لقيت كم الاستفزاز اللي جوايا عدّى الخط المسموح فقُلت أكتب .
أصحى الصبح ألاقي البنطلون الاسود المنشور لسة منشفش فانزل بالجينز اللي مبيليقش على أي حاجة !
أدخل المحاضرة متأخر ومفهمش الدُنيا غير في آخرها - رغم اني كنت ناوي اركز واكتب , ركزت - بس مكتبتش .
نظام التعليم عندنا مبيسمحش للمستهتر أو اللي فايته حاجات لأي سبب من الأسباب يكفر عن ذنبه .. بيخشوا في المواضيع من نصها ما شاء الله .. وما شاء الله بردو بيبدأوا قبل ما ميتين الدراسة تبدأ .. طب واللي كان ناوي يبدأ صفحة جديدة ؟ يروح يلعب في ..
المحاضرة الرابعة الحمدلله كانت ثورية فشخ .. لدرجة إن شرارة الثورة طالت عربية في الشارع ودخان الثورة داعب أنوفنا في المدرجات .. الدكتور حظه كان وحش ياعيني وكان نفسه يبدأ وواضح إنه كان نفسه يفرض شخصيته .. بس على مين .. حاسب ياعم الداخلية هنا .. وبدأت قنابل الغاز تتطاير في شارع الجامعة .. وفجأة كل الناس ظهرت وكل الناس خرجت وكل الناس عيّطت .. تفتكروا المشهد كان مؤثر للدرجة دي ؟
نزلنا وقفنا مع الناس وشمينا غاز شوية وشوية والوضع هدي .. بس للحق .. الشوية بتوع الغاز دول خلوني اشوف ناس كان نفسي اشوفهم ممن لم يسعفني حظي على رؤيتهم في البريك <3
ركبت انا والرفاق وتوجهنا لاجتماع ما في مركز ما .. وكنت تعبان فشخ , ونمت في وسط الاجتماع ونورا زعقتلي وخضتني -.- إني أعرف انام تاني !!
رُحنا وسط البلد على دعوة لثوار في طلعت حرب .. بس واضح اننا اتأخرنا شوية .. عُبال ما رُحنا كانت اتفضت من البياعين <3 فين أيام المسيرات اللي كانت بتقعد بالساعة مثلاً !
من جوعي كلت شيبسي وبسكوت كدة وجعولي بطني اكتر وخوني ماكُلش في وقت الأكل الحقيقي على زهرة البُستان .. قعدة القهوة كانت ألطف حاجة في اليوم عموماً .. شربنا ومشينا .. وعلى فكرة يا عادل سجّلت قولك المأثور في العمود على إيدك الشمال .
ركبت مؤسسة .. الراجل وقف في كمين عند الزمالك ورخصه اتسحبت وفضلنا واقفين ربع ساعة وانا فضلت صاحي .. مش فاكر غلبني النوم إمتا .. بس صحيت بعد محطتي بمحطتين الحمدلله !
نزلت متكدر فشخ وبذكائي الخارق مشيت عكس اتجاه أي حاجة .. بعدها بدقايق ربنا هداني وركبت ميكروباص .. وقف بدور أمه قبل الكوبري شوية .. عدّاني الكوبري ونزلت غالبت التعب والزنقة وخبطت عالباب جامد عشان كانوا قافلينه من جوة -.-
خناقات عادية من نوع الفلوس والصياعة وانتا طالب وانتا بتاع .
والجزء الألطف في اليوم لمّا قلتله : يا بابا الكلية كلها شمت غاز
بابا ( بيفحمني ) : وهمّا ينزلوا في المظاهرات ليه ؟
أنا ( مُستَفَزّ ) : لأ يا بابا ده القنبلة اتضربت قدام باب الكلية قدام عيني !
بابا : يعني التليفيزيون بيكدب ؟
ليست هناك تعليقات:
إرسال تعليق