- What's on your mind?
- ايه ؟!
- What's on your mind?
- مفيش !
- What's on your mind?
- ده انتَ مصمم بقى .. هو انا بفكر حالياً في اليوم اللي بيضيع ده .. بس بحاول أغير مسار نهايته الروتينية بإنه يذهب جفاءً .. يوم الجمعة طويل جدا ولازم نعمل حسابنا على توفير وقت في أيام الأسبوع للتفكير في كيفية استغلال يوم الجمعة.
- What's on your mind?
- بقالي مدة عايز اكتب حاجة حلوة .. أصلاً زهقت من الحاجات الحلوة اللي بكتبها .. عايز اغيّر في الأساس نفسه .. بفكر أهد كل حاجة واعيد الكرة من الأول خالص .. بس ده هيكلفني كتير جداً .. وبعدين قلت ممكن أعيدها من غير ما أهد اصلاً.
- What's on your mind?
- مش عارف كان قصدها ترد عليا كدة ولا لأ .. يمكن كانت متضايقة في اللحظة دي ؟ طب وهي بتبقى متضايقة كل ما اجي اسلم عليها .. صدفة يعني ؟ لأ .. فيه حاجة .. خلاص انا كمان هعاملها وحش .. يابني استنا .. دي قالت قبل كدة انك مهم عندها وبتاع .. متبقاش متسرع وغبي كدة .. مش بحب اقدر حد وارفعه والاقي منه العكس .. معلش , طب اصبر حتى شوف ايه الجو في الفترة الجاية .. وانا بإيدي إيه غير الصبر؟ حاضر.
- What's on your mind?
- أنا بقيت عصبي جداً .. عصبي وجافي بطريقة مستفزة .. كتير بكلمهم وحش في البيت وبنزل وانا عايز اضرب نفسي بالجزمة عالطريقة دي .. انا مكنتش كدة .. هما مستحملينّي ازاي؟ لأ , ومع اصحابي كمان .. مبقتش مهتم زي الأول .. زي ما تقول مابقتش فارقة .. تكلم حد .. متكلموش .. تخرج .. تضحك .. كله عندي بقى سواء .. مش عارف ده حلو ولا وحش .. ولا عارف انا هفضل عالحالة دي كتير ولا لأ .. بس عارف إني أكيد حاجات فيا اتغيرت للأوحش .. لازم أكوّن جبهة تقاوم الإسلوب ده .. جبهة الأخلاق .. جبهة حلاوة الروح .. جبهة الضمير ..... أنا قلت جبهة الضمير؟ -آه ..-اللي بعده.
- What's on your mind?
- مش عارف علامة الاستفهام ليه مديا ضهرها للسؤال كدة ؟ هي باينة عندكو زي ما باينة عندي ؟ .... الله .. حلو إحساس إن الكون ممكن يتشاف بمليون عين مختلفة ألوانها .. ومليون زاوية مختلفة أماكنها .. عشان كدة انا بشوف الحاجة بطريقة غير اللي قدامي مباشرةً بيشوفها بيها .. عشان كدة بتأثر بحاجات ممكن تكون عادي جداً بالنسبة لك و" إيه الهبل اللي انا فيه ده! " .. الاختلاف.
- What's on your mind?
- ناس كتير بتتغير معايا .. وانا كمان بتغير مع ناس كتير.
- What's on your mind?
- لما بحب حد ببقى فعلاً نفسي اعرفه .. بس.
, عندي إحساس مُلِح إني بتفهم غلط كتير .. كتير جداً
, اللي قريب مني اوي هيعرف جانب من طريقة تفكيري
, أنا مش بحب حد بعينه .. أنا بتعامل بثقافة الحُب عامةً ومش عايز اكره حد ومش عايز حد يكرهني ومش عايز حد يحس حاجات مش موجودة .. الحُب للحُب فقط
, أنا بخرف كتير
, متعتمدش على عقلك في معالجة تصرفاتي .. just تعالى اسألني واتكلم معايا.
- What's on your mind?
- عرِفت بالصدفة من الفقرة اللي فاتت إني عايز اوصّل رسالة .. لحد أو لحدود .... بس تقريباً فشلت المرة دي .. لأني مش محدد مين الحد ولا عارف اكلمه بوضوح .. لأن هو نفسه غامض .. ده حتى مش راضي يوريني نفسه .. يبقى هعرف إحساسه ازاي؟!
- What's on your mind?
- الرواية اللي بقراها دلوقتي مملة أوي .. مع ذلك انا واثق في الكاتب جداً والكتاب مشهودله بالنجاح الساحق في تغيير وجه مصر .. عشان كدة انا مستني ! هكذا الحياه.
- What's on your mind?
- حاسس اني مش عارف اكتب شِعر .. عندي هاجس إني قلت كل الكلام وعبثت مع كل القوافي .. مجرد هاجس.
- What's on your mind?
- معظم الشواهد بتقول إن رئيس مصر الجاي عسكري .."نقطة"
- What's on your mind?
مش عارف ايه اللي المفروض اكتبه وإيه مكتبوش .. بس المؤكد إني بكتب كل حاجة دلوقتي .. حاسس اني لسة عايز اكتب وفي نفس الوقت حاسس ان الكلام قرب يخلص وإن مفيش حاجة on my mind دلوقتي .. بس انا كان نفسي اكتب في المدونة بقالي كتير .. واديني عملت حاجة حلوة النهاردة اهُه .. سلامات
