نفس الدعوة اللي الناس بيدعوهالي دلوقتي في عيد ميلادي الـ21 , كانوا بيدعوهالي من سنة , في عيد ميلادي الـ20 .. يا ترى دعوتهم اتحققت ؟ ما تيجو نشوف ؟
يونيو 2013
زمر عملي منشن في بوست عبدالوارث وقالي تعالى ورشة تمثيل عشان تتعلم إلقاء , رُحت , وكانت من أحسن أيام السنة وأكثرها نقاء واختلاف , اتعرفت فيها على عبدالوارث وأسامة ومارينا وأمنية وعبدالرحمن غريب وعبالرحمن التاني وناس تانية , ورقصنا على أغنية ( توبة ) لفريق جدل :) .
شاركت في مظاهرات 30 يونيو للمطالبة بإسقاط الرئيس وإجراء انتخابات رئاسية مبكرة , وكانت أيام حلوة برضو , وعلى قد الأمل اللي كنت حاسّه ساعتها , على قد ما خدنا على دماغنا :) .
يوليو 2013
عديت على اعتصام رابعة العدوية مرة وعديت على اعتصام النهضة مرتين تلاتة وفي كل مرة كنت بسب الدين من كتر الغيظ , يللا ربنا يهدي ويرحم اللي ماتوا .
أغسطس 2013
اسماعيل كلمني عشان اشارك معاه بالشعر أو بالإخراج في فيلمه القصير اللي هيدخل بيه مهرجان كبير , بس انا ما التزمتش , معلش يا سمعة <3 .
اسماعيل كلمني يوم 14 أغسطس الساعة 7 الصبح عشان يقولي إن رابعة والنهضة بيتفضوا والميتنج اتلغى .. كملت نوم .
سافرت 3 أيام مع أهلي وكانت أيام حلوة بس مكنش فيه نت عشان اكتب قصيدة ( جواب 1 ) اللي اتحركت جوايا لما لقيت بنداري بيكتب أشعار حلوة فشخ وبكر بعده .
مها كلمتني عشان اذاكر واحضر امتحان الماتريال , محضرتش , سوري يا مها <3 .
سبتمبر 2013
قابلت مارينا , واتمشيت مع زمر .
كنت بتغاظ أوي من الدبابات اللي مالية الشوارع وسبيت الدين كتير أوي في الفترة دي وكنت بنزل في الحظر وامشي وسط الظباط Like a Boss .
أكتوبر 2013
الدراسة بدأت وانا كنت متحمس للدراسة في أول اسبوعين , بس معرفش ايه اللي حصل بعدها ! دانا حتى كنت بكتب محاضرات واخلي اصحابي ينقلوها D: .
المظاهرات بدأت في الجامعة .
عبدالرحمن احمد اتقتل يوم 6 اكتوبر , نفس اليوم اللي السيسي قال فيه : " انتو مش عارفين انكو نور عينينا ولا إيه ؟ "
الثوار نزلوا الشارع تاني بقوة , في وسط البلد وفي محمد محمود وفي مجلس الشورى وفي طلعت حرب وفي ماسبيرو .
يوم ماسبيرو كنت راجع من الجامعة ومكنتش عارف الناس دي واقفة ليه عند ماسبيرو , مكنتش فاكر ان 9 اكتوبر هو ذكرى المذبحة , روحت البيت ونزلت , وقابلت اسامة , وبعد ما الوقفة خلصت في مسيرة صغيرة قررت تطلع التحرير , وقفنا شوية وقالولنا بعد 5 دقايق هنفض , والله ما كملوا دقيقتين ودوّروا فينا الضرب .. وطبعا مش محتاج اقول اني كنت في عبدالمنعم رياض في 12 ثانية ومتسألش ازاي .. يومها الظابط اتغاظ عشان قلت عالعسكري اللي تحتيه ضابط .. :) .
يوم مجلس الشورى نزلنا عشان نرفض مادة المحاكمات العسكرية في الدستور , واتضربنا , واتجمعنا تاني عند قصر النيل ودخلنا طلعت حرب , واتضربنا تاني وتالت ورابع , كان يوم ملحمي .
نوفمبر 2013
طبعت أول نسخة من الديوان ( سباق الزمان وحكايات شومان ) , وفرحت والناس فرحتلي :) .
بدأت الناس تفتكر ان هو ده الشهر .. ( محمد محمود - ملحمة نضال ) , ونزلنا يوم جيكا يوم الفن ميدان واقتحمنا التحرير وكسرنا النصب التذكاري اللي عملوه عشان يستهزأوا بيه علينا , ونزلنا بعدها في اليوم الأصلي وكان يوم حلو برضو بس بتوع السيسي كانوا في الميدان معرفش ليه! ومودي اتقتل في اخر اليوم .. الله يرحمك يا مودي .
