أنا كل ما بكبر بفهم
إن انا مش فاهم خالص
ولا شئ يدعو للفهم
والعمر كمان للعِلم
كل امّا بيكبر ناقص
, وبشرُق من مغربي
بصيت من فوق للدنيا
ولقيت للكل زوال
بيلف الكل فـ كورة
إلحق إلقطلك صورة !
عمر ما هيدوم الحال .
- من فوق غلاف كوكبي
اتقابلوا ازاي معرفش
فـ زيادِة علمي و جهلي
والموت من فوق العرش
ياخد أرواح الخلق
وفـ مرة هياخد أهلي
, وساعات أعمى أو غبي!
وفـ مرة من المرات
مدّيت رجلي للجنة
ولساني قالّي استنا
فوقعت فـ شر ذنوبي
وانا ماشي على الصراط
, لكن شفعلي النبي
أنا كل ما بكبر بفهم
إن انا غفوة من الثانية
والفهم فـ ذاته قُليِّل
وخيالي هيفضل عيَّل
والدنيا هتفضل فانية
, والعين .. سجني ومهربي!
