أسرَح
حَبّة
في المَلحَمة
وأفتَح
أول
غيث
مـ السما
و القى المطرة حروف وكلام
و اسكُت في وجود الأحلام
و ابدأ ألملم فوق أشواقي
و اقعُد اعيد ترتيب الآية
وبَحِب السِحر العشوائي
لما بيحكي أي حكاية :
لوحات جوة كتاب العُمر
باب السَعد :
يحضَرلَك من غير مواعيد
مش محتاج أفراح ولا عيد
ولا محتاج أفكار أو مال
ولا محتاج تذويق وِجَمال
ولا بيجيلَك لمّا تعوز
كُنت صغيّر ولّا عجوز
كُنت بتِصرِف أو غَلبان
يِحضَرلَك من غير حُسبان
باب الشوق :
فَصل الحيرة :
صفحة 203 - (ز)
والعِشق بيتشاف في العين
يِخلق حالة من التَوَهان
أو نوع من أنواع السِحر
هَتشوف عَند عنيها البَحر
والغَرقان مش سَهل يعيش
إلا بأمر ملاك الروح
والقَلقان مـ الفِكرة بيهرب
عند حدود طيفها المتكَهرَب
ويدوبوا فـ دوّامة الشوق
وارجَع اهيم في السما من فوق
باب الصُحبة :
فَصل دوام وشحوب الوِد :
عارف الحَبل ؟
إنتا تشِد وهوَّ يشِد ؟
نَفس الفكرة
كُل ما تربُط نَفسَك أكتر
كُل ما صعب تسيب الحَبل
لو ناوي - سيبُه من قَبل
انا عارف - الظَرف أشد
لَكِن ده اللي بيحكُم برضَك ..
إنتا مُزيّف ولّا بجد ؟
فَصل أوائل أي علاقة :
واختلفت أقوال الناس
ناس بتاخُدها مع الإحساس
ناس تفتح قلبها عالآخر
ناس تقفل قلبها مـ الأول
ناس تتحول
ناس تتحَب
ناس تحجز أحلام القَلب
ناس بتقول إنَك "ميمنتي"
من يومها محودتِش سَنتي
وانتا أخَدت الكون دوران
بكتِبلَك زي السكران
وهبوّظ أشعاري لأجلك
مبقتش بتحكيلي مشاكلك
وانتا الأخ القائد قَلبي
وانتا الأخ الفارس حربي
وانتا الأخ الساير دَربي
وانا من بير أحزانَك - فاكر ؟
يوماً كُنتُ الأخ الرائع
قَد جَلَبَت أشعاري الروعة
من أزهارَك
ولَقَد صِرتُ الأخ الضائع
قَد نضَبَت أحبار اللوعة
من أنهارَك
وانتا الباقي - مهما يكون
مهما يصرَّخ بينّا سكون
مهما يباعد بينّا الكون
هفضل أدندن شِعرَك ليّا
وانتا الشاعر من قَبليّا
وافضل اقول "من مصر لسوريا"
وافضل أدور بكعوبي الدُنيا
يا سائل عرّافتَك عنّي
أنا مُمتَن لقلمي وفنّي
أنا مُمتَن لتلك الحادثة
تلك الرسمة فـ رَحب كلامك
تِلك البَسمة فـ قلب سلامك
تِلك الضلمة - لون أحلامك
ما هي إلا لون الكون
عَدَم اللون = كُل اللون
إسرح جوة الصورة السودا
وإرسِم باب .. فاكر الباب ؟
الباب الساحِر أوصافه
زور البَحر وخَد أصدافُه
وإملا الجو دُرر وكلام
أنا سارح في الكون قُدَّام ..
باب الظُلم :
فَصل الصَبر :
عِد آيات المُصحف واقرا
معنى الصَبر
إيه يستنى ظُلم الظالم
بعد القَبر
إنتا الباقي وهُمّا المَسخ
هُمّا الشخبطة وانتا النَسخ
هُمّا الحَرب , واحنا الشَعب
هما الموت , واحنا القَلب
مهما هيقتل مش راح يقتل ألف لسان
مهما تكون للذئب سنان
عُمر الذئب ما يُحكُم أرض
الذئب بيشبع ويجوع
مهما الشَعب يكون موجوع
برضو الشعب
والشعب بيكسب في الآخر
ولا هيلِد كلام الساحِر
ولا هيشيل على راسُه عساكر
مهما هيملوا الأرض كلاب
يِظهَر في المشهد من فوق
مليون نِجمة وشَهب , ولاب
باب الخِتم :
هذا وقَد أرسلتُ سلام
عالأحلام
اللي تزور الروح وتقيدها
برّة الشوف اللي مقيّدها
زي السِحر
زي الوردة تزورها المطرة من على بُعد
زي الوَصل - بَعد البُعد
هذا وقَد
لَن أنقَضّ
عالعُمر وتفاصيل الزَحمة
عالصُحبة والحُب البِكر
عالمَسجِد وصفوف الذِكر
عالإسراف في طَلَب الرحمة
هذا وقَد قرر مولاه
كاتب , الصَفَحات أعلاه
إنه هيجري بطول الوقت
وعرض الكون
إنه يعيش الدُنيا بروحه
مهما تكون
إنه يلبّي آيات سَمَواتُه
يسعى للنصر فـ غَزَواته
يِتكلم في حدود الدود
يِكتِب لو جالُه الإلهام
جوة المطرة حروف وكلام
يسكُت في وجود الأحلام
هذا وقَد أرسلتُ سَلام
ليست هناك تعليقات:
إرسال تعليق