يوم الخميس 28 نوفمبر كنت صاحي مقريف , لبست وحطيت في جيبي كمامة الغاز بدون مبرر ولبست اسود في اسود ونزلت من غير شنطة , قابلت يومها احمد البدوي الظُهر وقلتله اني مكتئب وقلبي مش مستريح .. ورحت حورس , قابلت محمد اسامة وكلمت معز , قابلت معز وقلتله ماتيجي نروح نشوف فيه ايه عند الباب ..كان فيه صوت ضرب او حاجة .. وياريتني ماقلتله .. انا حاسس بالذنب .. لما رحنا عند الباب الداخلية كانت بتضرب غاز على الطلاب اللي خرجوا من الجامعة .. مش عارف ايه اللي يخلي الغاز يوصل الكلية ونشمه .. الناس كانت كل شوية تتجمع عند الباب ولما الغاز يزيد تجري , الداخلية وجّبت معانا وحدفتلنا قنبلة جوة الكلية .. ساعتها الطلاب هتفت ضد الداخلية .. وساعتها الداخلية رشت خرطوش عالطلاب اللي متجمعين اللي اتصاب منهم حسين ومعز .. وساعتها احمد يحيى جري عليا وزقني عشان كنت واقف قدام الداخلية بطولي .. وساعتها .... مات محمد رضا وهوّ في وسطنا .
ديسمبر 2013
بدأت المظاهرات والاعتصامات في الجامعة احتجاجاً على مقتل رضا , كنت انضميت لحركة الاشتراكيين الثوريين ( من قبل رضا بأيام ) , وساعتها عشان يكسروا معنى الاعتصام لغوا الدراسة وقالولنا امتحنوا .. وقدروا يحطوا علينا وينسونا الموضوع .
كنت مكتئب , وقررت اسيب الكلية , احول أو اؤجل .. قدرت اقنع امي بالتأجيل .
يناير 2014
التأجيل اتقبل , وتراجعت عن موقفي بعد ما اصحابي زعلوا .
منير ساعدني كتّر خيره ويارب ينجحه ويوفقه , وعديت الامتحانات على خير .
شاركت في مظاهرات 25 يناير 2014 .. اليوم اللي النظام رفع فيه شعار ( يا تحتفل .. يا تتقتل ) .. ولسة محتفظ بالرصاصة في الدرج :) .
زعلت من مارينا وفضلنا منتكلمش اسابيع عشان نزلت وانا قلتلها متنزلش .
بنبسط اما بفتكر ان انا وضياء واسلام محمود كنا في كتف بعض يومها .. يوماً ما هننتصر :) .
كل الناس جالها احباط وأعلنت هزيمة الثورة .
فبراير 2014
النتيجة ظهرت وحشة ومرضيتش اقول لحد عليها .
إحياء ذكرى مذبحة بورسعيد كان من أحلى الأيام .
مارس 2014
السيسي هيترشح .
بدأنا الترم التاني وكنت ناوي اتحمس بس لقيتهم بيعملوا حاجات قديمة اصلا من الحاجات اللي انا كنت قرفان منها .. فكملت على نفس الطريق .
ابريل 2014
مظاهرات الجامعة مستمرة وماوقفتش اسبوع على ما اتذكر , كان الضرب عنيف وكل شوية ناس تتصاب وتموت والكلية عندنا كان بينولها من القتل والإصابة والاعتقالات جانب .
السلطة كانت عايزة تخلص فخلوا الامتحانات تقرب عشان يرتاحوا , وكمان عشان دوشة الجامعة متتقاطعش مع " العرس " الديمقراطي ( اللي بيتشال في الصورة ده طالب علم ) .
تدريجياً تغيبت عن الكلية .
مايو 2014
مارحتش الكلية خالص .
قابلت أمنية .
زعلت من حد عزيز عليّ .
انا ومارينا تُهنا في الزمالك <3 .
يونيو 2014
دخلت الامتحانات ورضيت ماما .. بس كنت بخرج أول واحد معرفش ليه D: .
الامتحانات مش وحشة .. عادية ومش صعبة , وأديني بعمل حاجة بدل الفراغ .
مستني الأجازة .. مفيش في دماغي حاجة واضحة بس مستنيها أوي .
عايز اكمّل كتابة .
ماما احتفلت بيا وظبطتني .. ربنا يخليها .
تمّيت 21 سنة ومش حاسس ان فيه حاجة مهمة فيهم غير اخر 3 - 4 سنين , اللي بدأت شخصيتي تتشكل فيهم :)
ويارب تكون السنة الـ22 ليا على الأرض - لو عِشت - سنة سعيدة - أسعد من اللي قبلها :) .
