إعلان زيجو ميكسات ( صدّق نفسك ) اللي ظهر في رمضان 2014 واستمر في الظهور على القنوات لحد دلوقتي - أكيد كتير منكم لاحظوه - هوّ أكتر من كونه إعلان بطاطس شيبسي , كل إعلانات المنتجات المشابهة بتعدّي من قدام عينينا ومسامعنا من غير ما نعيرها أي انتباه حتى لو باصّين عالشاشة ولو معليين التليفيزيون على آخره , الإعلان ده في رأيي بيجبرك تلتفتلُه وبيشدّك من منطقة انت ماتتوقعهاش من إعلان شيبسي - يأتيك من حيث تترفع أنت أن تتداخل معه على رأي مرسي! - أنا مش ناقد تليفيزيوني ولا موسيقي ولا أدّعي حاجة من الحاجات دي , أنا واحد من الجمهور اللي كل ربع ساعة مفروض عليه يشوف إعلانات مُبتذلة ورخيصة وبذيئة ... جمهور مش بيشوف كتير إعلانات إبداعية بتلمس حاجة في المشاهد - غير إعلانات الشركات الكبيرة زي بيبسي وفودافون وكوكاكولا وموبينيل - , بيكون كل التركيز عالمنتج ومدى حلاوته وإبهاره ومدى أي حاجة هي مش فيه , المرة دي بيشوف إعلان بطاطس مقرمشة بيسمّعه أغنية وبيقولّه فجأة ومن غير سابق إنذار : " متخليش الدنيا تهد الأمل اللي انتَ زرعتُه فـ قلبك " , بأحلى لحن وأحلى توزيع وأحلى أداء .. وبغض النظر عن بعض الكلمات في الأغنية اللي بتبيّن إنه بيكلم بطاطساية , إلا إن غالبية الكلمات بتدور حوالين رسالة الأمل اللي الإعلان بيوصّلها بمعرفته أو غصب عنه ( بعد مزج الكلمات مع الموسيقى الحماسية ) .. أنا كل ما الإعلان يشتغل بفضل مركز معاه ومنبهر بالأداء , وآخر مرّة سمعته جسمي قشعر .. المجد للإعلانات المحترمة:)
***
" متخليش الدنيا تهد الأمل اللي انتَ زرعتُه فـ قلبك
بذرة حلمك بكرة هتطرح إجمع ياللا وصدّق نفسك
إوعى فـ ليلة اليأس يهزك , حس الحلم وهوّ يحسك
قوم اتحرك
غير طعمك
إجري وأحضن
محصول أرضك
إحلم
زيّت
قلبك ميت
نجم السما أقربلك
خلي
ضلوعك
تطلع برا الكيس
هتقابل حلمك
انتَ مزجزج
أيوة مزجزج!
خلّي الدنيا تقابل طعمك
انتَ مزجزج
أيوة مزجزج
إوعى تقرمش يوم من نفسك !
بذرة حلمك
جوة فـ قلبك
أحضن ميكسك
قوم اتحرك
خش بصدرك
غير طعمك ! "
ليست هناك تعليقات:
إرسال تعليق