طب افرض ان انا فعلاً غلطان في القرار .. هعرف ازاي اني غلطان غير لما اجرب ؟ افرض انا مش مبسوط دلوقتي في هندسة .. هعرف ازاي اذا كنت هنبسط في سياسة ولا هكون مش مبسوط اكتر ؟ ليه امنع نفسي من حاجة ممكن يكون فيها الخير لمجرد الخوف من المجازفة .. المجازفة بإيه ؟ بكلية الهندسة بجلالة قدرها ؟ مبحبهاش .. هل مش ممكن ارجع ندمان وحزين - وده مش هيحصل - لو رُحت سياسة ومعجبنيش الوضع ؟ لأ ممكن .. مش الدُنيا مفتوحة ولا احنا محبوسين ؟ مفتوحة .. طب واللي يقولك هتفضل تضيع في السنين ؟ قول له إن طريق النجاح صعب والوصول أصعب , وليه مكُنش ماشي في الطريق الغلط من الأول وأصحح ؟ وبعدين يعني ايه تضييع السنين ؟ الجملة دي بقف عندها كتير ومش بفهمها .. هل أنا عارف انا هعيش 20 سنة ولا 100 عشان اخاف ؟ معروف ان الواحد بيبقى في جيبه فلوس معينة وبيخاف يصرف عشان هتخلص مع الوقت .. ولو كان عمّال يصرف وميعرفش اللي في جيبه هيخاف ؟ أعتقد لأ .. الفرق الوحيد في المثل هنا إن اللي بيصرف من فلوس ميعرفهاش هيكتشف انها خلصت وهيجوع .. انما اللي بيصرف في سنين ميعرفهاش هيخلص معاها وهتنتهي عند كدة كل الأحلام والأماني .. .. يعني إحساس اني ضيعت عمري ده هيجيلي إمتا وازاي بعد إدراك حقيقتُه اللي مفيش بعدها حاجة أصلاً ؟ فالخوف من إيه ؟ يعني تضيع عُمرك ؟ أنا مستعد أضيع عمري في المعرفة والفهم والمحاولة والتجربة .. مش في الطريق اللي اختاره أهلي بناءاً على تجارب ذوويهم وهيستيريا المجتمع لتعظيم المهندسين والدكاترة وإجبار أي طالب متفوق انه ميضيعش الـ100% اللي جابهم بالحفظ وطلوع الروح .. ممكن تقولوا انتَ مش واثق في قرارك من البداية وهترجع تقول الحقوني وخدوني من هنا .. هقول ان انا بقول كدة بالفعل في مكاني الأول .. إذاً مادُمت كدة كدة متكدر .. ليه مجربش يمكن متكدرش ؟ .. ممكن تقولوا حد يسيب هندسة وشغل المهندسين ويدخل سياسة اللي مش لاقيين ياكلوا .. هقول لكُم ان انا كمان مش هلاقي اكُل عشان انا متعلمتش هنا حاجة ولا هتعلم حاجة .. وبعدين مش انتُم اللي بتقولوا الرزق على الله ؟ الرزق على الله .. ممكن تقولوا خلّص السنتين اللي هيعدوا بالطول أو بالعرض وخش اللي انتَ عايزه .. هقول لكُم مين قال اني هنجح في السنتين وهعمل مشروع تخرج ؟ إذا كنت مش حابب المواد هتعلمها وادوس فيها في تانية وتالتة ورابعة وانجح ازاي ؟ شوفوا درجاتي على مدار السنة ونص في عمارة في الديزاين .. أو في كل حاجة حتى .. وانتو تعرفوا ان مفيش أمل .. وبعدين حتى لو فرضنا واني هاجي على نفسي وانجح .. هخش سياسة ليه لو ليا النجاح في هندسة وهكره الشغل ليه لو مكرهتش الدراسة ؟ لما انا ولا بعرف حاجة في الاساسات والبناء ولا في المواد ولا في الخرسانة ولا في التصميم المعماري .. هطلع اشتغل ايه .. سبّاك ؟ .. كل الناس عارفة انا قد ايه عانيت في القسم ده .. وقد ايه كنت بعافر وبنجح وبعدي بالعافية .. واديني وقعت اهه .. طب هفضل كدة لإمتا ؟ هفضل لإمتا اطلب من زمايلي يعملولي تصميمات أو يخلوني انقل شيتات أو لوح بلدينج أو يكتبولي ملخصات احفظها وادبها في الامتحان من غير فهم ؟ وياريت في كل ده بفلح .. ممكن اكون حبّيت فكرة " العمارة " .. أيوة .. انا فعلاً بحب الجمال والفن .. بس مكنتش اعرف ساعتها اني هتعمق في العالم المادي ده أوي كدة .. اومال انا خرجت من مدني ليه في الأساس ؟ عشان ده ..ومش ده العمر اللي عاوز افنيه .. كفاية .. خدوني من هنا .
ليست هناك تعليقات:
إرسال تعليق