حدود الطب: القراءة الأولى

قاعد على باب

قصادي لوح

مش بقرا كتاب

بقرا روح

في كل قراية

بحاول اكشف

في حدود الطب

المسموح

انا لما هحب

الناس تزيد

الميا تقب

النيل يفيض

ويقوم الحسين

يقتل يزيد

صاحبك راح فين

صاحبك بعيد

ده بيتبع كل

شيطان مريد

وانا بزرع فل

وعندي عيد

بإيد بحيي

وبكتب بإيد

طب شفت زيي؟

أكيد ماشفتش

غرقت في النوم

صحيت ماموتش

ودبت في اليوم

ودوشته

واهو عدى الزمن

دي مشيته

فين أماني النفس؟

حاشته؟

فين أغاني الأمس؟

عاشته؟

ده تراب الكنس

ومقشته

ودي غيوم القهوة

وصدى ليلها

عدى طيف الأم

وعيلها

وطاف عليها الست

ومنديلها

جيله عدى وفات

بعد جيلها

هحكيلها الحكايات

لما اجيلها

واشتكيلها

إن العمر غفوة

وإنه قبل ما تبرد القهوة

وإني من فوق لسّاني بهوى

وإن اسمها من لساني سهواً

سقط مع كل اللي سقطوا

الله يرحم كل اللي نطوا

جريوا من شياطين

تطفش بلد

مخلوقين من طين

ومن كمد

يومها شافوا

في السما باب

يومها عرفوا

في الرحمة دين

يومها سكتت كل الإجابات

لما سألوا كتير نروح لمين؟

يومها راحوا

بس مش لحد

سكة اللي يروح

من أبو جد

وانا بكتب جالي

أبو فهد

قالي ايه يا غالي

يا أبو عهد

خدته رحنا ركبنا

أبو جمل

رحنا عند حبيبنا

أبو أمل

قلنا يابا نسيتنا؟

قال لاء

دي كنيسيتنا

مليانة آباء

وأنا عاوز اشوف

ابو خروف

سمع الضيوف

قال ماء

دي قصيدة رثة

ورثاء

فيها شبه قصة

واسكتش

انا هسكت

عشان انت هتنزل

بس مخي مكمل

ماسكتش 

سفر الرؤية (3): المسرة

ملقتش حاجة برة

دخلت جوة وفتشت

شفت في أحلامي مسرة

اكتر من اللي شفته لو عشت

شعري وقف في كابوس

كسرت عليه ألفين مشط

حجيت جبل المجوس

وطفيت شموع دير زرادشت

ملقتش حاجات كتير

فبديت أدور عالقليل

الصبح بقى شرير

فبقيت بستنى الليل يليل

أكتب شعر السرير

واستنى فلم حلمي يحمل

وادخل بسيف أمير

وشيطان الأحلام يكمل

لكل قصة بداية

وكل حلم حارسه شيطانه

تايهين في بحور سمايا

وكل بحر ليه قبطانه

من كل بحر بوزن

بيت الشعر اللي عطشانه

من كل كلمة أرحب شجرة أطيب

تملا غيطانه

بساتين الحلم واسعة

عن أضعاف بساتين الكوكب

وأنا عندي الحاسة التاسعة

في وقتي الفاضي بقعد ألعب

ألعاب مفيهاش خسارة 

كل حركة جديدة مكسب

أنا جناح الطيارة

وأنا الطيار وأنا اللي هركب

سفر الرؤية (2): الضوء

بنتمي للفن

هل الفن بينتميلي؟

كونك شمس

هل ده منعك أن تميلي؟

بكتب شعر

مش لزمني ومش لجيلي

بكتشف العكس

من أوضة جوة فيلي

بلعب كورة

وفي البداية شوطت رجلي

بكتب صورة

فيها شموع بتحترقلي

في كلامي أنوار

بس الليل بعيش في ظلي

حواليا أسوار

وروحي سافرت افتحيلي

بكتب هادي

مش محتاج لقطر فوري

مملكتي بعيد

فمش محتاج لفعل ثوري

هكتب وأعيد

العالم بشكل دوري

وصفات الناس

لحد ما مرة ترتاحيلي

كانت ضيقة

فلقيت الوسع جوة

الناس سيئة

بس لقيت الوحدة قوة

الحرب مقلقة

فحفرت بيني وبينها كوة

مالقيتش سبيل

فوليت وجهي وبنيت سبيلي

مشيت كتير

لحد لما بلغت أسباب

ساعات أطير

وساعات يلقفني سرداب

طالع ونازل

في دنيا ألعاب

يا دنيا جايلك .. وانتي .. تعاليلي!

