اشرب سُخن :
لساني يلسعني
اشرب ساقع :
زوري يوجعني
كل ما اقرّب
تبعد عنّي
أعمل إيه
أعطش يعني ؟
أكل خفيف :
أخف واطير
بعد شوية
ألِف واجوع !
وابقى سخيف
لو كلت كتير ;
بفضل طول
اليوم موجوع !
أعمل إيه
أشرب لأ
وابقى فـ صحرا
فـ كهف فـ شق
واشرب ليه ؟
آكُل ؟ لأ
طب ودي عيشة
إن جيت
للحق ؟
أزهَد واصبح
صوفي ونبي
والمح أول
طيف أجنبي
واكفُر بالصوف والرهبنة
وأسيب نفسي
وارجع أنا
واشرب كاس
وأحب الناس
واقعد اقول
ضيعت حياتي
في مشاعر فاضية
وإحساس
وتعالوا احكيلكُم حكاياتي
أسرح
واحكي
وافرح
وابكي
وافتكر ان الناس سمعاني
أفتح
عين
ألاقيني
لوحدي
كل الناس
راحوا في ثواني
أشكي لمين ؟
أشكي لربي
لكن مين
هيقولّي أمين ؟
عيني الأولى شايفة الصحرا
يمكِن باقي الشوف بساتين ؟
وافضل باقي
على أشيائي
آنا ونفسي وعيني اليُسرى
والأرض الممدودة لحدّي
ونجوم السما باقي الأُسرة
وافضل ماشي
بنظرة وحيدة
واللي يشوفني
كان يتعوّذ
شكل سعادتي
لسة بعيدة
وساعات يفتكروني .. بغمز !
واعطش
واشرب
كل البير
واكُل
أكلِة
وحش كبير
واسرح
واكتب
شعر كتير
واصرف
كل نواحي وجودي
واقرا فـ كل حكاية كتاب
واسترجع أوصاف الباب
وأقول يمكن ربنا ساب
فيا شئ من عرق جدودي
إقرأ !
حاضر
هقرا الحَق
( الموت صاحب كلمة لأ )
إسمع !
حاضر سامعك قول
( لازم ترضي بالمعقول )
( بص لنفسك وانسى الناس )
( تكسب إيه بعد الإحساس )
( إهرب واسعى وإسعى وإسعى )
( لازم تخفَى فـ كلمة تسعة )
( واحد )
لازم ؟ لأ مش لازم , ليه في كلامك بتقيدني ؟
( اتنين )
طيب إيه المعقول ؟ غير من عقلي وعيني وودني ؟
( تلاتة )
أبُص ونظري النُص ؟ وانسى الناس ليه مالَك إنتَ ؟
( أربعة )
برضو أحس محسش . مالك ؟ عِد لخمسة وستة !
( سبعة )
حاجاتك ضلمة وواسعة
ومشيت قبل العدّة التاسعة
وغلبني بعديها النوم
بعد عجايب سفر اليوم
بعد نوايب سفر السنة
عايز اقرّب نفسي وأنا
بس غريبة بعد خيالي
قُلت إزاي ميجيش على بالي
أشرب قبل الساقع حبّة وبعد السُخن
واكُل بعد الواقع حبّة وقبل التُخن
وبكدة راح تتحل مشاكلي
واعرف اعيش مرتاح وأموت
واقدر انظَّم شُربي وأكلي
وارخي الجِفن وانام مبسوط
ليست هناك تعليقات:
إرسال تعليق