نبضات غير منتظمة ..

- كُن متأكداً أنه في مقابل الفكرة التي دونتها .. عشرات الأفكار التي أغفلتها أو نسيتها ..

- لستُ مهتماً أصلاً بهذا العالَم .. افسدوا ما تشاءون .. ولكن لا تفسدوا مزاجي الآن.

- ماذا لو أبدلنا الدائرة المُتخيلة بخط منحنِ مغلق أيضاً ولكنه يحتاج من النُقطة المسافرة داخله عمراً مثل نصف عُمرها .. بحيثُ تسافر في أول مرة وينتابها الشغف والإثارة لرؤية كل ما يتجدد في الرحلة .. وتُعيد السفر مجدداً لإصلاح كل ما تظنه خطئاً !

خاطرة قبيل تجلّي نور الصباح ..

عندما أفرغ لتوي من قراءة رواية .. تتداخل الأحاسيس داخلي .. مِن إحساس بالوحشة تجاه هذا العالم الثائر المُفعم بالحركة الذي تركته .. وإحساس آخر بالحرية والانطلاق ..فقد كف الراوي عن الحكي وتركني لنزوات الخيال .. فقد ترك أمامي العالم الذي فتحه مستمراً .. يُحكى في أعماقي ويتجدد كما كان يتجدد .. إلى الأبد ..

اللعنة ..

أريد أن أكتب .. أريد ذلك بشدة .. ولست في حاجة للنظم .. فالنظم - رغم تعبيره الشديد عمّا يجول في ذاتي - يقوّض جزءاً ليس هيناً من الأفكار والخواطر .. قد تظهر ظهوراً غامضاً في ثنايا تلك الأبيات .. ولكن لا تتجلى .. إلا قليلا .. ضِقتُ ذرعاً بتلك الفترة الكئيبة .. ما إن نفرغ من أحدهم ونظننا نرتاح قليلاً .. حتى ننتبه لذلك الآخر الآتي مسرعاً من بعيد ... والمشكلة في العموم .. أكبر من ذلك .. بكثير ... اللعنة!

لوغاريتمات (5)

الواقع كله

أصبح مُبتَذَل

والشاعر قرر

يهرب بخياله !

يخلق أحلام

مـ الشوق والغَزَل

ويشوف في الكون

سحره وجماله

ويشوف الدنيا

من خرم الباب

والباب كان فاتح

على ألف كتاب

والباب كان رايح

مطرح ما يوّدي

والباب كان طايح

"ده محدش قدّي"

والباب كان سارح

وملهش حدود

والباب كان أصلاً

مش موجود !

العين مُشتاقة

والقلب حزين

والناس تتلاقى

زي المساجين

والسجن كبير

أكبر مـ العقل

والعقل فـ بير

والبير مش سهل

الأخ القائد

على رأس جيوشه

والأخ الرابض

ولا حد يحوشه

والأخ الصائد

كل الأعداء

والأخ الفارض

كل الأشياء !

متصبرنيش

متصبرنيش

للصبر حدود !

متكلمنيش

أنا مش موجود !

متلخبطنيش

وتقولي غبي !

طيب بشويش

علشان النبي !

يا أيها السائل

يا أيها السائل

وِقِف السؤال عندي

يا أيها الأدمُع

إمشي على خدي

يا أيها الماسك

إمسك على يدي

يا أيها المسكين

وحدك كما وحدي

طاير يا طير مجروح

تايه وخذله السرب

لكنه ظل ينوح

رغم الرياح بتهب

لكنه ظل يبوح

بكل ما في نفسه

مهما يطير ويروح

كل الطيور ... عكسه

يا رحالة يا مسافر

يا حُب يا جوّال

تبكي لأنك فاكر

ومفيش كلام يتقال

إفرح لأنك عابر

من فوق خيوط الزمن

لو تشكي عدم السكن ..

إخترت ليه الترحال ؟

زعلان لأنك شاعر ..

الشِعر ايه غير زعل ؟

عارف- طريقك واعر ..

لكنه مش مُبتذل

*من يوم ما جيت الكار

مبقتش عارف اسأل

لما اترُك الأشعار

حتماً .. هكون أجمل*

يا متر

يا متر ياللي معدّي

إديني شاي بالقهوة

أنا كنت قاعد وحدي

وصُحابي جم على سهوة

يا متر عايز مِن ده

إديني شاي بالزبدة

الصُحبة قامت بدري

دلوقتي أنا والوحدة ..

