجة
ليلة أغاني
وكلام مِرتَِب
نفسه عشاني
وقالي أكتِب
وكتبت انا
كان يوم قريّب
يجي من سنة
وانا كنت طيب
ايه غيّر الحال؟ ما غيّر النعت
وكتبت ميت موال
طيب.. نَفَعت؟
ولّا قَعَدت اشبُك
في سلاسلي؟
ولّا مشيت احبُك
في عُقادي؟
ياللي قسمت اللُغة
تُحضُن المَعنى
وياللي
جمّعنا
وفرق مَسيرنا .. اتأمل المعنى
وإعرف مصيرنا .. مسيرنا .. لوقت .. مش هيكون لغيرنا
وطيرنا مش هيشم .. إلا عبيرنا
ويطرح الورد .. لما نشوف ربيعنا
يا ولد
ناضل ,
انتَ اللي
فاضل!
ايه علاقة الشِعر
بالحُب والأمل؟
إيه علاقة الفَجر
بالطب والغزل
دي علاقة الروح
بمعاني مَحياها
ورابطِة الغنوة
باللي غنّاها

قواعد الامتحانات الأربعون

1- دي أكتر فترة بيحصل فيها تغيرات في طريقة تفكيرك , يعني مثلا هتبقى غير عقلاني بالمرة , هتقسم المادة على الاربع ايام تقسيم مايخرش الميا , وهيتبقالك أكتر من نص المادة في آخر يوم , فتصحى اخر يوم وتقول انا هخلص نص المادة قبل الساعة 2 العصر واراجعها كلها باقي اليوم , انت بتخلص المادة فعلا الساعة 2 , بالليل.

2- بتبدأ تكتشف كل مواهبك الدفينة.

3- بتحس ان كل الأفكار الجميلة هجمت عليك وانت بتذاكر.

4- وكل الفرص.

5- وكل الأفلام الحلوة على التليفيزيون.

6- والتليفيزيون نفسه بيرجع حلو بعد ما كنت مقاطعه بقالك شهور.

7- بترجع تحب قعدة العيلة تاني , وتحب من وقت للتاني تشأر عليهم , وتتفرج معاهم على وائل الإبراشي , وتتعاطف مع المأساة.

8- بتحس بالحنين المفاجئ تجاه صحابك اللي بقالك سنتين ماكلمتمهمش , وصحابك اللي عمرك ما كلمتهم اصلا.

وبتبقى عايز تصلح علاقتك بكل الناس.

تحب باباك.

ومامتك.

والجيران.

وعم عبده البواب.

9- أي حد فاتح قدامك في الشات ممكن تدخل تكلمه وتسلم عليه.

10- بتطمن عالناس على تويتر هما كويسين ولا لأ؟

11- لما الليل يهجم عليك وامتحانك يكون بعد ساعات بتبدأ تفكر في كل الأسئلة الوجودية اللي مالهاش اجابة , زي ليه انت قاعد تقرا الكلام ده , وليه الساعة 2 بالليل؟ وايه فايدته في الدنيا؟ وانت هتبقى ايه في المستقبل؟ والبلد بتعمل فينا كدة ليه؟ إلخ إلخ.

12- دايما هيبقى عندك قدرة ابداعية متجددة , دايما هيبقى في دماغك فكرة عايز تعملها وحاسس انك انت الوحيد في العالم اللي ربنا اختارك عشان تنفذ الفكرة دي. هتحس ان دايما عندك كلام عايز تقوله , دايما ممكن تنزل صورة جديدة , أو تكتب تويتة , أو تكتب عن رؤيتك وتحليلك لخط سير النملة وعلاقته بمدار كوكب زحل.

13- هترجع تحس ان الكتب اللي مركونة عالمكتب بقالها سنة ونص كويسة , وهيبقى نفسك ترجع تقرا زي زمان.

14- هتهتم بأي خبر بييجي قدامك. وهترجع تحب الحياة والخروجات والأفلام وأنواع الأكل والشرب وهتحترم أوي حقك في وقت الحمّام وهتدي نفسك Breaks مكافآت أكتر ما بتذاكر , انت بتتعب. إنما الأعمال بالنيات وإنما لكل امرئ ما نوى!~

15- هتضحك على أي حاجة مهما كانت تافهة. وهتعمل لايك وشير وكومنت على أي حاجة في المجرة.

16- هتحس بعلاقة حميمية بينك وبين السرير , وهيبقى في دماغك على طول الدفا اللي انت سبته ورحت للكتاب.

