- هيح : تنهيدة عشان بقالي كتير مدخلتش المكان ده .. حاسس اني المفروض قبل ما اكتب حاجة انفض التراب من عالصفحة وعالتدوينات السابقة .. المهم , إزيكُم ؟ أتمنى انكم تكونوا بخير يعني - على افتراض انكُم موجودين فعلاً وانا بكلمكُم :) - ليه دايماً بنلوم عالدنيا ونقول ان هي اللي بتاخدنا من الحاجات الحلوة ؟ مش يمكن احنا السبب ؟ او احنا اللي بنديلها فرصة ؟ او بنسيبها بمزاجنا ونتلكك ؟ أياً كان .. المدونة وحشتني اوي .. وحشتني فكرة اني اكتب واعبر عن اي حاجة وفي الآخر لما اصحابي يشوفوا الكلام يعجبهم المضمون والطريقة .. اللي هو انتا مش بتكلم نفسك بصوت عالي بس .. دانتا بتكلم نفسك بصوت عالي والناس بيسمعوك ويعجبهم.
- احترت الأول اكتب التدوينة اللي هصالح بيها لوغاريتمات بالفصحى ولا بالعامية .. قلت العامية هتبقى من القلب للقلب وهاخد الحرية الأكبر في التعبير والشقلبة , وقلت الفصحى بتحسس الناس باللغة وبتحسسني بالإحتواء والدفا .. وبعيداً عن الفلسفة .. التدوينة خدت القرار من قبلي واتكتبت بالعامي .. فليكُن .
- كذا مرة حد يسألني بتكتب ازاي .. بتشرب ايه عشان تكتب الكلام ده .. بتسرح فين كدة يخربيتك ... أما بعد , فتخميناتكُم لمصادر الكتابة مش غلط أوي , وفكرة العفريت مش غلط أوي , وفكرة الشُرب مش غلط أوي .. بس القصد يعني .. ساعات الكتابة هي اللي بتجيلي وساعات انا اللي بسعى لها .. ساعات معرفش انام بسبب ان فيه أبيات شعر محشورة في دماغي ولازم تتكتب .. وساعات ابقى راجع من الكلية وارجع في الشارع جري عشان الكلام ظهر دلوقتي ! .. وساعات اكتب في الكتاب من ورا عشان الكلام ميطيرش وعشان معييش ورقة .. وساعات ابقى عايز اكتب فاحاول احط نفسي في الحالة .. اقرا كُتُب .. اشوف ناس .. اشرب حاجات سخنة تئلمني أو ساقعة تصدمني ... انا مقتنع بفكرة ان التغيير هو اللي بيخلق حالة الانبهار المطلوبة لو حد عايز إلهام في أي مجال .. حاجات كتير حلوة كتبتها لما كنت بحاول اكتب .. وحاجات كتير احلى اتكتبت من نفسها .. فانقسمت الكتابة عندي قسمين مابينهم خط مش موجود ..أولهم الجزء الأكبر منه إلهام .. وتانيهم الجزء الأكبر منه الهواية أو الممارسة أو الخبرة أو الثقافة أو أو ... المكونات الملموسة يعني في تفكير اي حد بيكتب بانتظام .
- عندي تضارب كبير أوي في مسألة الحُب ... بشوف جزء كبير من اصحابي بيحب وعايش الحالة .. بغض النظر الحالة سلبية ولا إيجابية أو ناجحة أو فاشلة أو لسة في طور التكوين ... اللي بيبهرني الحالة نفسها ... ومش بلاقيها عندي ... مفتقد الاحساس ده بشدة ... اينعم انا بحب كل الناس وبنشُر حب في كل حتة .. بس برضو لسة ملقتش الكيان اللي هيجذب كل موجات الحُب ليه هو بس .... وكمان بفكر في الموضوع ده بصورة أكثر موضوعية ومادية .. وبقول طب افرض .. وانا لسة طالب ومينفعش افكر التفكير ده غير في المرحلة اللي اقدر فيها اشيل مسئولية شخص أو أشخاص تانيين .. ومن هنا بقى ننتقل للنقطة الأكثر جدلاً في تفكيري في الموضوع كله ... فكرة الحياة الأبدية مع شخص واحد دي لسة مش مقتنع بيها .... اينعم هي احسن من النماذج اللي ممكن يتم طرحها في الإطار ده ... بس برضو ... انا صعب .. وهادي لحد الملل .. وكتير ببقى كئيب .. ازاي هستحمل واحدة تفضل معايا ما حييت ؟ معرفش .. يمكن اما اكبر شوية واحب واحدة بجد مكنش قادر على بعدها اجي افرجها عالكلام ده واضحكها على تفكيري قبل ما احبها .. يمكن :) .
- الثورة اتهزمت يوم 25 يناير 2014 .. ده في اعتقادي الضئيل يعني .. والنظام هيحكم شوية ... دول الشوية اللي انا حاطط أمل عليهم ان الشعب يفوق شوية من الخدر اللي أصابه ... إن شاء الله هنفوق كلنا وهنتوحد وهنقدر ... ألا إن نصر الله قريب .
- ليا اصحاب رغم اني ممكن اقعد شهور مشوفهمش .. بس ببقى عارف انهم مهتمين بيا وعايزين يشوفوني فعلاً .. أما بقى اللي بيريحوا ضمايرهم وفجأة بوحشهم لما اظهر في يومهم .. فدول بيبقوا واضحين أوي .. واحب اقولهم .. انا زعلان .. وزعلي وحش .
- مش عايز اعدي شهر فبراير ده من غير ما تحصل حاجات مختلفة في الحياة المملة دي .. داحنا هنقعد يجي 4 - 5 شهور في عك قسم عمارة تاني ... حرام مستغلش الأجازة صح يعني .
- بالمناسبة .. عنوان التدوينة مُقتبس من عنوان المدونة : http://ayman1970.wordpress.com .. دخلت عليها كذا مرة يعني وقريت فيها شوية , بس الكلمة علقت في دماغي .. ولقيتها مناسبة لحالة الفقر الكتابي والعاطفي اللي انا فيها .. بس , عايزين تعرفوا إيه تاني :) ؟
دُمتُم
هيثم شومان
القاهرة - فبراير 2014
ليست هناك تعليقات:
إرسال تعليق