- الشِعر الحلو يكون
في مشاعر حلوة سابتها
- وبتلهم يخرب بيتها
وسامحني أنا حبّيتها
- أومال لو كُنت مكاني
- ولا عمري كنت هكون
أصل انتا يا شاعر جاني
بتتَقّل في الموزون
وتجيب في الروح المادّة
وتخلّي الشئ الدون
وانا عمري ما اسكّن شدّة
ولا عُمري اشِد سكون
وتعالى نحلّي القعدة
ونحلّي القعدة تعالى
هنخلّي جمال الوردة
يطرب متاريس الآلة
ونقول للحسبة الواحدة
توجد مجاهيل الدالة
والقافية غريبة وباردة
بس انا عاجباني الحالة
وتعالى تعالى تعالى
تعالالي اللالي اللالي
عايزك وانا عارفك راضي
راح ترسم عني جمالي
عايزك وانا عارفك فاضي
علشان هتشيل أحمالي
وهنبني الحلم أراضي
توصل للنجم العالي
استنى , تعالى قصادي
علشان مش عارف مالي
القافية بتنزل وانا
وانا روحي بتنزل منّي
دانا يابني بقالي سنة
مش عارف أوصف نني
بستنى عشان يلهمني
العنكبوت والجني
أنا ببني بيوتي لتحت
والناس من فوقي بتبني
وانا نازل في البير فحت
ماسيبوش ولا هوّ يسيبني
وأديني حكيت , ارتحت ؟
كان لازم يعني تجيبني ؟
ليست هناك تعليقات:
إرسال تعليق