سفر الرؤية (1): المكان

الشاعر عينه بتلمع

وانا عيني مطفية وغامضة

والمعنى في بطن الشاعر

وانا كل حياتي في الشنطة

والشعر فن الدهشة

وانا صاحب فن الخضة

والنور مكانه في قلبك

وانا نوري في قلب اللمضة

النور مكانه في قلبك

هل أنا ليا مكان جنبك؟

فيه فنان خض جن

فيه إنسان عض كلبك

فيه ناس يمشولها بلاد

وانا من لبنان لبعلبك

حتى محدش ركبلي

ولا خطالي مسلك

وحيد في مدينتي

مع الجن اللي خضيته

أبو الأشعار بنتي

وده الكلب اللي عضيته

حاسب انا هنا دافن

كل شاعر في بيته

كل اما جالي ندا

جريت بعيد ولبّيته

في ايدي سبحة وكاس

الاحتياط واجب

اللي يآمن للناس

غرقان في طوق سايب

إكتب على الكراس

عقلك هو الصاحب

وقلبك الوناس

ودراعك الحاجب 

سفر أخبار الأحلام (2): الاحتمالات

وزعت جزء من روحي

على كل إنسان

لحد ما روحي خلصت

فرجعت أجمع اجزاء

من أرواح الناس

بس لما رجعت البيت

بصيت

جمعت رجل

واربع ايادي

وودن

وخمس عينين

منهم اتنين عور

فرتبت اجزاء الروح الجديد بالدور

ونمت

حلمت بأخطبوط على جسم قط

واقف برجله الوحيدة على جرف شط

والبحر جف وقاع المحيط سارح

والسمك ساب الشبك في السما سابح

والأخطبوط بيهدد عاوز ينط

نطيت.. صحيت

وجريت على ورقي

فتحت ومحيت

معرفش في الحلم

انا اللي عايش

ولا أنا اللي غرقان في المحيط 

سفر أخبار الأحلام (1): الصدفة

عاوز ابقى مواطن سيريالي عايش في اللوحة

أو اكون نظرية كلاسيكية تايهة في أطروحة

أو كلمة نسيتها واستدعيتها فبيتي ووزنت اشعاري

أو آلة استبدل بيها دماغي تنظم أفكاري

الدنيا خيوط مرسلة يوم عن يوم تجري

والعقدة يوم عن يوم تضيق وتتشبك

وانا واقف على طرف الخيط بنظم شعري

وبحيك جلباب دايما يطلع واسع ومحبك

فبعري كلامي كحل مؤقت للأزمة

إن صادفك في الشارع أي كلام لابس جزمة

افتكر إن أنا قلت كناية

وسبتها على طرف ملاية

ودخلت الحلم لقيت آية

فمعرفتش أكمل تركيزي لآخره

كان عندي رصيد حكايات، هدخره

والآية بقت آيات، يا مخداتي اتاخروا

انا ملك العالم في الاوضة الضلمة

هانت لي الدنيا بالفكرة وبالكلمة

وعيوني لو فاتحة منتبهة ولو قافلة بتلمع

وانا ساكت بس لأفكاري همسة ركز واسمع 

سفر التسمية (2): الطوبة

بقيت بكتب شعر واسقعه

فحرارة مشاعري تبرد

بقيت بكتب شعر وأركنه

فكثافة أفكاري تنفض

بقيت بكتب شعر وبدفنه

لحد ما اجيد الفن وأتقنه

أو يظهر شيخ علم يلقنه

أو أحد الخطباء يلقيه

أنا في الصحراء هلقيه

في أول بير ألقيه

الشعر رواني فهرميه

حتى يجد الباحث يرويه

فأنا هكتب شعري وهكويه

لو كتبت الشعر وطبقته

هبقى بيت المتنبي وسقطه

على راس الشاعر الشجيع

خلى تمن الكلم البديع

حياة مقرونة بالاستعارة

