كالعادة .. بعد ما قفلت التدوينة اللي فاتت ونشرتها والناس شافتها , افتكرت اني سقطت حاجات كتير حلوة ومش حلوة حصلت في سنتي الـ21 , أو بمعنى أصح افتكرتهم , الذكريات عاملة زي الأطفال الصغيرة ... بيشبطوا في بعض , لو افتكرت واحدة التانية هتفتكرها ووراها التالتة والرابعة .. الـNostalgia حالة على بعضها لا تقبل التجزئة .. واكتشفت اني اتسحلت أكتر في الأحداث العامة اللي حصلت واللي بالضرورة خدت مكانها في تفكيري وفي حياتي اليومية نفسها .
في نص السنة تقريباً أو في العيد اللي قبل اللي فات قعدنا انا وبنداري عند كيشو يومين تلاتة , وجبنا الدنيا من أولها لآخرها .. انا وبنداري ممكن تلاقينا مش مع بعض كتير أو حتى مش متفاعلين مع بعض بالصورة المتوقعة في وسط الناس , لكن لما بنقعد مع بعض مرة بتكفينا للمرة اللي بعدها اللي ممكن تبقى بعد اسابيع أو شهور .
وفي وسط العام الدراسي اتمشيت مع بنداري وخدنا الحتة اللي قدام البر الغربي رايح جاي .
وفي شهر فبراير نزلت انا وبنداري وحوكا وقضينا يوم تاريخي في جروبي والحسين , اليوم اللي أسراره محدش قدر يوصلّها لحد دلوقتي .
ومن اسابيع رحنا خطوبة تبع نرويجي ورقصنا , وقبلها بأسابيع رحنا خطوبة تبع زكريا ورقصنا واتصورنا واتشقلبنا .
وفي شهر يوليو كان أكبر تجمع لينا في البر الغربي لدرجة اني كنت مشتت فقررت اقعد ساكت لوحدي .
وعن السنة عامةً :
اتعرفت على ناس بطريقة متسرعة واكتشفت غلطي فيما بعد .
دخلت مجتمع وسط البلد وخرجت منه بسرعة .
زهقت من كمية الحاجات الغلط اللي حصلت وغيرت موبايلي قبل 2014 وقررت ارتب علاقاتي وادي رقمي لناس معينة وناس لأ .
بعدت عن كل الناس بلا استثناء يُذكر .
جالي اكتئاب من ساعة ما بابا تعب , بيقل وبيزيد بس مش بيروح .
قربت من مارينا .. البنت الحلوة اللي ممكن تكون شايلة هم الدنيا وبرضو تحسسك ان كل حاجة هتبقى حلوة وجميلة :) .
بقيت غريب عن أقرب الناس , وكل الناس لاحظت .
نجحت نجاحات بسيطة وأثبتت لنفسي اني اقدر اعمل حاجة حقيقية .
مستوايا اتحسن في كتابة الشعر من بعد طبع الديوان الأول .
مستوايا اتحسن في كتابة النثر بس للأسف شيطان النثر مش بييجي كتير .
قررت أكتب اللي انا شفته واللي انا حسيته تجاه الثورة والأحداث في مصر في اخر 3 سنين .. قررت القرار ده في ديسمبر 2013 .. لما الأمور اتعقدت كان لازم الناس تعرف التراكمات في الأحداث والشخصية .. عشان محدش بعد كدة يسألني بكل سذاجة .. انتو بتعملوا كدة ليه أو انتو عايزين ايه ؟
كنت فاكر اني هكتب التجربة في جزء .. وانا بكتب تعبت وقلت هكمل بكرة .. بس الجزء التاني مكفاش .. والتالت مكفاش .. وهكذا اتسحلت مع الثورة , وهفضل مسحول لحد ما اخلص الشهادة الكاملة بإذن الله .. أقدر أقول إن المذكرات والديوان والحاجات التانية اللي شغال فيها هي أكتر حاجات ممكن اذكرها إذا سألوني عن حاجة حلوة عملتها وفخور بيها في السنة دي .
رغم اني بعدت عن الشلة الأم اللي انا بنتمي ليها في الكلية .. الا انهم واحشنّي جداً .
بقيت بسكت كتير اوي .. اكتر من الأول , وخصوصاً في الفترة الأخيرة ... وحش احساس ان مفيش حاجة حلوة عندك أو حاجة لطيفة تقولها .. وحش أوي .
مستوايا الدراسي وصل القاع بسلام .
اجتماعياً محتاج دكتور نفسي .
يبقى في النهاية الناس الحلوة اللي انا عرفتها أو قربت منها وفخور اني عرفتها ودايماً بكنلهم الحُب وبنبسط لما بشوفهم .. فرح وعبدالرحمن أسامة ومها وعزت وصاوي وصابر ومحمد مصطفى ومروان ووسام وإلهامي وأمنية وعبدالرحمن أرآي وحماد ورشدي ومحمد ياسر ومؤمن وزكريا وبدوي وحسام وأسامة ومحمد أسامة وعمر صابر وكيشو ومصطفى أحمد وأحمد بدر وعادل سماقية وأسامة سلام ومريم عوف وندا وأسماء وساندرا ورضوى ذكي وهايدي .
آه , نسيت .. أنا بحب ليلى .. اللي معرفش اسمها :) .. ادعولي اني اشوفها تاني بقى ;) .
ليست هناك تعليقات:
إرسال تعليق