أفكاري بيجوني
وانا جوة أو برة
والحاجة تدعوني
أكتب كمان مرة !
والحاجة دي هي
من بين كتير حاجات
فهعِد من مية
حتى سبع عدّات
وهعِد من تاني
لما يجيني كلام
وهعِد لو جاني
أو لو تركني قوام
والحاجة دي ثورة
بكلام ملوش آخر
هنعيده ميت مرّة
لن ينطفئ ثائر
لن تنقشع غمّة
من فوق هذا الشعب
لن تنقلع عمّة
ولن يُكفّر ذنب
إلا بصوت الهتاف
إلا بثورة وقصاص
إلا بصوت مش يخاف
من ضرب غاز أو رصاص
وأكتب كمان حتة
عن حاجة مش حاجتين
فهعد من ستة
وأوصل لحد اتنين !
فوصلت أو لأ
فأديني ماشي ف مسار
راح اشتغل سقا
واتعشا في أي دار
والحاجة دي واحدة
في عنيها هكتب ديوان
والواحدة دي عاقدة
في عروقي عُقد وعيدان
والعُقد ده علقته
على قلبي من جوه
والقلب ده أخدته
وياريتني أنا هوَ
والحاجة تبقا سفينة
بتشيل في روحي وتحُط
والحاجة تبقا مدينة
والقلب سكران يعُط
والحاجة ناقصة تمّلي
محتاجة حاجة معاها
والحاجة دية تخلي
التانية تخلص فداها
لو رُحت مرة سألت
عن حاجة كانت زمان
عايزاك لكنك قفلت
هتلاقي فات الأوان ..
ليست هناك تعليقات:
إرسال تعليق