وبناء بالمونة والمحارة

أسسه على رمل بيتحرك

ساب الواقع لخيال ابرك

فيه من كلمة راس وقلب

الطوبة هناك بتحب كلب

والكلب هناك شغال وزير

والوادي مليان ألف بير

من كل بير ستين حكاية

في بداية كل قصة آية

بسم الله وبسم كل راس

خلقت من كل كلمة شكل

وبين كل شكل وشكل فكرة

تتقال اليوم، وتكون بكرة

سفر التسمية (1): الوردة

هبقى جيمر والعب

خريطة الكوكب مابي

هجيب يميني حكيمي

وعلى الشمال امبابي

من الشمال الفايكنج

بيخبطوا في ابوابي

وانا في الحرب شاعر

ماسك سيفي وكتابي

كل صفحة بقتيل

من اللي كرهوا الحب

كل مقتول يوسف

نجي في غيابة الجب

وكل الكلام من بير

كل اما يفضى اصب

كتابي يكبر في ايدي

ويتقل وسيفي يبرد

وشعري يختل ويميل

ودرعي يمرض

وشعري يبيض ويزيل

وروحي تصعد

من أسفل البير

لأعلاه

من أضعف التعبير

لأكمله

وأعيد سؤالي

من أوله

عن المدينة اللي

تسعى فكري

فيها المعاني

أنهار بتجري

وعلى الأغاني

يتهادى شعري

وكل الأماني

مكتوبة أخبار

مفيش ثواني

وساعات وأعمار

مليانة ناس

من كل جنس

من كل جن

ومن كل انس

من كل فيلم

ومن كل لعبة

فيها من العلم

ألف شعبة

والقلعة لابسة

والقصر كعبة

والثورة دايرة

والطايفة ثايرة

والعلم قال

مفيش إجابة

قبل السؤال

فتعالوا نسأل

قبل ما نتسأل

والوزن يتقل

والحمل يتنقل

والوردة تدبل

واللعبة تتقفل

سفر العد (3): الناس والحجارة

العالم أكذوبة

أشلاء في جو منفجر

شظايا في سما معتمة

حجارة من أرض متقسمة

إعراب ضمير مستتر

تقديره لا أحد

أعراب بلا ألسنة

فرسان بلا أحصنة

حكام بلا مستند

جيوش تحارب ظلالها

ليالي مايجيش أطولها

غير لما أطول برج يقع

فيه ناس بتشوف الصراخ نشوة

والدم بقع

فيه ناس بتشوف التراب عشوة

والجنازات جمع

وناس شايفة القلوب حشوة

والمبادئ قطع

وقاعدة تزكي ناس تدخل حروب

بالبق

بعينه يكسر سدود وبالصباع

بيزق

وبحاجبه يفتح حدود وبالخدود

بيشق

ويجيب بتمن الأراضي جوقة الأوبيريت

يمجدوا الحامي فاتح بيبان البيت

ويطلعوا يغنوا للعيشة في بلاد تانية

يا خلق عالمكم مقسوم بعدد الخلق

ماتقولش عالم واحد قول كذا مليار

وكل عالم فيهم مبني على خيبته

يدور في سككه وتجذبه هيبته

يقيمه صلبه وتهدمه شيبته

ولحد ما نلقى القدر هنسيب صور

لمحمد الدرة اللي ساب ملايين درر

طايفين في كل مدينة يحفروا الأثر

إلى كل مستعمر طيرا ترميه بحجر

ولكل بطل من غير دراما انتصر

سفر العد (2): أوعية، ماء وإحياء (أجزاء الواحد)

حزين

هكتب رواية تكفي الحزن

سعيد

هكتب قصيدة تكفي السعد

أما بعد

هكتب رسالة

هقطعها

الحكمة صعبة

هصنعها

سفر العد (1): اللغة والقدرة (بين صفر وواحد)

 

