إحساسات

حسيت دلوقتي ان حياتي عبارة عن نظام زي أي نظام مكون من أجزاء , كل جزء في النظام ده بينهار بطريقته الخاصة وبالبطئ ومجموع الانهيارات دي هيوصّلنا لنهاية حتمية هي انهيار النظام كله , مش أول مرة احس بالوحدة بس اول مرة احس ان محمد مصطفى بعيد اوي في محافظة بعيدة اوي مقدرش اكلمه اقله ينزل - حتى لو مرضيش. بقيت افكر كتير في اللي فات ومن شوية كنت جاي اكلم اخويا فكنت هكلم بنداري بالغلط , لوغاريتمات واحد بشرطة هي اللحن الوحيد اللي بيتجدد في مخي مهما مرّت الأيام واتغيرت الظروف , بدأت احس اكتر ان انا بعدت واني انفصلت بطريقة انسلاخية عن ناس كنت منهم وكانوا مني , عرفت مين مستعد يبيع ومين لسة مبقيلي مكان صغير في قلبه وحافظلي مكانتي زي ما هي من زمان , بقيت بفكر كتير اوي في ازاي بصاحب الناس وبفارقها وليه بصاحبها وليه بفارقها , بقيت اركز اكتر في ميكانيكية تشكيل علاقاتي نفسها وهي بتبقى قايمة على ايه وبتنتهي على ايه , بقيت اعرف اكتر ايه اللي بيزعلني وايه اللي ممكن يخسرني اللي قدامي من غير مجهود , حصل حاجة من يومين هتخسرني حد كنت بحبه بالتدريج الممل اللي هيعذبني لحد ما يحصل وبعد ما يحصل , بحس  ان مكونات شخصيتي دي مش بإيدي انا , ربنا خلقني غيور , مُحب , كاره , أناني في الحب , عندي مبادئ وأخلاق معينة -حميدة أو ذميمة- مابخرجش عنها حتى لو هخسر الدنيا , كل يوم مثلا أمي تيجي تكلمني في حاجة وارد عليها بنفس الأسس دي تزعل وتمشي وتسيبني , مابعرفش اغير نفسي عشان ارضي حد حتى لو هو اقرب حد , بقيت افكر جدياً اني ارجع اسحب تاني علاقاتي كلها وابنيها من جديد.

يوميات ثائر متقاعد (2) : الكنبة

الكنبة الكنبة

تساع ملايين

من روحي

المتبعترة فوقي

وانا بكتب

عشان اعجِب ذوقي

وانا ذوقي غريب

محتاج وقفة

على سلّم

موسيقار الزفّة

وانا ذوقي عجيب

محتاج لفّة

في ميدان تحرير

الشِعر الحُر

وانا كُنت بشُر

كلام وبقيت

بتاخدني الفرحة

لو اكتب بيت

والفرحة تاخُدني

بعيد عنّه

والشُعَرا بيكتبوا

ويغنّوا

ويقولوا يا ليل

وادي ليل تاني

اتقاس على دقِّة

ألحاني

ونعيدها مشقّة

وزن وقافية

مجاش بالذوق

نكتبه بالعافية

الشِعر ده سيف

والسيف أخطر

والسما يا بتمسِك

يا تمطّر

والمطرة بتحيي الأرض البور

والشِعر بيحيي خيال وشعور

وخيالي ساعات يهرب ويدوب

وسط الدنيا

والدنيا دروب

داخلة ومتداخلة

فصعب تلاقي

انا شايف نخلة

بطول أوراقي

المتبعترة

فوق الكنبة

يا للعجبة

شُفت اللفة ؟

بصيت للنخلة

وماغِيرتش

عندنا شيماء

ماتت واقفة

الناي

“دُقّي يا ساعة الجامعة يا حُرّة

على ليالينا السودة المُرّة”

