اعذروا الناس .. متتسرعوش في الحكم عليهم واتخاذهم اعداء .. الناس اللي هينتخبوا السيسي بكرة هما أهالينا اللي بيتفرجوا على التليفيزيون من ساعة ما يصحوا لحد ما يناموا .. الناس دي ممكن تكون بتحب البلد زيك بالظبط وشايفة ان اللي بتعمله ده صح وهي الناس اللي بتفرح لما تسمع اغنية وطنية في التليفيزيون وهي الناس اللي بتقول تحيا مصر عشان فاكرة ان هي دي الطريقة اللي مصر هتحيا بيها .. الناس دي ملقتش الطريقة التانية .. كل اللي قدامها بيقول ان السيسي هو اللي هيجيب الأمن والاستقرار وان هو اللي هيبني مصر وبيحمسهم بشعارات ( بالعمل تحيا الشعوب ) وبيقول كل حاجة ممكن تكون كدب وزيف لكن هما بيصدقوها عشان هما نفسهم يصدقوا ان البلد اخيراً هتبقى كويسة .. اعذروا الناس اللي عاشوا في ظلام الجهل والجوع والخوف .. متعاديش الناس العادية البسيطة اللي ممكن ترقص من الفرحة في اللجان عشان فاكرة انها كدة بتحتفل بانتصار الوطن .. تسامح إلى أقصى حد ممكن .. اللي قتلك هو اللي قتلك مش اللي انتخبه .. اللي انتخبه راح ومكانش عارف انه هيقتل .. اللي قتلك قالّه انه هيجيب أمن واستقرار وهيبني البلد مقالوش انا هقتل شباب وهسجن بنات .. مش كل اللي رايح ينتخب السيسي بكرة عارف انه سفاح .. لسة أهالينا ولسة الناس في الشارع بتسألنا انتم معترضين على ايه وبتسألنا ايه اللي حصل في رابعة وبتقولنا الدنيا حلوة واحنا مش شايفين غير ان الخير جاي على ايد المشير والاعلام مش بيقولنا غير ان الاخوان هما اللي عايزين يخربوا البلد وهما اللي ملهمش دين وهما اللي بيحلوا دم الناس وان كل حركة معارضة في الشارع تبقى اخوان .. ابوك ممكن يكون عارف انه رايح ينتخب ديكتاتور وممكن يكون عايز يشوف الاخوان والثوار كلهم ميتين .. امك لأ .. اعرف انك كل الحاجات اللي عرفتها عن نظام السفاح عرفتها من قعدتك على النت ونزولك مع المظاهرات في الشارع .. هما مش بيتقاطعوا معانا في المناطق دي والإعلام بيعرف يملا فراغ المعرفة عندهم باللي النظام عايز يوصلهلهم .. بإن الراجل اللي عزل مرسي ده راجل شجاع ولازم يحكم , وبإن الشعب لازم ينزل يرفع صوره ويطالبه باستلام الحكم .. كل حاجة النظام بيحركها والناس دي مش عارفة انها ادوات .. الإعلام بيفهمهم انه قرار الشعب وبيملا دماغهم وبيقولهم انه قرار الشعب كل يوم لدرجة انهم صدقوا .. وصدقوا انهم هما اللي هيقفوا جنب السيسي بكرة وهيردولوا الجميل .. الثورة ثورة على السلطوية والإعلام الفاسد اللي من غير ما نسقطه مش هنتقدم خطوة .. ثورة على الجهل اللي بيحرك الناس بعقل النظام .
" الطريقة الوحيدة لتفادي الخطأ هي الجهل . " - جان جاك روسو
" المعرفة تبني ببطء ما يهدمه الجهل في ساعة واحدة . " - جورج إليوت
" جهل ناخب واحد في النظام الديمقراطي يضر بأمن المجتمع كله . " - جون كنيدي
" العلم يرفع بيتاً لا عماد له .. والجهل يهدم بيت العز والشرف " - أحمد شوقي
" ليس من شئ في العالم كله أخطر من الجهل الصادق والغباء حي الضمير . " - مارتن لوثر كنج
عبدالرحمن الكواكبي المفكر السوري كتب كتاب اسمه ( طبائع الاستبداد ومصارع الاستعباد ) وصف فيه معاني الاستبداد وعلاقاته بأشياء مختلفة في المجتمع والفكر , من ضمن فصول الكتاب فصل اسمه ( الاستبداد والعلم ) .. بيبيّن فيه ازاي العلم والمعرفة بيهددوا نظام المستبد , وإزاي الجهل بيخليه في مأمن من إدراك الناس لحقيقته .. من الحاجات اللي قالها :
" من أقبح أنواع الاستبداد استبداد الجهل على العلم، واستبداد النفس على العقل . "
" لو كان المستبد طيرا لكان خفاشا يصطاد الهوام في ظلام الجهل، ولو كان وحشا لكان ابن آوى يتلقف دواجن الحضر في غشاء الليل . "
" إن خوف المستبد من نقمة رعيته أكثر من خوفهم بأسه، لأن خوفه ينشأ عن علمه بما يستحقه منهم وخوفهم ناشئ عن جهل، وخوفه عن عجز حقيقي فيه وخوفهم عن توهم التخاذل فقط . "
" لا يخفى على المستبد مهما كان غبيا أن لا استعباد ولا اعتساف إلا مادامت الرعية حمقاء تخبط في ظلامة جهل وتيه عماء "
...
الثورة اللي عايزة تقضي عالإستبداد لازم تقضي في سبيل ده عالجهل , لازم تنشر المعرفة والوعي وتصحّي الشعوب النايمة , مفيش ثورة هتقوم بدون الشعب , أعدائنا هما اللي ماسكين الأسلحة وبيضربونا في الشوارع مش هما اللي بيختاروا عشان فاكرين ان مفيش غير كدة .. دورنا في المرحلة السودا اللي هتبدأ بكرة اننا نؤمن بالثورة ونعرف ان الطريق مش سهل .. احنا اللي هنبني مصر من تحت واحنا اللي هنكبر بعد عشرين سنة وهنبقى رؤساء ووزراء .. الثورة مش بس ضرب طوب في الاشتباكات ومش بس كلام عن المعتقلين والقتلى .. الثورة ثورة تقدم وكفاح .. الشهداء ماتوا عشان كانوا عايزين يشوفوا مصر أحلى .. إحنا اللي هنجيب حق الشهداء واحنا اللي هنحقق حلمهم .. المجد للشهداء .. والثورة مستمرة .
ليست هناك تعليقات:
إرسال تعليق