انا عايش في سحابتي

لغتي كتابتي

وخيالي مرتبتي

وانا ناسي النوم

قاعد محتار

بين كرسي مكتبي

وسلالم مكتبتي

اللي بطلعها ادوار

وبعدي من بين صفحاتها

فوق الأسوار

باصص على عالم تاني

فيه لسة الناس اللي بتتكلم عربي

بتعرف تختار

الشفاء في دعاء الكروان

الخل على دين خليله

والاهبل على دين بهاليله

كانت ماشربتش من نيلها

وهتكون ماشربتش من نيله

ما تبطل تمشي بحنية

ابراهة راكب على فيله

إدالنا خازوق قد الدنيا

طب ليه مش قادر يديله

اللي سرق الميا من تربتي

واللي دفن جدي برا أرضه

واللي نهش دمه هتك عرضه

واللي فقر الشعب من قرضه

وعاوزيننا نختاره برضو؟

يعني ايه اختيار؟ اه المسلسل

ممثل في دور ممثل

واحنا هنا بناكل نكسل

وفي التافهة نصدر نحفل

طول الليل ننجم نكنسل

وفي ايدنا لي المعسل

وعلى الله طريقنا السوادي

لا تسل عالهوا يا فؤادي

أنا مش فاضيلك الساعادي

وعندي مؤتمر السنادي

وبعديه انتخاباتي وتجديدي

برنامج ايه ده شعبي وحبيبي

كلمة تنفع على قد ايدي

والناس تتصور في اللجان

ونعمل كام حفلة في الميدان

ونجيب بلاك تيما ومروان

ونغني دعاء الكروان

الملك لك لك لك لك لي

الكرسي دايما يسلك لي

ومرايتي دايما تضحك لي

فرحان بثروتي وبأكلي

شكلي هجدد تاني شكلي

ولا أعلن السلطنة وارتاح

ونوفر وقت

الحلم قالي يا عبدالفتاح

ده يوم السبت

وفي ايده كان ساعة ومفتاح

وعلى راسه نحت

ركزت وانا في الحلم لقيت

ان ده تمثال

وفهمت اني كنت وبقيت

طبيب رحال

بحط ايدي عالسوسة

وبشفي الممسوس

والممسوسة

وصحيت على قرصة

ناموسة

قالتلي الملكة قابوسة

على الجوال

فعدلت عمتي على راسي

وقلت: عمتي وتاج راسي

أنا لسة أمتي محتاجة

ومفيش غير ميا في التلاجة

فلو دعتك أي حاجة

مسافة السكة

احنا في عرض

أي فكة

خديلك أرض

كشبكة

واسألي برضو

أهل مكة

هم زباين

قسمنا الدولة كباين

والشاري ييجي ويعاين

قبل ما يدفع

تسمحي هستأذن مش كتير

عندي زيارة يادوب اطير

جالي استدعاء من يائير

وارجع، ينفع؟

أسفار حتى (2): معجم العالم السابع

هملا العالم نقط فوق بعض:
هملا البحر، هملا الأرض
لغتي: حرية مش فرض
بلدي: مشاركة مش طرد
هتكلم بالطول والعرض
واملا كتب
ويقولوا ده بنى عالم سابع
شوما حتب
عالم مش تابع، مش متسارع
عالم مش مهدوم، مش واقع
عالم نافع:
فيه كلمة بتفيد كلمات
وتفيد عيشة
مفيهوش ناس ماسكة الفيشة
بتقطع وتمن
عالم: غير عالم الإنسان والجن
المسكون بشيطان اليورو والين
عالم مفيهوش حلم بعيد
عالم كله جديد في جديد
مفيهوش تقليد ولا منافسة
عالم من غير نكبة ونكسة
وقصص باكسة
بتلغي الإبداع
كونه بدعة
وتقول أعجاز
ستة تسعة
عالم كل شجراته فرعة
من غير مناشير
عالم، كل محيطاته ترعة
من غير تأشير
كل ألوانه جوة الاسكتش
وتحت التوقيع:
عالم H

أسفار حتى (٣): أبواب الزمن

صوتك عالي

صرخ في الحلم

دمعك عالي

عيط في الفيلم

انت غزالي

هربان من الموت

مش هتشوفه

أسرع من الصوت

على طول خايف

من اللي مجاش

على طول ندمان

على اللي اتعاش

ويضيع الآن

مابين زمنين

مالك يا شومان

افتح العين

وافتح الباب

مش هتهرب

من الأسباب

مش هتشبع

من الألعاب

مش هيقعدوا

كل الاصحاب

ادي ايات

أولي الألباب

ده اللي بقصده

وبنتوي

أي شيء جالك

عيشه أوي

وماتسألنيش مالك

يا حمزة

الحياة قصيرة

هي خمسة

الحياة اقصر

من قصيدتي

الحياة أشعر

من لغاتي

الحياة اغلي

من اللي راح

الحياة احلى

من الآتي

وانا لسة بقول

في يومياتي

شاعر مقتول

ألف مرة

كل اما يزول

يقوم يكتب

فيحول حزنه

لمسرة

افتح الباب

لسة برة

أيادي كتير

ماسلمتش

احلام النوم

تمحيها سهرة

وأحلام اليوم

ماستسلمتش!

أسفار حتى (١): التداعي الحر للوراء

كان قلبي مايل داب وانهمك

كان عقلي شايل أسفار شتى

لو انت شاعر فين مرسمك

انا في المعارك شايل أتة

ارسمني نازل بشرب سمك

أو عندي مدبح بفطر فتة

وانا لما انام ممكن أحلمك

وانا لما بحلم بسرح حتى

ارجع بضهري اوقع كوكب

افرد دراعي اضرب قمرين

افتح عينيا على نهر سحلب

ينبع يصب ما بين حجرين

والدخنة جابت اخر الدنيا

نام من شرها أهل نبتون

بس احنا دماغنا ألامونيا

فوقنا على جبنة وجبنا ليبتون

وأم كلثوم صوتها يلعلع

ما بين بلوتو وعطارد

وانا مع الأديب الألمع

عدى علينا ابن الفارض:

شربنا على ذكر الحبيب مدامة

سكرنا بها من قبل أن يخلق الكرم

لها البدر كأس وهي شمس يديرها

هلال وكم يبدو إذا مزجت نجم

لن أفشي السر، سأنفجر بدلاً من ذلك

ذات يوم حملت سرا. كان سرا صغيرا لم يتطلب بئرا لحفظه، ولا لسانا جافا لإمساكه. كان سرا صغيرا في حجم بذرة رمتها يد القدر في قلبي. غفلت عنها فنمت، تجاهلتها فأزهرت، أنكرتها فأثمرت، شغلت عنها فأينعت، صرت حجراً فصارت شجرة، وكبرت حتى ضاق قلبي عن الإحاطة بها، كلمة طيبة أصلها ثابت في قلبي، وفرعها في سماء الغيب.

