الأخ الحاير
بنداري .. اسمه
والأخ الداير
في دواير قسمه
والأخ الثاير
على سير الكون
والأخ الساير
في الكيلو مليون
اسمه محمود
مكتوبله خلود
في الدنيا بفنه
لو تسأل عنه
تلاقيه بيسافر
في طريق ممدود
وكلامه يـتَنُّه
داير في الدنيا
بيروح ويعود
في العود وتر
حالف لـ يشدُّه
تحذير .. خطر
أحسنلك ودُّه
"مطلوب دكر"
يستجدع ضده
مكتوب قَدَر
لو مين .. هيهده
على سطح القمر..
كائن عنوانه
والليل والمطر
شاهد ,ولسانه
اعتاد السهر
شعره وأوزانه
واصف للبشر
من بير أحزانه
المهنة طالب
لعلوم الأدب
والصنعة كاتب
وكلامه دهب
والشغلة حابب
تشكيل الفضة
ودماغه شارب
أمجاد العرب
الرقم القومي
مفيهوش ستّات
اتنين اتنين
وسبع بركات
خمسة وعشرين
وكتير دلالات
لبقاء المجلس
كام واحد مات ؟
سايب للحوجة
خمسات خمسات
وتمَلّي بيحسب
عدّاد الشهدا
فـ كل الثورات
اتولدت فكرة
ساعِة ما اتولد
راح نسمع بكرة
عن سيط الولد
سارح في الدنيا
مش سايب شارع
ولا سايب حارة
ولا سايب بلد