وعلّي الصوت

دُقّي يا ساعة الجامعة

ولاد

على ليالينا السودة

سواد

ماتوا عشان داخلين

استاد

في ممر الموت

دُقّي يا ساعة

الموت

على بابنا

على ليالينا

وعلى أحبابنا

وِقِف النبض فـ قلب

شبابنا

وعاشوا القَتَلة

دُقّي يا دعوة ناس مظلومة

واعلي يا سارينات الحكومة

بكرة الناي يتحوّل شومة

ويعزف أحلى

جوز الخيل

فين جوز الخيل

والعربية؟

عندي مشوار

في الشرابية

مش فاكر

الكنبة الكنبة .. رَمَتهُ فَقام

سريره البمبا .. ناداهُ فنام

إن كُنتَ نديماً فاسقيني

أو كنت غريماً حاربني

أو مستعجل إمشي وسيبني

أو كنت القهوجي حاسبني

أنا مش فاكر .. شربت بكام

يوميات ثائر متقاعد (1) : الكرسي

الكرسي الكرسي

ضايقني هقوم

ارتاح على كنبة

واعِد نجوم

الليل وسماه

وآدي ليل تاني

إتقاس على دقِّة

ألحاني

ونعيدها مشقِّة

وزن وقافية

ماجاش بالذوق

نكتبه بالعافية

الشعر ده كيف

والكيف بيذِل

وانا بطلع حبّة

وحبّة بَقِل

والدُنيا دِوال

بين المخاليق

احكيلي يا خال

عن ألف صديق

مبقاش منهم

إلا المجدع

وانا قاعد بكتب

وأبدّع

على صمت الليل

الليل وأساه

وانا هكتب ايه

ومفيش مأساة

هرويلَك إيه

ومفيش حَبكة

وانا إيدي اترعشت

مـ الربكة

والناس تستنَى

إني أغنّي

طب اغنّي واجرب صوتي يا خال ؟

والناس من ضيقها

تشجّعني

أنا أشجع من أشجع خيّال

فانا هجري الكوكب وأطيرُه

واحكيلكُم قصصه وأساطيرُه

وأنادي وانادي على بيرُه

على بيرُه الحي

البير اللي من الوقت الفات

والوقت الجاي

وانا قاعد الف سبع لفّات

حوالين نفسي

وانا بقطع في الدنيا المسافات

طردي

وعكسي

وبقول الشِعر عشان أرضي

نفسي وأرضي

وانا أرضي بتزرع لون وردي

رغم البيادات

والورد ده يشبه ناس بلدي

والناس مقامات

والناس ها هُنا تعني الحلوين

مش كل الناس

هي الأرضين كُلهّا بساتين ؟

الدُنيا اجناس

اجناس بتناضل في الميادين

وتموت على أرض الحُريّة

اللي بتطرح ورد

واجناس راضية بعيشة الزنازين

وتحب الخوف والعبودية

وقلوبهُم سد

وانا شاعر بكتب حبة هزار

والاقيني بجد

طب حتى ابقى اديهم انذار

تغيير حالة

تغيير احساس

اه يا واقف عالمسرح بتقول ايه

يابن الناس

انا واقف اقول في كلام مليان وكلام بيشُر

وكلامي بقى شبه الأيام يحزن ويسُر

وانا أصلاً كل كلامي بقوله وبرتَجلُه

انا طالع اقولّكُم إنّي حزين , بس تفائلوا !

أنتظر الوحي - بشرطة

"أنتظرُ الوحيَ فيأتيني

من أجلِكَ؟ لا, بل لِيقيني

والوحي دا بيجيني تملّي

الوحي دا نصّه م الأقدار

والنصّ التاني على فنّي"

وانا في الغُربة بفضل اغنّي

طب مين يسمع ؟

وانا بكتب والشِعر تَجَنّي

طب مين يقرا ؟

اللي انا بكتبه بكتبه للناس

ولا الذكرى ؟

والشِعر بيطلع مـ الإحساس

ولّا الفكرة ؟

والزرع بيطلع بَعد الفاس

ولّا البذرة ؟

وكلامي اللي عاجبني يا إبني

مش شرط يكون عاجبك أبداً

بالأمس نُحب العزف معاً

, أكتُبُكَ اليوم , وأراك غداً

ستعيش أيا ولدي رغداً

وَتَموت وذِكرَك بالألسان

وسيحيا عودُكَ للألحان

فاتّبع الوحي الآتي الآن

وارمِ من قَلبِكَ ما يحمِل

واقلب وجهَكَ شطر المَرسى

ستجدني أنتَظِرُك , أكمِل

فيما لا يزهو عن خمسة!