فرّقنا أكتر يا زمن فرّق
واسرقنا تاني وبصّلي وبرّق !
انا وانتا عارف صاحبه كان ازاي
ومادمت عارف .. دمي مش هحرق
واتكبر اكتر ياللي مش همك
الثورة دي ملكك ومصر تبقا امك !!
والشعب إخوانك والحُكم كدة بالحُب
سلملي عالشاطر .. وبوس ايدين عمّك
واتمايلي أكتر ياللي عودِك فار
لانتي موسيقى ولا أنا عمّار
انا وانتي صورة في خيال مرسوم
لكنه غير معلوم في حسبة الأشعار !
واتنطط اكتر يا رئيس الحزب
داري وشوش السرقة داري الكذب
فاكر ذنوبك دي هيغفرها القفا !
فاكر أخرنا نشتمك ونسبّ !!
واتنازلي أكتر مانتي نزلانة
وحزّنا أكتر مانتي حزنانة
واحتارنا ياما في أمورِك , مصر
بتخلفينا ليه لما انتي تعبانة !!
واسقيني أكتر ياللي سطلاني
ودافعي في جلسة حكمي وبطلاني
أنا بيكي حاجة ومن غيرك مفيش
كيفك حشيش .. وتاجي سلطاني !
وتعالي نلعب طب أميرة ووحش
ياللي في حُبك قالوا عني "جحش"
قالوا كلام تاني ماينطقوا لساني
بدرس في حُبك لكن مبنجحش !
وحطّى تاني ملو كلامي نجوم
ياللي انتي بحر والغريق بيعوم
ياللي في وصفك ختّ كورس لُغات
ياللي في عينك تنّي دايس "زووم"
مليني أكتر يا رفيق الجن
علّيني تاني وقول فـ شعر و زِنّ
وإديني بيتك لو في يوم احتجت
وإديني قلبك لمّا قلبي يحِن !
جامع مابين اتنين - سفالة وأدب !
بوصف غزالة , وبرضو بوصف شنب !
واتكبّر أكتر ياللي انتا متكبّر
هكتب ولكن مش هوضّح سبب !
ليست هناك تعليقات:
إرسال تعليق