الدُنيا دي كئيبة جابتلي العدوى
قُلت انزل احضر حفلة واحضر ندوة
لَكن مساعي الفرح ملهاش جدوي
وتاخُدني في الدايرة معاها شهور
وافضل ألِف وألِف جوة الساقية
أطلع في جنّة وانكفي على داهية
الدايرة مقفولة ولا مُتناهية
كل الحاجات هتحسّها بالدور
قالوا عليا أديب وقالوا مُثَقَّف
ناس تنتشي وتصرخ وناس بتسَقَّف
أنا حلمي عالي بس مش متسَقَّف
السَقف معمول للي ضد النور
الدُنيا نصّابة بتشرب فنّي
أستنى ييجي الليل وأفضل أغنّي
و..من يومين كانت بتسأل عنّي
والوزن بيبدّل عذاب وسرور
...
يجي الكلام جوة وبرة البيت
- هتحس إحساسي ده لو حبّيت -
افتح واسمّي الله واقول كام بيت
واحتار أخلّي القافية والأوزان
علشان تكون شاعر , لازملك قافية
قافية تلين أو تتكتب بالعافية
قافية تطير جوة القلوب الدافية
, قافية خَشِب لو موسكي كان , أو زان
أيام ادوق الحُب بالمعلقة
طوق الحمام بيريّحُه لو لقى
لكن أنا بَتعَب من الشَعلَقة
واسرح مع البطّان أو الأوزان
أوقات بييجي اليوم وعصرُه الأمَرّ
واستني الاقي الحّر عدّى ومَر
ويروق حشايا لو يشوف القَمَر
معدتش تفرق اكتمل أو زان
...
بصحى على وشي أمل وابتسام
وأقول نهاري أعيش وليلي أنام
لَكنّ عيبي إني بزهق قوام
لما يزيد مللي أقول يا ليل
وساعات احِنلها واقول يانهار
قبل امّا قلبي ينكوي ويَنهار
وتسيل دموعي عالخدود أنهار
وأدوب وادوق في العشق طعم الويل
توحشني وابقى هجِن مـ التفكير
وتقولّي : خير ؟ , وإزاي هييجي الخير !
لكنّي طول الوقت عَكس السير
ظلِّك على قلبي يساوي الميل
الدُنيا دي قريبة وانا بعيد
كانت قديمة وكُنت انا جديد
مبقتش تفرق نكسة من عيد
والرّب قدّر للعباد في الشيل
...
أحمالها تيجي قد وسع النفس
وأقول لنفسي لا حياة في اليأس
واملا الحياة بهجة وأفرح ، بس
تكرارها – حتى الفرحة – بيزهّق
وأقول خلاص علشان عَدَلنا المسار
الشعب ثار وإتخان وكمّل وثار
وأبص الاقي أصدقاء الحمار
وبعزم مافي كل منهم ، ينهّق
اللي عارفني عارف إني جَد
قالّي صديقي مش هتعرف حد
لازم تلين حبة وتهِد السَد
لازم تقول وتروح وتيجي وتهأهأ
الدُنيا نصّابة بتشرَب حقّي
بشرب عشان انسَى الوجود المرئي
طول ليلي أشرب وافضل اشرب واسْقي
واشرب لحد ما تسطليني وأشْرَق !
ليست هناك تعليقات:
إرسال تعليق