العلاقات

أنا بحب احافظ على علاقاتي الكويسة مع الناس , بغض النظر هي الناس دي عاملة ازاي أو إيه شكل شخصياتها وأخلاقها وتعاملاتها , اللي بيعرف يحب بيعرف يحب الإنسان من غير ما يعمل تفرقة جامدة بين الناس اللي بيقابلهم , بينتصر للإنسان مش لأي حاجة جواه أو براه , لإن التاني ده الفرق بينه وبينك في الأصل تقريباً ولا حاجة , اتخلقتم من روح واحدة والقدر لعب لعبته في اختيار وقتكم ومكانكم وظروفكم , وحتى في اختيار صفاتكم الشكلية والجوهرية.

أي اختلاف من أي نوع بيني وبين أي حد لا يؤثر بالمرة على حُبي للحد ده وللعلاقة اللي بتجمعني بيه , علاقة الإنسانية اللي انا قلتها فوق , ببساطة أنا كان ممكن اكون هو أو هي , أو هو كان ممكن يكون أنا , أو كان ممكن نكون اتنين تانيين , أو نكون قطط أو ضفادع أو شجر .. بس ربنا خلقنا من بني آدم تكريماً , وقال : { يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى * وَجَعَلْنَاكُمْ شُعُوبًا وَقَبَائِلَ لِتَعَارَفُوا * إِنَّ أَكْرَمَكُمْ عِنْدَ اللَّهِ أَتْقَاكُمْ * إِنَّ اللَّهَ عَلِيمٌ خَبِيرٌ } .. لتعارفوا.

أيوة ساعات بتضايق من ناس , ساعات ببقى مش طايق اي حد خالص , بس بعد فترة صغيرة برجع وبقول ماهو ده زيي , بيفكر زيي وعنده نفس الطموحات والخواطر ويمكن نفس ضيق النفس بيجيله بالليل لما بيفكر , وبيغلط زي مانا بغلط , ليه مانسيبش مساحات للناس يكونوا ناس؟ يمارسوا حقوقهم الطبيعية في الخصوصية والاختلاف والتفكير؟ ليه مانسامحش اللي بيغلطوا اذا كنا احنا بنغلط وعايزين اللي يسامحنا؟

مع الوقت مابقتش افهم الناس اللي بياخدوا الدنيا على صدرهم , يا ناس ياللي بتاخدوا الدنيا على صدركم : كلها يومين وتمشوا , عيشوا خفاف عشان الناس تفتكركم بخير , مش لازم تفتكركم بخير , بس تفتكركم بابتسامة صغيرة ابتسمتوها في وش حد لما شفتوه .. خلوا دايماً قدامكم احتمالات النهاية الحتمية , انها مجرد ايام معدودة بتخلص وتنتهي ومش بيبقى منها غير اللي زرعناه في بعض .. لو زرعنا حب هنحصد الذكرى اللي تخلي عيننا تلمع لما نفتكر , لو زرعنا قسوة مش هنحصد غير القسوة والذكرى المؤلمة , مش هنحصد غير الندم على فرصة في أيام كان ممكن تبقى أخف ساعتها , وأخف علينا لما نفتكرها , أيام نقول انها كانت احسن ايام لإنها كانت بين ناس لسة عندها قدرة على الحب والعطاء بدون مقابل , لسة عندها مساحات تتحرك فيها مايكونش ليها دعوة بزحمة الحياة المادية.

هيجيلي اوقات ايأس واضرب الدنيا وابقى عايز اسيبها خالص , بس هتفضل الأوقات الأكبر اللي بقضيها وانا بحاول انتصر للمحبة والأمل , وانا بحاول اوجد مكان ليا وسط مجتمع إنساني بيتبادل العلاقات الطيبة , السلام اللي من غيره المجتمعات بتتحلل وبتموت.