قاعد لوحدك؟ -عادي

إديني شاي بزبادي

أو حط من دي علادي

شربني لاجل مافوق

إديني شاي بحليب

واذكُر أعز حبيب

كله بيبقى غريب

شربني عايز ادوق ..

تجليات في الأبعاد (2) : الحديد

الزمان .. قبل تحديد التاريخ - بسَنَة

المكان .. في جوف المجرّة

جو الجسيم .. مش برّة

في النقطة الحرجة من المنحنى

عالَم موازي ومُضاء

بالبرق والإلتماع

نادر ما يوصل شُعاع

للكوكبة مـ الفضاء

كل الكوائن حديد

والجسم مثل الحشرة

مِسِك فـ إيده النشرة

بدءاً بعامه الجديد :

أهل الحديد .. يا كُل جنس الكوكبة

أهل السطوح ضايقوا أبونا بحفرهم

قام قاطعه صوت - مش صوت ,ولكن ذبذبة

- نطلع نبيدهم كلهم

- هنقُلُّهم إن الحديد طالعلكُم بدل النزول

- هيصدقوا ,الطبع في الكوكب كسول

والحرب خدعة ..

والساعة تسعة ..

نطلع نبيد

كل الأنام

ونعيش على السطح فـ سلام

وصل الكلام .. ولّا أعيد ؟

ماتيجي نعيد الجولة

ماتيجي نعيد الجولة

ملعون أبوها الدولة

ملعون أبوها الأرض

خدعوك فقالوا زرقا

ياللي انتا وصلك فرض

أخدت ايه مـ الفُرقة ؟!

انا عارف اني خنيق

لكن انتا عارف : طيب

وبعدت ليه يا رفيق

بعد امّا كنت قريّب !

ندمان على معرفتي ؟

لو كان .. لَبان الأمر

يا شيخنا جيت استفتي

في صديق بفِعل الخَمر !

ماتيجي نقرا الرسائل

ونحِل لُغز المسائل

يا شيخنا لو جيت أطلُب

لا تنهرّن السائل ..

أحرام عليّا الحُب

وحلال في قلبي السرقة ؟!

ياللي مِفارق , طب ..

أخدت ايه مـ الفُرقة ؟!

يا صاحب الكلمة

يا صاحب الكلمة

إحكيلي كام قصة

بالوزن والقافية

ورُصُهم رصة

يا صاحب الكلمة .. عايزها ملحنّة

إحكيلي كام قصة .. يكفوني سنة

بالوزن والقافية .. على كيفي أو كيفك

ورُصُهم رصة .. على درب تأليفك ..

يا صاحب الكلمة .. عايزها ملحنّة .. بالفتحة والضمّة

إحكيلي كام قصة .. يكفوني سنة .. أقضيها في الضلمة

بالوزن والقافية .. على كيفي أو كيفك .. مختلفة بالذمة ؟!

ورُصُهم رصة .. على درب تأليفك .. يا صاحب الكلمة !

انا كل ما بكبر بفهم

أنا كل ما بكبر بفهم

إن انا مش فاهم خالص

ولا شئ يدعو للفهم

والعمر كمان للعِلم

كل امّا بيكبر ناقص

, وبشرُق من مغربي

بصيت من فوق للدنيا

ولقيت للكل زوال

بيلف الكل فـ كورة

إلحق إلقطلك صورة !

عمر ما هيدوم الحال .

- من فوق غلاف كوكبي

اتقابلوا ازاي معرفش

فـ زيادِة علمي و جهلي

والموت من فوق العرش

ياخد أرواح الخلق

وفـ مرة هياخد أهلي

, وساعات أعمى أو غبي!

وفـ مرة من المرات

مدّيت رجلي للجنة

ولساني قالّي استنا

فوقعت فـ شر ذنوبي

وانا ماشي على الصراط

, لكن شفعلي النبي

أنا كل ما بكبر بفهم

إن انا غفوة من الثانية

والفهم فـ ذاته قُليِّل

وخيالي هيفضل عيَّل

والدنيا هتفضل فانية

, والعين .. سجني ومهربي!

