نقضي -
نحنُ
لجنة دحض ودرء السوء -
إنك مش كاتب أشعار
وإنك شاعر أهل النار
سيب الذمة
وسيب الكلمة
وسيب الحكمة لأهل الجنة
- بس استنى !
أنا متواضع
"من صدر الدنيا أنا راضع"
- متغنيش !
- مش راح أغنّي
إسأل عنّي
في كل حزين
- أسأل مين ؟
- إسأل صاحب شهم أمين
بيصون العِشرة والحُب
وإسأل أهل الشوق والحُب
- شِعرك مش بيأكل عيش
سيب الحُكم وسيب الجيش
وامشي يا نسمة مع التيار
- أنا نسمة حُرّة ومِبْتِسمة
ولا واقعة في قيود الريح
أنا نسمة ولا تقبل قسمة
بتغنّي من غير تصريح
- إوعى يا شوما تخون أفكارك
- يسقُط مُرسي وسيسي ومبارك !
- يبدو مفيش فايدة فـ أمثالك
دي الدولة اللي بتحفظ مالك
إحنا الأقدر وإحنا الأولى
وإنتا يا شو مش قد الدولة
كنت بقول :
إوعى يا شوما تخون أفكارك
وتفكّرني غريق في بحورك
قولّي يا روميو فين جمهورك ؟
- أنا غلبان ومليش جمهور
واللي فـ قلبي على لساني
هدفي الأول والتاني
أكتب كلمة , واهدم سور
- إنتا بتكتب كلمة باطل
- إنتا الباطل , آنا بناضل
- إنتا بتهدم سور في بلادك
- وإنتا بتقتل قلب ولادك
أنا بهدم من سور أمجادك
أنا أبيض على رغم سوادك
واللي فـ قلبي على لساني
شِعري حضاري وإنساني
- تجربتك مش مصدر دهشة
وقصايدك مفكوكة وهشّة
- مش عاجباك ؟ عاجبة الناس
هتجيبوا منين الإحساس
لو بيبيعوا منه جبال
كان خلّص أثره في دقيقة
أنا بفهم معمار وجَمَال
وبيوتي ثابتة ودَقيقة
- أبياتك في الوهم تصُب
إقرا كتابك : باب الحُب
- أبياتي من قلبي تطير
وتعدّي على بلاد معلومة
وجيوشي ترجع مهزومة
وحروفي تكتب أساطير
سيب الحُب , الحُب جميل
ولا ينفع يكتبه مهابيل
ولا ينفع نخلقله الحالة
سيب الحُب , الحُب محالة
وعشان كدة بندوق المُر
مُرّه عسل وعذابه يسُر
- نقضي -
نحنُ
لجنة دحض ودرء السوء -
بعد سماع أقوال الجاني
- اللي فـ قلبي على لساني
أنا جاني بحور أوزاني
- وشهود الإثبات والنفي
ومعاينة أوراق الدعوة
ببقاء الجاني بالمحبس
لا يتكلم
لا يتنفس
حتى صدور
حُكم الدور
باستمرار الحبس المُر
أو بوجوب إطلاق الحُر
باستقدام القاضي الأقدر
بعد شهور
حُفِظَ المَحضَر .
ليست هناك تعليقات:
إرسال تعليق