رسالة في محاولة الإفلات

ازيك؟ عاملة ايه؟ بقالي كتير مكلمتكيش ايوة، بس ده لا يعني اني مش عايز. لاحظت حاجة بس وكان نفسي اسأل سؤال صغير. انتي ايه اللي عجبك في اخر حاجة كتبتها؟ مش بسأل عشان افتح حوار اكون فيه الفنان الملهم وانتي المشجعة. انا بسأل باستنكار لإنه مش عاجبني اصلا، وكونك شفتيه فده يقلق، وكونه عجبك فده يلخبط. كإني كنت لابس اوحش لبس عندي وانتي قلتيلي ايه الشياكة دي. بس انا على طول لابس اوحش لبس عندي، لإن مفيش غيره اصلا. وفي الكتابة برضو مفيش غيره. وفي كل حاجة مفيش غيره. حاسس بإفلاس، لا لو الناس تجاهلتني يعجبني ولا لو اهتمت يعجبني، إن تحمل عليه يلهث أو تتركه يلهث ومفيش حاجة بالتحديد هترضيني غير الصدف الحلوة بما فيها لما مزاجي يروق أو لما اكتب حلو أو لما احب بجد. انا مش سعيد باللي بيحصل بس ده مش معناه ان الحياة وقفت. الحياة مش المفروض تقف عند الحاجات الوحشة. لإن تقريبا كل الحاجات طلعت وحشة والحلو هو الاستثناء واحنا اللي مكناش فاهمين. بس هنفهم امتى؟ الإنسان اللي بنحارب عشانه عشان هو أهلنا هو نفس الإنسان اللي طالع عين أمه في سجون في بلاد مانعرفش ننطق أساميها. ولو ركزنا هنطلع عنصريين في مبادئنا. لو مش هنكمل حياتنا عشان اخواتنا في الدم ومبدأنا سليم يبقى المفروض مانكملش عشان اخواتنا في السلالة. بس ده مش هيحصل وكله هيكمل بخيره الصغير وشره الكتير لحكمة ما. على فكرة ممكن لو لخبطنا الأماكن نطلع احنا أشرار وولاد ستين وسخة كمان، مين عارف؟ ماحنا امبارح كنا بنحب ودلوقتي بنكره، ايه اللي في قلوبنا ماينفعش يتغير؟ انا باكلمك عشان انا حاسس اني المفروض اكون وحش في عينك لإن انا وحش في عيني، ولو المعادلة دي اتكسرت هاضطر اعيد بناء التصور من الأول وانا مافياش حيل ابني صور. اديكي شفتي ازاي خيالي كان فقير من يومين، واضح اني صرفت كل اللي كان متبقي الأيام دي في الكام تدوينة اللي كنت بحاول افهم منها ازاي كل الناس دي وحيدة. يلا مش هعطلك. أشوفك بخير. أنا حتى مش واثق في نص الكلام اللي كتبته هنا، بس مش عاوز ارجعله ولا ارجع في رأيي ومابعتش، اديني عالاقل بحاول اوصل لأقرب حاجة شبهي، بس مش عارف ليه كل مافتكر اني قربت للنهاية اكتشف اني لسة محتاج ابدأ من الأول. من شوية كنت بفكر ان أول قصيدة كتبتها في أول ديوان ليا كانت هي الغلطة اللي أدت لكل التراكمات دي وإني محتاج اعيد تأسيس عالمي من البداية عشان مشاهده ماتتنافرش مع العدسات اللي على عيني. وكان على عيني اكون احسن من كدة، بس يمكن ابقى.. يمكن.