سرسوب

مستنية
هي مين؟
الأغنية
شاعر حزين
كامل الانكسار
بما يسمح
للشعر يسرح
ويتسرسب
فالقلب يكتب
أغنية
مستنية
من زمان
مُنذُ آن

يا صاحبي

يا صاحبي ان كان مالناش نصيب في الزمن
فلينا نصيب في الحكاية
إحنا اللي سبنا للتاريخ
كام ألف آية
وفي ذاكرة المرايا
وعلى الجدران
وفي الوجدان
واحنا أدان الثورة
وغنوة بكرة
ماتفتكرش اننا اتنسينا
وفي الزمان سحنا
إحنا !

رعشة السمك (2) : الموت بدون شوشرة

-1-

فرّجت مجدي
على سماجتي
وده سمكتي
الحنينة

وصاحبت نوسة
على الجاموسة
ما أصلي سوسة
ومن قنا

ودي قصيدتي
المعفنة
مالهاش لا معنى
ولا زِنة
فـ إيه يا شاعر
جمعتنا
وختمت يومنا
ووقتنا
آدي احنا قومنا
خليك هنا
رايحين هناك
خلي سمكتك
تلعب معاك
تك قرش ياخدك!

***

-2-

بعد السلام
على اليُفَط
من الحروف
إلى النُقط
القرش خدني
خدني وحط
أكلني بحر
ورماني شط
والدنيا جُحر
في عَين قلبي
هنام في قلبه
ومعايا كلبي
مرسوم في كفي
أنا أهل كهفي
صوتي يكفّي
ودن الضمير
بإيدي واقف
ولا عُدت خايف
وبقلبي شايف
ولو ضرير
عالم سَلَب
معنى الحياة
آه يا حلب
وا إنساناه
تغضب لواقع
نشِّز غُناه
قلع براقع
الاهتمام
أخد مواقع
الالتزام
بحرب كُبرى
لمَوت بُكرة
بحرب عُليا
لمَوت سوريا
وأهلها
وما عليها
وما لها
من فوقها
وتحتها
وأرضها
وشعبها
يادي الجَمال
والاُبَّهة
شفتوا العيال؟
ولاد لعيبة
لعبة رهيبة
متفَزَّرة
لعبة علي شكل
مجزرة
والدم بحر
والدنيا جُحر
في عَين قلبي
هنام في قلبه
ومعايا كلبي
ولا حد يصحى
غير اللي ضحَّى
ولا حد آمن
غير اللي آمِن
برة البيوت
الليلة دية
حلب تموت
للإنسانية

دعوة شتوية

سابق بخطوة
ولا متأخر كتير
فكرك تطير
بلا جناح
طب يلا حي
على الفلاح
وريني نفسك
وانت كل الدنيا عكسك
سبت الأمل
ومسكت في لعن الحياة
إيه العمل
قاعدين بنرسم في شوارع
نمشي فيها
ثم نمسح
ثم ننسى
إحنا كنا بنقول ايه
ولا ده بنقوله لسة
هات جنيه
أدفعه
تمن القافية
الله يخلي
 ايدي الدافية
جوة الجيوب
اللهم زي ما دفيتها
دفي القلوب

فتح العين (4)

سأحمل روحي على راحتي ،
وألقي بها
على بابها
وأبرئ من حبها ساحتي
وأعدو بعيدا إلى واحتي
أطوف السماء بسباحتي
وأغلق بيتي فوق الورق
أيوجد أرق؟
بلى نم ونام
وإسبح في أنهار السلام
حثيثا وصِل لذباب النجوم
وقم ، وقوم
أنر شمس عينك بين الغيوم
وبين الكسل
ولا تخشي لدغ النحل مادمت تحبب طعم العسل

إعلان الهدنة

من كذا سنة فيه شاعر مصري عظيم اسمه محمود بنداري اخترع جملة انا بعتبرها قانون من قوانين الحياة , مع انها لأول وهلة تبان العكس تماماً. " عمرك يحلو , لما تموت في اللحظة الأحلى ".

العظمة اللي في الجملة دي هي انها اختصرت كل معاني السعادة اللي بنحس بيها , لما نوصل في الإحساس لدرجة اننا نهمل أي حاجة تانية باعتبارها ضئيلة قدام اللحظة دي , وإن اللحظة دي بالذات هي اللي غطت العمر من أوله لأخره كإنه مكنش فيه بؤس في العالم قبل كدة , وإن كل اللي حصل كان إرهاصات وتجيلات للمفارقة الكبرى , للحقيقة اللي عشانها كان كل السعي ده.

