أسرح وأسمر
من شمس تعبي
وأكتب وأسهر
مع نِجم صاحبي
واحكي وأشكي
وابكي وابربر
تعبيري خانّي
لكن بعبّر
- يا عم ياللي
ساكن تملّي
في ده المحل
إيديني حل
واحكيلي نكتة
اسم الكريم؟
- معرفش حتى
اسمي القديم
البحر جابني
واختارلي مَرسَى
شاعر كتبني
على ورقة مَلسا
وسامحني يابني
إن كُنت بنسى
أنا كُنت هابني
والحظ صابني
والموج خطبني
لجنّية وارثة
وارثة البحور
وعليها سور
وجمالها نور
وعينيها كارثة
النور عماني
فَتُهت أكتر
والقوس رماني
بِسهم أحمر
وبقيت أغاني
على ورقا ملسا
والبحر أملس
والحُب وَسوَس
خلاني أبلس
ضمن الأبالسة
وانا كُنت أمشي
وسط البلاد
زي الأمير
بين العِباد
والكُل يابني
وليه معاد
وبقيت عجوز
بمشي بعُكاز
وانا كنت لما
أقعد لحالي
يحلّو حظّك
لو حظي جالي
واخطُب في آلي
وانظُم لآلي
زي الأمالي
واجمل - مجاز
والجو ليلاً
يحتاج سيجارة
وبحب ليلى
وآخر عبارة :
خليك شرارة اوعى تحرق بجاز
أو تحدف حجارة
وبيتك
إزاز !
ليست هناك تعليقات:
إرسال تعليق