17- النوم في أي وقت مالوش اي علاقة بالمنطق ولا اي ساعة بيولوجية.

18- المذاكرة ليها طرق مبتكرة , زي انك تتغطى وتسند عالسرير وقدامك الكتاب , وتنام عادي.

19- وانت رايح الامتحان الصبح بتبقى عميق لدرجة انك بتربط كل حاجة انت بتشوفها بالكلام اللي انت ذاكرته امبارح , وحبذا لو انت مطبق , فانت ممكن تألف كتاب عن علاقة حركة المجتمع بحركة المترو.

20- وانت داخل اللجنة بتحس انك داخل تحرر مصر.

21- اول ما تستلم الورقة مابتبصلهاش مرة واحدة عشان ماتتصدمش , بتاخدها الأول وتحطها بشويش وتبصلها بالتدريج.

22- أول حاجة بتيجي في دماغك اول ما تقرا السؤال الأول هي كلمة من 3 حروف.

نفس الكلمة بتجيلك لما تقرا باقي الأسئلة.

23- مش المراقب بس اللي بيراقب الناس في اللجنة , انت كمان!

24- بتبدأ تتعايش مع الواقع وتبدأ تسايس الدكتور اللي حطلك الأسئلة.

25- طول مدة الامتحان هتشتغل في دماغك اغنية عمرك ما سمعتها , جتلك من حيث لا تدري ومش هتسيب أمك غير لما تخرج!

26- علاقتك بربنا بتزيد أوي , خصوصا وانت شايف الورقة جاية عليك من بعيد.

27- لما بتخرج من الامتحان , الاكتشافات اللي بتكتشفها بتكون اعظم من الاكتشافات العلمية في القرن العشرين.

28- وانت في اللجنة بتفكر في كل حاجة مالهاش علاقة , بتفكر ليه مامتك عملتلك عالفطار جبنة نستو مش جبنة بيضا , أو ليه بقالك كتير مازرتش خالتك.

29- بتفكر في اجابات على اسئلة الأغاني , وبيدخل في مخك صوت عمرو مع صوت منير.

30- فترة الامتحانات بتبقى هي أعمق فترة في حياتك.

31- في لحظة معينة نص شهر الامتحانات بتبقى خلاص وهبت نفسك للامتحانات واتعودت عالموضوع..

32- اي امتحان هو "اعدي الامتحان ده بس" لحد ما ييجي اللي بعده.

33- تفكيرك في الأجازة بيزيد يوم عن يوم , وأحلامك بتقرب كل ما الأجازة بتقرب , وبتتلاشى أول ما الأجازة بتيجي.

34- الأغاني بتصبرك , وبتنسيك , حرفياً.

35- يوم بعد الامتحان free وباقي الأيام هلحق , ومابتلحقش.

36- بتستنى آخر يوم بفارغ كل حاجة , ويوم اما بييجي مابتعملش أي حاجة.

37- الصراع الأبدي بين " أنا هنجح " .. " أنا هسقط " طول مانتَ بتذاكر.

38- جروب الدفعة ممنوع ليلة الامتحان.

39- الرغي ممنوع قبل الامتحان.

40- ماتراجعش! ولو لقيت ناس بتراجع .. اهرب بسرعة!!

شكراً.

أشعار على رأس العام الجديد

يللا نقول أشعار ؟ يللا

نايم انا في البيت .. قايم
وصحيت انا والبيت .. نايم
ومحدش عالحال .. دايم
بكرة اللي سكران .. صايم
والعالم من فوق .. عايم
على صواريخ النار .. والله
ماتيجي فـ مشوار؟ يللا

يللا نجيب أنابيب ؟ يللا

ونوزع دباديب .. حمرا
ونأربع مشاريب .. سمرا
ونولع ونجيب .. جمرة
وآخرنا هنناجي .. الصخرة
ونعمل زي حراجي .. وفخراً
نرمي وبكرة تصيب ! يللا

يللا نبيع الوهم ؟ يللا

يللا نعلّى السهم .. نكسب
وانا خلاص لعبت .. إلعب
لو فكرت كتير .. تتعب
لو فكرت تطير .. تِغلَب
ولا يوم ممكن تعرف .. تهرب
بس تعالى نجرَب ؟ يللا

يللا ده حال ميّال ؟ يللا

يللا ده حال ميال .. واقف
يللا ده ميال حال ~ ناشف
وده زمنٌ مستعجل .. آزف
و ده كلام متبعجل .. آسف
دي نتيجة التفكير .. عارف؟
يحلى فـ نوم وسرير .. يللا !