أنا مش حاسس دلوقتي غير اني في اللحظة الأحلى , اللحظة اللي حسيت فيها اني جيت هنا في المكان ده وحصلي كل اللي حصلي عشان اوصلّها , من أول ضرب الكلية مروراً بالتحويل لحد دخولي الاتحاد بالصدفة ووجودي مباشرةً وبدون مقدمات ومن أول يوم في المكان اللي المفروض أكبر اتحاد في الجامعة يوجه رسايله منه. انتهاءاً بالرسالة الأخيرة : أديروا ظهوركم للأسوار واسقوا الأزهار فالشوك لا ينمو في أرضنا.

وبعد , أنا بعلن اعتزالي المجال العام لفترة قد تطول وقد تقصر , كل اللي يعرفني كويس او حتى مش كويس هيعرف ان القرار ده نتيجة مباشرة ومنطقية لظروف كتير حصلت على مدار سنتين. مش هكلمكم عن قد ايه الاتحاد ده تعب عشان يوصل حاجة لإن ده ظاهر لكل بصير , بس هكلمكم عن قد ايه كان عندنا حاجات اكتر بكتير نفسنا نحققها والظروف ماساعدتناش , عن حاجات مقدرناش نوفيها كلها وعن مشاريع ماتكتبلهاش النجاح والظهور , بس يبقى اني انا وكل حد انتمى للكيان ده وبذل نفسه فيه لدرجة التماهي , فخورين بكل حاجة قدرنا نطلعها وكل حد حضرلنا حاجة بننظمها وكل حد حس بكلمة بنقولها وكل حد عرف الفرق بين المسؤولية والاختيار.

وبشكل شخصي , انا فخور بكل حاجة عملتها او فكرت فيها مع الاتحاد او مع اي حد , وبكل حاجة حاولنا فيها وماقدرناش عشان طاقتنا ماكانتش ملكنا , وبكل حد عرفني عشان شخصي مش عشان حاجة تانية , وبكل حد اختلف معايا واحترمني , وبكل حد لسة بيقدر يشوف النور في اخر النفق ويتمسك بالأمل.

انا بنتمي لمحمد رضا اللي ذكراه التالتة هتحل بكرة , للإنسان المظلوم المقتول عشان هو ماعملش حاجة , بنتمي لشيماء وأنس وهالة ومصطفى متولي والطفل عمر بياع البطاطا ولأسماء وميادة وجيكا والجندي ومينا والشيخ عماد وخالد سعيد وعبدالرحمن ومودي وسالي والشرقاوي , وبتمنى اشوف اليوم اللي بلدي تستحق فيه أسماء زي دي تتعلق على جدرانها وتنتمي ليها , بلدي اللي شافوها في اللحظة الأحلى , قبل ما يغمضوا عيونهم ويسلمونا الروح.

انا في حاجة شديدة للهدنة والوقوف شوية والتفكير في كل اللي حصل واللي هيحصل لإن عمرنا مش بإيدنا وأيامنا بتجري وبتجر معاها الشهور والسنين , واللي مايلحقش يعرف هو بيعمل ايه كل فترة هيقوم يبص في المراية يلاقي شعره أبيض وهو لسة ماتحركش من مكانه ولا كسب اي اضافة. وانا بعد كل ده, مش هبقى عايز اكسب اكتر من سيرة طيبة وفكرة صدقتها ووصلتها للناس.

اشوفكم بخير

لسة فاكر

الجوع كافر
والصيف سافر
وانا لسة يا ثومة
مش فاكر
إديني تذاكر
أتفرج
على ماتش كبير
في مدرج
على ماتش مهم
وأشواط
ناولنا السم
يا سقراط
نشربه ونموت
مـ الهم
أحسن ما نموت
من الجوع
مسموح في بلاد
الدم
فيها الإنسان
ممنوع
وانا عندي لسان
أملكه
وعيار أوزان
بسبُكه
لا تقول أسعار
الدهب
ولا صرف دولار
التهب
واتنهب الشعب
وانتهى
يا عم
وقت القهقهة