إحتياجي للكتابة
وإندماجي في الكآبة
والتجلي , والعجابة
والشعور المُختزِن
والقمر فوق السما
والبصيرة , والعما
والتلاهي , إنما
كل هذا لا يَزِن !
والكلام المُستطاب
وانتباهي في الخطاب
كله راح يصير تُراب
كله زايل .. هل تَرى ؟!
والصور , والمأثورات
والدماء تحت الفُرات
كله محض الإنفراط
كلُّ ذا .. لا يُشتَرَى !
والقهاوي , واللمون
والصوابع , والدقون
والحوادث لو تكون
نفس سرعة الانتباه
والصُحاب قبل الفُراق
والجنون والاشتياق
والفرح والاستراق
والظنون والإشتباه
والخُلاصة في الكلام
والوجود والإنعدام
والجروح والإلتئام
والتأمل .. والشرود
والسطور مهما إتكَتَب
والقوافي والأدب
والنحافة والأتب
واللي دايب في الجمود
واللي راح وجِه في غفلة
واللي نايم وسط حفلة
والقصيدة عايزة قفلة !
شوفلي بيت جامع وغاني !
واللي صار .. واللي كان
واللي حب الإرتكان
واللي سارح في المكان ,
إنتهِت كُل المعاني !
ليست هناك تعليقات:
إرسال تعليق