حملت سرا صغيرا، وعندما تضاعف قررت أن أفشيه. سأفشي السر. سأمسك هاتفي لأفشي، طرحت الهاتف أرضاً، ونزلت جواره: الرياضة مهمة للجسد، لعبت ٥٠ ضغط، ثم قمت لممارسة بعض الإحماء.. لم أكتفي، نزلت إلى الصالة الرياضية في شارعي، جددت الاشتراك السنوي، حاولت الهروب من المدرب الذي لم يراني منذ ثمانية أشهر، فشلت، رآني، سألتزم بكل ما قال بالتأكيد، أنهيت جولتي بين الآلات والأجساد، جففت العرق، وتمنيت الغرق، غرقت بعدها في النوم، حلمت، ثم ذهبت في الغيب.

استيقظت صباح اليوم التالي، جسدي منتعش، ذهني رائق، السر يلمع في مقدمة رأسي، ويتردد في الغرفة صوت الحديث بيني وبين نفسي، سأمسك هاتفي لأفشي. هناك ١٥ رسالة غير مقروءة، وسبعة إشعارات، ومكالمتين فائتتين. اليوم ليس يوماً مناسبا للتفاعل. سأكتب مقالا عن آفة العصر، أو عن موت الأمل في مصر. تراودني الرغبة في الكتابة كثيراً. لابد أن أستعيد طاقتي وحماسي: أولاً سأبحث عن شيء آكله، فمنذ صحوت وأنا على السرير، فلابد أن أتخذ الخطوة الأولى إلى الشبشب، ثانياً، سأبحث عن مكان ملائم للكتابة، وأنا لا أقبل بأنصاف المعايير: فتحت ورقة وكتبت معايير المكان، ثم انشغلت في حصر الأماكن القريبة والبعيدة التي تناسب مهمتي، ثم ضيقت نطاق الاختيار لتصبح المنافسة بين أربعة أماكن، أذن الظهر وبلغني التعب، سأستشير أحد الأصدقاء لمساعدتي في الاختيار بين المربع الذهبي. اتصلت بأول من جاء ببالي، وجدت رقمه مغلقا. لماذا أغلق صديقي هاتفه؟ إنها أول مرة أتصل به لأجد هاتفه مغلقا.. لابد أن هناك شيء ما، سأذهب إليه. ارتديت ملابسي ونزلت إلى السيارة لأجدها بلا بنزين، ثم عزمت على تفويلها لتفاجئني المحفظة بعدم وجود كاش. ذهبت إلى ماكينة السحب لتظهر لي رسالة بتجاوز البطاقة تاريخ التجديد، وعدم إمكانية السحب، مما يعني أنني: لن أفول، لن أذهب إلى صديقي، لن أنزل للكتابة في أحد أماكن المربع الذهبي، ولن آكل.. سأفشي السر!

قد تموت الآن، لكنك لن تموت وحدك

قد تموت الآن، لكنك لن تموت وحدك كما عشت، ستموت معك كل الكلمات التي لم تقولها، كل الحب الذي لم تعبر عنه، كل القصائد التي زارت رأسك ولم تكتبها، كل العوالم التي بناها خيالك ولم تستقر على أرض، كل الأحلام بوطن أقل قسوة وأكثر تعبيراً عن قاطنيه، كل الهتافات التي احتفظنا بها لثورة جديدة تعدل ما شيدناه وقلبته العاصفة، كل الأبحاث التي كتبناها في المستقبل لرفعة هذا البلد وسعادة الأجيال التي خلفناها بعدنا، كل النقاشات التي لم تدور والحفلات التي لم نحضر واللحظات التي لم نقتنص.