2015

2015

معظم الناس هنا عرفتني في 2015 , أو كانت عارفاني قبلها بحبة صغيرين وعرفتني اكتر في السنة دي , حاجات كتير اوي حصلت لدرجة اني مش فاكرها , وعرفت ناس كتير جداً , وحبيت ناس كتير وناس حبتني وناس استلطفتني من اول وهلة وناس كرهتني برضو من أول وهلة , بس تبقى السنة دي - مش عشان كليشيه بيتقال - من أكتر السنين اللي علمت فيا وعليا , واللي طلعت منها بشخصيات أفخر انها موجودة في حياتي وابقى سعيد لما افتكرها بيهم , بعدت وقربت وذاكرت واستهترت وحبيت وكرهت وفرحت وزعلت وشديت وهزرت وهتفت وضحكت , عملت كل حاجة .. في النهاية اللي بيتبقى في فيلتر دماغك هو الدروس اللي اتعلمتها لإن الدروس دي - والدروس دي بس - هي اللي هتكمل معاك بقية حياتك .. تقريبا دي اكتر سنة اتعاملت فيها مع ناس أو تاني اكتر سنة , اكتر سنة كانت الناس كلها قدامي لدرجة اني مكنتش بركز اوي انا المفروض اعرف مين وماعرفش مين , مكنتش بهتم بالعلاقات كويس لإنها كانت overload ودي بالنسبة لي مش احسن حاجة لراحتي الشخصية , او على الاقل بتحطني في خانات وروابط كتير انا حر منها , وعلى الناحية التانية فأنا سعيد بكل حد عرفته وكل حد اتكلمت معاه وكل حد سلمت عليه مرة واحدة ومشيت , سعيد بكل تجربة دخلتها وكل فرصة ضيعتها وكل حد عرفته وماعرفتوش , وكل حد قابلته وماركزتش معاه بس انا عارف انه موجود في جزء أثير من الذاكرة في عقلي اللي بقالي كتير مارتبتوش , وأتمنى اني ارجع ارتبه تاني واحدد اولوياتي وارجع اصلح علاقاتي بالناس اللي مادتهمش حقهم من التركيز والاهتمام , وفي نفس الوقت أحل نفسي من كل حاجة كانت مفروضة عليا وعلى تفكيري ووقتي من غير ما يكون ليها أهمية حقيقية .. سنة عدت عرفتوني فيها وشفتوني في حالات كتير , انبسطوا بمعرفتي أو أحبطتكم , فكرتوا فيا كويس أو وحش , ترجمتوا تصرفاتي وتعاملي صح أو غلط , حبيتوني أو كرهتوني , حسيتوا اني فعلا حد مختلف او حد مالهوش اي لازمة وشكل من بعيد وخلاص , ايً كان انا كنت ازاي بالنسبة لكل الناس اللي عرفتني وشافتني السنة دي , فانا ممتن بالتجربة كلها , وبتمنى من ربنا في السنة الجديدة إن أي ود مع الناس يقوى , وأي سوء فهم يروح , وأي ضغينة ييجي بدلها ألفة وحب , وأي خذلان أو تخييب أمل يتغير بامتنان وتفهّم وقدرة على الحب الغير مشروط بأي حاجة , أنا الشخص اللي ممكن ماتفهمهوش من أول مرة ولا من آخر مرة , لازم تقعد معايا كتير اوي عشان تعرف ازاي التعبير او الكلام او التصرف اللي بيبان قدامك بيطلع , السنة الجديدة هي فرصة جديدة لأي حد ماعرفش يفهمني السنة اللي فاتت , السنة الجديدة هي فرصة ليا إني ارجع تاني اوصل حبالي مع الناس من غير ما اضايقهم ولا يضايقوني , ابعتولي رسايل عشوائية يا جماعة , قولولي اي حاجة كان نفسكم تقولوها في اي لحظة عابرة من سنة طويلة ومالقيتوش فرصة ولا مجال انكم تقولوها , ابعتلي لو عمرك ما كلمتني في حياتك , كفاية بقى نشيل في قلوبنا لحد ما قلوبنا تتعب وبيئاتنا الخارجية تتآكل , انفتح على الدنيا وافتح قلبك للناس اللي بتحبهم واللي بتكرههم عشان انت ماتعرفهمش , صارح نفسك وصارح العالَم وكل ما قربت من نفسك وتعمقت فيها هتفهم العالم والناس أكتر , أنا مستنيكم تقولولي كل حاجة , وتكلموني عن نفسكم:)

وكل سنة وانتم طيبين