"وإذا كُنت لوحدي دلوقتي"
بكرة برضو هبقا لوحدي !
حتماً هيكون جنبي خاين
حتماً هيدوّر عالسلطة
ويشوف المشهد - مش باين
أنا عِشت ومُت .. في مسيرة
كان جنبي بيصرخ وبيهتف
كان شايل كفني على اديه
وببص لقيته بيتكلم
ولا ليه نبرة ولا وتيرة
ويقول اصبر ومتهتفش
ويقول للظالم معلش
ويقول عني اني صايع
ويقول عالبنت ملبستش
مين يا وطني كان الطامع ؟
مين باع الثورة والسيرة ؟
طب شال الدم اللي اتطرطش
في الضرب ساعتها وجه عليه ؟
طب باعه وتركني ليه ؟
مكشوف العورة والجسم
قدامه بتجرجر عالقسم
وأموت واتعذب واتهان
ليه دايماً في أي بطولة
لرواية في واحد خان ؟
بكرة برضو هبقا لوحدي
لكنّي بتعلم دايما
لا يُلدغ مؤمن غير مرة
والمرة التانية دي بتاعتي
والشعب بيتعلم ثورة
وأديه اتعلّم واتنوّر
وأديه بكرة راح يتخرج
زي ما قال الباطل لجلج
وعرفنا الإخوان والعسكر
والباقي مسيرنا نعرفها
المجد لكل الشهداء
المجد لكل من ضحى
المجد لكل من صحى
الشعب على صوت الدم
بكرة تاني راح نتلم
وإذا كنت لوحدي دلوقتي
بكرة هنتجمع ملايين
وهيُسقط كل الجبناء
من باعوا الدم .. والدين
..
ليست هناك تعليقات:
إرسال تعليق