لماذا نقول كل ذلك؟ سأذكرك كي لا تنسى، لكنك ستُنسى بالتأكيد، لأنك عشت وحدك، وقد تموت الآن، لكنك لن تموت وحدك كما عشت، ستموت معك كل تطلعاتك الوظيفية في عالم التنافس، سيموت معك طموحك العلمي ومكانتك الأدبية، سيموت معك زواجك ممن تحب وأطفالك الذين سيعيدون شغفك للحياة، ستموت معك علاقاتك الاجتماعية التي لم تستطع إنقاذها، والأسفار التي لم تحضر حقائبها، والأكلات التي لم تجربها، والضحكات التي تبادلتها في جلسات صافية لم يحضرها سوى أصدقائك والقمر والهواء وصوت الست والبال الهادئ، ستموت معك كل التجارب الاستثنائية؛ لم يسعفك الوقت للحاق بحياة الجبل، لم تنم في الواحة، لم تعش في الجزيرة، لم تلف العالم على ظهر سفينة، لم تحجز مقعدك مع الناجين إلى المريخ، لم تقابل نبي مجهول، لم تشهد النيرفانا، لم تقبل نيرفانا أو أمل، لم تفقد الأمل وتحمل السلاح في وجه الدول، لم تتوحد مع الآلة وتصبح جزءًا من الماتريكس فتصبح تائها غير عارف ما الواقع وما المصفوفة، لم تعبر الثقب الأسود وتقبض الزمن، لم يحملك نوح ولم يحاورك المسيح ولم يصحبك محمد، أعتذر لمحمود العسيلي، لست استثنائي، أنت واحد من ٧.٧ مليار إنسان، يعيشون الآن فوق كوكب الأرض، وسيمكثون داخله بعد قرن، وسيموت معهم كل صخب في حياتهم، كل غضب يكنونه لحكام اليوم، سيستبدل هذا الغضب بغضب جديد يحمله أولادهم وأحفادهم لحكام آخرين لم يولدوا بعد، بعضهم لن يخيب ظن التاريخ فيفسد فيها ويسفك الدماء، والبعض الآخر سيصبح في الأرض خليفة، ويترك ما ينفع الناس فيمكث في الأرض، وحينها سنعرف ما لا يموت: كل ما يبذر فيزهر فيثمر، وفي ذلك يستوي الشجر والعمل الصالح والعلم النافع والحب والحلم. سأحرص على ترك بذوري في كل ميدان، فقد أموت الآن، لكن سيعيش الأثر.

عزائي أنني حاولت

كم تمنيت أن أكون أكثر انسجاماً مع من حولي، أسرع تقبلا للتغيرات الصادمة، أوسع أفقا في فهم أبعاد الحياة، أقل غضبا حين أعتقد أن شيئا مس كرامتي، أوثق اتصالا مع من أحببتهم وفرقتنا الدروب، أقدر اتساقا مع سياقات حملتني ولم أحملها، أعمق اجتهادا في فهم ما أريد، أقل تشتتا في كل اتجاه، أنبه في إبراز المبدع الجميل داخلي، أقدر على وصل حبال الود، أظهر في كل احتمالات اللقاء، أوضح في إيصال نفسي لمن دونها، أقل عجزا عن رؤية صورتي في أعين البعض، وأعلى صوتاً لفتح أعين البعض الآخر، أخف كرها للأشياء وعكسها فلا أعرف أين ينبغي أن اقف، أقرب من الأشياء كلها لأعرف أنني ما كان لي أن أخف، أخف شعوراً بالسيء، أبعد تفكيرا عن العسير، أزهد بالقليل عن الكثير، أمهر في نسيان الأذى، أحسب خيراً للإفك، أكثر انفتاحاً للتجربة، أيسر حديثاً، أصدق نية، أطيب ذكرى، أكثر مساعدة، أقوى تأثيرا، أشد حبا، أقوم قيلا. لم أنجح، لكن عزائي أنني حاولت...

وسأظل أحاول.

سفر الدخول (4): اذهبا

هسيبكم هنا

لا تخافا

مش هبعد مسافة

لا تخافا

ولا هحارب في يافا

لا تخافا

هجبلكم كنافة

لا تخافا

إنني معكما

أسمع وأرى

بطلع للسما

وانزل قنطرة

لو كتروا السكاكين

بنشد عنترة

السكينة تلمة

السكينة تلمع

ايه معنى الكلمة

من غير ودن تسمع

من غير نن قرا

من غير أنف شم

هو احنا بنرجع ورا؟

هي دي ريحة دم؟

هي دي أفكار عشوائي؟

هي دي صورة قنا؟

وده أشرف عبدالباقي؟

ايه اللي جابه هنا؟

عموماً هسيبكم معاه

هسبيبكم هنا

لا تخافا

معايا عصير جوافة

يسندي في رحلتي

كل يوم في راسي

وكل اما اتعب

اقعد عالكراسي

وكل اما ألعب

تخدعني حواسي

أشوف السما زرقا

والشجر أخضر

أصيف عالمحيط

مش البحر الأحمر

وأشوف الناس سعيدة

واشوف الناس صحاب

كل الأحزان بعيدة

كل الشرور سراب

والحكومة للشعب

عشان تحلم وتحقق

والحياة فيها لعب

وفيها جد ومبدأ

واللي في طبعه الكذب

عمره ما هيتصدق

ولما حواسي تغيب

أحط قلبي في اوضة

واحط عقلي في روضة

وأنيمهم خلافا

لا تخافا

مش هبعد مسافة

لا تخافا

ولا هعلن خلافة

نفسي أعلن حي

اللي رايحة فيه

مش خايفة من اللي جي

نعرف نتكلم سوا

قبل ما نتكلم "I"

نقدر نتنفس هوا

وبعدين نأسس دبي

ويكون قدوتنا لوثر

مش أبو عدي

ونلغي الكتافة

لا تخافا

مش هبعد مسافة

لا تخافا..

