احنا في اسوأ فترة من التاريخ .. رغم اني مش عارف حاجة في التاريخ أصلا .. مش عارف غير شذرات اللي كنا بندرسه في المدارس وبعض من معلومات الكُتُب وقصص الأنبياء بالإضافة لتاريخ الثورة منذ يناير اللي انا بكتبه .. ده احساسي دلوقتي .. الشعب اللي أخلاقه اختلفت .. واللي بيتخانقوا مع بعض في المترو كل يوم الصبح عشان حد لمسهم لمسة غلط .. والنور اللي الدولة مش عارفة توفره للشعب .. وياريتها جَت عالنور بس .. ده كل حاجة .. بس هنقول كل واحد رضي بنصيبه .. الكام سنة اللي هيتحط على دماغنا فيهم الخرا وهنسكُت أو هنتقتل .. نهضة مصر اللي مش عايزة تيجي ومش هتيجي طول ماحنا كدة .
مبحبش اندمج .. الاندماج مقرف .. والاندماج بيخليك تغلط .. والاندماج بيعوّد الناس عليك .. مرة بإنهم يتعودوا عليك فتقِل قيمتك مادمت موجود طول الوقت وماتفرقش في شئ .. ومرة بإنهم أصلاً ساعات بيتعدّوا المقبول بتاعك .
أيوة قربت اقتنع ان البلد ميئوس منها وإن الواحد لازم يبدأ يركز مع نفسه ويغض البصر عن كل شئ سوى مصلحته .. حياة اللامبالاة حياة لو تعلمون عظيمة .. تتخرج من الكلية وانتا مش فاهم .. تشتغل اي حاجة بالبركة وبالحب .. والناس بتساع بعضيها .. اطلع مهندس وربنا يسهل والرزق بتاع ربنا .. طب انا مش حابب ومش هعمل ؟ خد شهادة واطلع اي حاجة .... مش مهم بقى الأي حاجة دي تكون ايه ولا هتشتغل فيه بحب وضمير ولا لأ .. عيش وخلاص زي ما اللي قبلك عاشوا .. خد فلوس وموت .. خليك عادي زينا ومتشذش عن الطريق اللي اترسملك .
نفسي اغمض عيني وافتحها ملاقيش حاجة او حد من اللي حواليا دلوقتي .. اي حتة و اي ناس واي اختلاف .. وعموماً هيحصل قريب .. على وضعُكُم بقى لحد ما اختفي من كتر اللي بشوفُه .
ليست هناك تعليقات:
إرسال تعليق