- يا شومان بتدور
في القيل والقال
وتغيب وتثور
ولا عاجبك حد
ودماغك طار
وحش وبقّال
وقبل الأسئلة
بتجيب الرَد
بالراحة ياعم
البيه المارشال
اقعد واتلم
وقولّي بجَد
الجيم جيت جَري
جعان , والدال
دي دموع بتشُق
طريق عالخَد
أنا جيت : ولا بيت .. شافني وماتخَضْ !
وجريت : ما لقيت .. شعراء مجانين !
وجَثيت : لكِن .. ما شالتني الأرض !
وجاوبت : انا هاجي .. واروح على مين ؟
عفريت بيقول
في الشِعر خيال
وجاي منقول
من بَعد اميال
انا هاسحبلَك
مـ الشمس حِبال
ونرجّع زمن
الهمس العالِ
نصحى فـ وديان
وننام في جبال
هِند وألبان
وندعي عُبال
ما يظهر تانِ
مكتمل اللمعة
ماتقوموا يا عيال
هنصلي الجُمعة
- وانا تعبان
- قوم ولّع شمعة
- وانا أعمى
- قوم شيل الدَمعة
ورّي الناس لو كَت مش شايفة
قول للناس لو كَت مش سامعة
وإرمي إشارة في كل طريق
فكّر سيكا وخُد إبريق
واكتب كلمة وخُدلَك بُق
واكتب حكمة واقرا كتاب
استنى نشوف مين عالباب
وإدعي يكون حظّك بيدُق
ليست هناك تعليقات:
إرسال تعليق