ماتيجي تفك طوقي

ماتيجي تفك طوقي

توزن أدبي وذوقي

مشتاق ولكن شوقي

معادتش تسِعُه الحروف

مرضتش اكتب جواب

املا سطوره عتاب

ملعون أبوهم صُحاب

يتفارقوا لاجل الظروف

أنا اللي حبك صراطي

والبنت دي مش مراتي !

وعارفني ساكت وواطي

لكن في بيتك بطوف

مهموم , ماتيجي نشكي

محزون , ماتيجي نبكي

مشتاق , ماتيجي نحكي

أعمى , ماتيجي نشوف !

النسور

النسور الحائرة

هائمة في الفضاء العتيم

تتسلل بين الأرواح والأشباح

والدعوات المتناثرة

تشق طريقها إلى الرحيم

وفي الزاوية الأخرى من السماء

تراقب الأرض بأجنحتها الثائرة

تُرى هل تستجيب الملائكة

للزمان الظليم

ربما صعدت ألسنة الدُخّان المتكاثرة

فوق أعين الجلاء

فلم يرى إلا طبقات الألوان الحالكة

ولم تعد انتفاضات الضمير المُثابرة

تلقى سوى الخبل في أعين العقلاء

والأمل تحت ستائر التعتيم..

والنوايا الهالكة !

آخر مرة حبيت

الراجل الغامض بسلامته

والعسكري ,الفارد قامته

والشاعر يكتب ملحمته

ويموت ويسيب آخر بيت

من ألفين عام .. معشقتش

كام وعد راح .. في المشمش

مستغرب إني مكرهتش

من آخر مرّة حبّيت !

ربنا يرزق

ربنا يرزق بشلّة

; أصله مش وقت نسب !

مش هبيع الحُب إلا

لو لقيتوا ميت سبب !

مش هدين بأي ملّة

إلا علشان هي منّي

مش هضيّع كل سنّي

إلا علشان الأدب !

فتح العين (1)

حلاوتها حلاوِة بسبوسة

راح داب في عنيها وباس بوسة

كان من ناس طايرة بَس بؤسا

لكنه بيحلم ويطير

ويدوّر عالحلم إياه

ساعة ما يشوفها جايّاه

من كتر الفرحة يقول : ياه !

مستنيكي بقالي كتير

يتشجع ويقرب منها

ويحط البوسة على جبينها

لكن .. تتبخر من حينها

من غير تقديم أو تبرير

في جميع أحلامه استنّاها

أبلغ أشعاره وأحلاها

لا يحب ويعشق إلاها

ولا يزهق يوم مـ التدوير

الصورة

الشجرة المايلة في الصورة

من أيام العصر الملكي

وحجارة شارع مكسورة

في محمد محمود والفلكي

والقاعد جوة المقصورة

مش زي المقتول في الملعب

أنا كل أما أفكر .. أتعب !

أجمع في الذكرى .. ولّا أحكي !

أنا نفسي خلاصة أشياء

اجتمعت بالصدفة الخالصة

وفـ بلدي آلاف الأسماء

من جوة الزحمة والرصّة

من فوق الأرض .. والماء

بتشوف الشعب .. والجو

حظك يبقا بيضحك لو

تستفهم من أول بصة ..

الصورة بتحكي فـ تفاصيلها

حكايات للأزمان والعبرة

مطلوب دراستها وتحليلها

من ذوي الكفاءة والخبرة

اتحداك تتقن تمثيلها

كما أول مرّة في اللقطة !

لو ترسمها من غير غلطة

دوّر في القش .. عالإبرة !

- راجل تعبان رايح بيته

- ومصاب الثورة .. والعاهة

- فلاح بيشمّر جلابيته

- بنت ,ويافطة كبيرة وراها

- راديو , وبتقولك "حبيته"

- فيلم , وبيقولها "كدابة"

- صورة , عسكري فوق دبابة

- لعبة .. إنسان جوة متاهة !

- "عاملين حوالينا كمّاشة

لابسين مركزي, ميري وملكي"

أو ناس عواطفهم جياشة

واللي بيصرخ واللي بيبكي

واللي بيتفرج عالشاشة

مش زي المقتول في الملعب !

أنا كل أما أفكر .. أتعب !

أجمع في الذكرى ولّا أحكي ؟!

..