قبل نونٍ كافًا

سفر الدخول (3): ما وقع من الأرض على السماء

هلعب لعبة فيها لعبتين
شطرنج وعليه طاولتين
كل طاولة فيها زهرتين
كل زهرة مفيهاش اتنين
وفيها من واحد لسبعة
وانا واحد تعب من المتابعة
الحاجات كتيرة وورا بعض
وانا ماشي بوقعها عالأرض
وانزل اجيبها وامشي وأوقع
على خط مرسوم بس مرقع
والشمس تلسعني بس بسقع
وأقع من طولي بس أسمع
يا قصيدة طولي يا قصيدة اقصري
انا ماشي بذرع الجبل الطري
وكل مامشي خطوة رجلي تغرز
وكل مابص فوق عيني تغمز
يا شمس استني مش بعاكس
طردوني الكرد والشراكس
ومشيت بلا هدى بوصلتي الجبل
كل ما قوتي تخور امسك الأمل
خايف امسكه جامد يفرقع
يطلعلي من الجحور ألف بردع
وانا متشتت مش بعرف اجمع
وأقع من طولي بس أسمع
يا قصيدة قولي يا قصيدة استني
الأحلى من الكلام انك تغني
يوصل للعالم أصل فني
ولما اموت الناس يحكوا عني
ويقولوا ده حاول وده الشرف
ويقولوا ده جاهل صلى للعلم
ويقولوا ده مجهول جاي من طرف
كومبارس العسكري اللي في الفيلم
وكتب ألغاز يشوفها يبتسم
لما الحزين يضحك مين أوسم؟
وكل ما يحل لغز يتقسم
والناس ينسوا تاني: مين هيثم؟
وانا فوق كل ما اضحك ادمع
ودموعي تروي قمح يملا مصنع
واحاول القط شبكة مش مجمع
فأقع من برجي بس أسمع
برغم عرجي

وجسمي الهالك
ياللي هجرتي الملاك،

الشيطان جالك
بصي لنجوم البروج،

هو ده فالك
أنا اللي ساكن عقلك،

مش أنا المالك

سفر الدخول (2): الامتداد

 

هفضل اكتب
ولو محدش قرا
هجري واسبق
ولو محدش ورا
الحياة مكنتش واضحة كفاية
مين شرب كل اللي في الكوباية
مابقاش يلبس مقاس المثل
فافتكر غضبت عليه الأمثال
وانكفى يلحس أواني العسل
فتشابهت على أعينه الأخيال
لما دخل من باب مالوش مفتاح
وافتكر إنه خلاص ارتاح
لكن الموت كان مجرد حالة
وابن آدم روحه رحالة
بين الحواس والإنغماس والغفلة
بين العيون الطافية والآفاق القافلة
مالقاش غير دنيا الجمال تكفيه
النور غذاؤه والأمال تشفيه
واليأس داؤه والخنوع مش فيه
بعد البلاد دي فيه بلاد تتعاش
بعد الهموم دي فيه فرح ببلاش
بعد الزمن ده فيه زمن أوسع
استنوا عاوز أشوف وعاوز أسمع
بعد التماع العيون مفيش ألمع
وعلى امتداد الخيال مفيش مسطرة:
هفضل اكتب ولو محدش قرا
هجري واسبق ولو محدش ورا

سفر الدخول (1): لعلي أبلغ الأسباب

 

بتهربوا ليه يا حروف
استنوا عاوز اشوف
افكاري مكتوبة
يا ترى هكتب تاني؟
سنين ولا ثواني؟
الدنيا أكذوبة
تعالى نلعب لعبة
الورقة والطوبة
بوم تك طخ
قصيت كل دفاترك
يا وحيد ملكش أخ
طخ بوم تِك
زحلقت كل عمايرك
يا شريد ملكش مِلك
تك طخ بوم
كسرت كل وسايلك
يا قعيد القتلة جُم
تعالى اقعد عالكنبة
واتمدد واسترخى
تعبان اجبلك لحاف؟
جعان تاكل فرخة؟
انا عارف انك بتخاف
هفتحلك نور الصالة
وعشان تحلم بالحب
بالليل نسمع أصالة
ونولع شاي ونصب
بس ماتحلمش كتير
وإوعى تسيب بقع
وإياك تحلم تطير
فبدل ما تقوم تقع
وأنا لو عندي سرير
كان السرير نفع
تعالى اطلع عالحلبة
هضربك بدل الملل
هضربك ضربة خفيفة
مش ضربة تجيب الشلل
وانا طول الليلة هضرب
وانت هتستحمل.. جبل!
ازاي هتفكر تهرب
وانت في قلبك أمل؟
زهقت من الألعاب؟
تعالى نفتح كتاب
ونقرا لشاعر غابر
آثم كل ما تاب
دخل الخيال العابر
واختفت الأبواب!
فظل تايه صحاري
وضربته شمس العصاري
وقع في بير الشعرا
لمس من أثر الرسول
والتقى موسى السحرا
ويوسف ابن النبي
في بطن حوت الخضر
على أرض توت عن مصر
كل اما يغرق يعلا سبب
من بير تشعب أو صرح انتصب
الحكمة في الإيمان وفي روح الكتب
والمجد للإنسان
عابد لا معبود
المجد للإنسان
حر لا محدود
المجد للإنسان
ولوجه الله الخلود
وكل شيء بيطوف
ولا شيء موجود
بتهربوا ليه يا حروف
استنوا.. 
عاوز اشوف

