البحر المتجمد

ونزلنا للميدان، وسرنا فوق البحر المتجمد، وفتحت عيني على اتصال الأخ، وأكلت كرة الذهب في طريقي للصينية، وانسجم الماضي مع الحاضر.

في حاجة؟

في حاجة شديدة، للدخول في تجربة سعيدة
في حاجة ملحة، للدخول في تجربة ناجحة

قصيدة كبيرة أو دموع الفلسفة

انا عندي مشاعر فياضة فقيرة
وقالولي يا شاعر دي قصيدة كبيرة
وانا شاعر حاير ماعرفش اللي قالولي
ولا جدي شومان ولّا الطنبولي
وده كان ياما كان كان فيه شاعرين
قاعدين يتمشوا قاطعين شارعين
في غصون ساعتين أفشوا أسرار الكون
وغصون أشجار طالعة لأقمار
غارسة في أرضين نازلة على بحار
وسمك سردين بيبلبط فيه
رايح عابدين ربنا يشفيه
واحنا قاعدين مع بعض الناس
بنغني كلام من غير احساس
ومشاعر فياضة فقيرة عندنا
ويا شاعر دي قصيدة كبيرة قدنا
واحنا .. صغار .. احنا نفسنا
بنجيب اوزان تقلانة ف إيدنا
نضرب ألحان في غير عيدنا
ونقول كلمات في غير وقتها
عاوزين اجوان والوقت انتهى
يادي المعضلة
يادي الأزمة
الذات بتمر
فـ متلازمة
وجبيني بيشُر
لا عرق
يعكس معضلتي
عالورق
في ظلال غامضة
زي اللمضة
في سطور طايشة
وأفكار هايشة
وأشعار بايشة
بحرها مات
بتجسد أزمة فكرية
ووجودية وغادة وشكرية
وهعِد من مية لـ مية
على خط اللا نهايات
واقوم من نومي بتلفّت
دي دموع الفلسفة اهي جفت
ودي ثمرة علمي المتفرفت
من سهرة يوم التلات
أنا هنا في اللا هنا وهناك
قاعد مع نفسي ومعاك
شفت الحكمة ازاي لامساك؟
ادي اخرة عصر الآلات

سرسوب

مستنية
هي مين؟
الأغنية
شاعر حزين
كامل الانكسار
بما يسمح
للشعر يسرح
ويتسرسب
فالقلب يكتب
أغنية
مستنية
من زمان
مُنذُ آن

يا صاحبي

يا صاحبي ان كان مالناش نصيب في الزمن
فلينا نصيب في الحكاية
إحنا اللي سبنا للتاريخ
كام ألف آية
وفي ذاكرة المرايا
وعلى الجدران
وفي الوجدان
واحنا أدان الثورة
وغنوة بكرة
ماتفتكرش اننا اتنسينا
وفي الزمان سحنا
إحنا !

رعشة السمك (2) : الموت بدون شوشرة

-1-

فرّجت مجدي
على سماجتي
وده سمكتي
الحنينة

وصاحبت نوسة
على الجاموسة
ما أصلي سوسة
ومن قنا

ودي قصيدتي
المعفنة
مالهاش لا معنى
ولا زِنة
فـ إيه يا شاعر
جمعتنا
وختمت يومنا
ووقتنا
آدي احنا قومنا
خليك هنا
رايحين هناك
خلي سمكتك
تلعب معاك
تك قرش ياخدك!

***

-2-

بعد السلام
على اليُفَط
من الحروف
إلى النُقط
القرش خدني
خدني وحط
أكلني بحر
ورماني شط
والدنيا جُحر
في عَين قلبي
هنام في قلبه
ومعايا كلبي
مرسوم في كفي
أنا أهل كهفي
صوتي يكفّي
ودن الضمير
بإيدي واقف
ولا عُدت خايف
وبقلبي شايف
ولو ضرير
عالم سَلَب
معنى الحياة
آه يا حلب
وا إنساناه
تغضب لواقع
نشِّز غُناه
قلع براقع
الاهتمام
أخد مواقع
الالتزام
بحرب كُبرى
لمَوت بُكرة
بحرب عُليا
لمَوت سوريا
وأهلها
وما عليها
وما لها
من فوقها
وتحتها
وأرضها
وشعبها
يادي الجَمال
والاُبَّهة
شفتوا العيال؟
ولاد لعيبة
لعبة رهيبة
متفَزَّرة
لعبة علي شكل
مجزرة
والدم بحر
والدنيا جُحر
في عَين قلبي
هنام في قلبه
ومعايا كلبي
ولا حد يصحى
غير اللي ضحَّى
ولا حد آمن
غير اللي آمِن
برة البيوت
الليلة دية
حلب تموت
للإنسانية

دعوة شتوية

سابق بخطوة
ولا متأخر كتير
فكرك تطير
بلا جناح
طب يلا حي
على الفلاح
وريني نفسك
وانت كل الدنيا عكسك
سبت الأمل
ومسكت في لعن الحياة
إيه العمل
قاعدين بنرسم في شوارع
نمشي فيها
ثم نمسح
ثم ننسى
إحنا كنا بنقول ايه
ولا ده بنقوله لسة
هات جنيه
أدفعه
تمن القافية
الله يخلي
 ايدي الدافية
جوة الجيوب
اللهم زي ما دفيتها
دفي القلوب