وآدي أزمة
بعد أزمة
تظهر في
كل الأوقات
شاعر عنده
متلازمة
في اختياره
للكلمات
قالك لأة
هات الشقة
وإملا الشعر
تعب ومشقّة
وإن قال آه
قول الله
وإن معرفتش
زقة فـ زقة
أصل الفولة
في التركيب
ودي معقولة ؟
تبقى لعيب
إن خلّيت : البيت : يجمعنا
وإن خليتُه جمعنا : فـمعنى
معنَى كبير : زي البير
معنَى مسكّر : زي العسكر
العسكر أبو دم خفيف
في العفّة والطيبة عفيف
وإن كان على أعدائنا : مُخيف
ولا يضرب طلقة على مصري
مصر , مصر !
مصر صحيح
إن جَت مَصر
قول النصر ,
يا جبلنا ما يهزّك ريح
يا لمونة جفّيتي عَصر
العصّار شكله مش شايف
وانا لسّاني بغمّض خايف
خايف اسيب للحلم عنان
فيحلّق في الهوا رهوان
أو دبابة 2000 سي سي
تخبطني وبعدين تخدعني
تستقبلني وتودّعني
وافضل اقول والقول يوجعني
إن الحظ شراني وباعني
وإني لما آمنت فزعني
وإني لما بقول بتلخبط
بحبس نفسي في المتاهات
واقعد أبكي وافضل اخبّط
واقعد أشكي لنفسي وأسمع
واقعد ألحن واقعد أوزّع
واقعد افكّر سيكا وأبَدَّع
يمكن أخرج من متاهاتي
واسرح في معاني كلماتي :
انتَ كبير ؟
بس انا أكبر
انتَ أمير ؟
آنا الشعب
يسقط كل
كلاب العسكر
ويسقُط كل
ولاد الكلب
وتعيش كُل
آمال الولد
إنّه يشوف
في بلادُه جَمال
يحيا هوّ
وتحيا البلد
اللي بتحصَل
فيها أمال :))