أربعة أضلاع تطل على القاهرة

 

الأشياء ليست كما تبدو عليه - تصوير: هيثم، القاهرة يونيو 2022

جزء من سكان القاهرة الكبرى بيشارك في سباق جماعي على المحور والدائري كل يوم الصبح وبعد العصر، بيحتمل كل أنواع المنافسة والسباب والموت المحتمل، وبيرجعوا آخر اليوم يتوزعوا على قهاوي الشوارع ينفخوا الهم مع الدخان، ويكركروا الضحك مع الشيشة

وجزء من الشباب استجاب، وفكر في باب جديد يفتحه ، فواحد نط من الشباك، وواحد اتعلق في الأسلاك، وواحد مشيت فيه الأشواك، وواحد عام مع الأسماك، وواحد حاول يتصرف: دور المفتاح في الفيشة

وإنسان القاهرة اجتماعي، بياخد من النمل صرخته، وياخد من النحل قرصته، وياخد من الكلب دهشته، وياخد من القط ثورته، وياخد من الحصان غضبه، وياخد من الحمار طربه، وياخد من الخروف صدمته، وياخد من النعام ثروته، ومن البغبغان صوته، وياخد من الحمام ريشة

ودنيا القاهرة فتنة، تزين عالبحور أسوار، وتزرع طوب بدل أشجار، وفي السما زينة الكواكب، وعلى الأرض زينة المواكب، وزينة للحاضر ستاير الذكريات، وزينة للدولة القانون وسط الجميع، شوية فوقه وشوية تحته، مفيش فنان بيكفر بنحته، على الكتف ملكين، وعلى اللسان مليون، وعلى الجنيه فرعون، وعلى العيون بيشة

رجعٌ بعيد (3) : مثل الحياة الدنيا

انا مابجوعش

ولا بعطش
مابقربش
ولا بطفش
ومابسمعش
ولا أطرش
جربت كل الكراسي
العيب مش في الخشب
وحاولت اهوي راسي
الحريق نشب
ففاديته بكُرّاسي
واللي اتحرق اتكتب
فنزلت من السلالم
بجري في وجعي
سبت قصوري
وبيوت الشعر تبعي
ولما جفت بحوري
اتبج سجعي
ورجعت بيري، عبيري
ورجعت نبعي
قابلت جني وأميري
وقابلت سبعي
وحكيتله كل الملاحم
اللي في خيالي
كل الأغاني
اللي دارت بيها الليالي
كل الثواني
والدهور
والأمالي
اللي بترجعني اثور
وأشد عودي
وأطلع لفوق من جذور
أصلي وجدودي
عند السحاب
وابلغ الأسباب
وانا عندي باب
طوله ألف كتاب
في كل صفحة
أربعين كوباية
في كل واحدة
نصها المليان
فيه كل آية
حملها الإنسان
على كل ذرة
ضلعين وأربع مرايا
الدنيا برة
والحياة جوايا!

رجعٌ بعيد (2) : الحساب

انا مابجوعش

ولا بعطش

مابقربش
ولا بطفش
بيتي ازاز
وانا شوكي
كل ما بدخل بجرح
كل ما بدخل بسرح
واللي ورايا بيقع
كله يسيب بصمات
انا ليه بسيب بقع؟
اللي ورايا اتكسر
اتمنى محدش سمع
وانا قدامي كتير
اكتر من اللي يتجمع
ليه يا فيثاغورث ماسكني
بقوانين الحساب
اكمني مابعرفش امسك
وبيبقع لو ساب
الناس يا فيثا ذكية
سابوا قوانين الجمع
وقروا طبقات السمع
وعشان يفادوا الدمع
اخترعوا الألعاب

رجعٌ بعيد (1) : الدواء

انا مابجوعش

ولا بعطش
مابقربش
ولا بطفش
حافظ ركني
في الدايرة
بين ناس موهومة
وناس ثايرة
مثلي البومة
واقفة هناك
مش مفهومة
تستناك
تنساها
وفي السماعة
بتقول ثومة
انا انساك؟
اه هتنساه
وهتنساني
وانا هنساها
ونبقى رفاق
في النسيان
هذا دواء
للإنسان