الإسفاف

صباح الخير , إيه كمية الإسفاف اللي ضربت حوالينا من كل ناحية دي ؟

حد يعرف ايه علاقة رمضان بالمقالب ؟ والنبي اللي يعرف يقولّي بسرعة .. الأول كنا بنشوف في رمضان المسلسلات والبرامج الدينية وكدة والحاجات دي بدأت تكتر بعد كدة ظهرت حاجة اسمها برامج الفوازير قلنا ماشي برضو مفيش مانع , لكن ايه كمية البرامج البضينة اللي ملهاش ستين لازمة اللي بتتعرض عالشاشات ؟

أنا بحمد ربنا اني لما ربنا يسألني عن عمري فيما أفنيته , مش هقوله أفنيت عمري في مضايقة خلق الله ممثلين ومشاهدين , رامز بيقول إشهد يا تاريخ وهو عارف ان التاريخ مش هيشهدله ومش هيذكره بالخير , اللهم إلا مشاركته في الأفلام الحلوة اللي قدمها - اللي هي سمعته اللي بيبوظها وموهبته اللي بيضيعها دلوقتي - , إيه معنى اني كل يوم اشوف ناس بتصوت ؟ إيه المتعة ؟ والله ما مضحكة خالص يعني , مين المنتج ولّا المخرج ابن المرة اللي اقنعه انه كدة ناجح ولازم يستمر ؟ اللي ممكن يغيظ أكتر هو ان الناس بتتفرج برضو , بيكسلوا يحولوا القناة تقريباً , عامةً المفروض يعني إن الظواهر الغبية دي بتظهر في المجتمع شوية والمجتمع بيلفظها وبتختفي , وانا آمُل ذلك , بس انا مش شايف إن المجتمع بيلفظ حاجة , الناس بتستنى تشوف واحدة بتعمل بيبي على نفسها من الخوف وهي هتغرق في البحر , ومستنية تشوف واحد مهزق بيتضرب ويتهزق وبيطلع ميتينه كل حلقة , ومستنية تشوف ناس بتستهزأ بناس وتستخف بيهم وفي الآخر تقولهم بكل سماجة وبرود احنا كنا بنهزر معاك وكنا بنضحك الناس عليك هيهيهي نزيع ؟ وفي الآخر بعد ما اتعاطفت مع الفنان اللي اتهزق أو اللي اتضرب ده تلاقيه في الآخر بيضحك ومنشكح اوي , أو بيحكيلنا قد ايه التجربة كانت ممتعة آخر حاجة وقد ايه هو قضى وقت لطيف مع الفنان التاني اللي كان من شوية بيسبله ميت دين وبيهدده انه هيسلط عليه ناس يضربوه وانه كان يوم وسخ يوم ما عرفه .

إفنو عمركُم في تفاهتكم وابذلوا كل اللي تقدروا عليه في سبيل انكم تعملوا المقلب صح وتخلوا المفاجأة أكبر , مش هنضحك , ولا التاريخ هيذكركم بحاجة , ولا الناس هتفتكركم , هما بس هيفتكروا ان في وقت معين من عمر الزمن ظهرت ناس سخيفة بتستخف بالضيوف وبتستخف بالجمهور نفسه , الإسفاف مينفعش يكبر ويظهر وينتشر في وسط مجتمع واعي عارف يعني ايه فن ويعني ايه ابداع ويعني ايه فقر ابداع وسُخف وتقليد وابتذال , مع الوقت الناس هتحس بالفروق , ومع الوقت المنتجين مش هيلاقوا جماهير تافهة تتفرج على منتجهم الفاسد , ومع الوقت الحاجات دي هتختفي , الطبقة الهشة دي من الفنانين والإعلاميين اللي بيستخفوا بالجماهير وبيقدمولهم محتوى فقير ومبتذل وسخيف , الطبقة دي هتختفي , وهتظهر بدالها طبقة تقدّر الجمال أكتر , والمجتمع بدوره ينقدها , وتظهر بدالها طبقة واعية أكتر بتحاول تحاكي وعي الجماهير ورؤيتهم وحاجتهم للفن , وهكذا , الانحدار اللي احنا فيه مش هيستمر , احنا وصلنا أو قربنا نوصل للقاع , والناس هتفوق وكل اللي بينتجوا الحاجات دي هيتضربوا في مقتل وهيفلسوا لما الناس متعبرهمش , وهيطلع غيرهم الناس الموهوبة فعلاً اللي بتمارس الفنون لتميزهم فيها مش لأي اعتبارات تانية , اللي بيكتبوا عشان بيحبوا يكتبوا , واللي بيمثلوا عشان بيحبوا يمثلوا , واللي بيغنّوا عشان بيحبوا يغنوا , وفي المقابل هيكون الناس اللي بتقرا عشان بتحب المكتوب مش عشان الكاتب معروف , واللي بتتابع عشان الممثل موهوب مش مشهور ولا اسطمبة واحدة مملة , واللي بتسمع عشان الأغنية جميلة مش عشان المغني النجم بينزل كل سنة ألبوم إجباري يتسمع , لازم احنا نساعد في زق الحركة دي لقدام , اللي عنده حاجة يقدمها وميتأخرش , الحلو لما يتحط جنب الوحش هيبان الفرق كويس اوي , ولازم على قد ما نقدر ننقد ونبين للناس انه مش ده الفن , ومش ده الضحك , ومش ده التمثيل , ومش دي الصحافة , ومش ده الإعلام , ومش دي السياسة , ثورتنا لازم توفر بدايل للفساد المستشري في كل حاجة , حتى في الحاجات اللي مبتتمسكش بالإيد , في الإحساس , فساد الوعي اللي بيترتب عليه ظُلم الناس اللي ليها حق , حق مكتسب من القدرة والتميز , واللي بيترتب عليه ظهور الناس اللي ملهاش حق , بالشهرة أو باستغلال فساد موجود , زي نموذج البلطجي كل موسم سينما , ونموذج النسوانجي كل موسم رمضان , اللي بقوله في كل مرة وفي كل حتة هقوله هنا , طول مانتَ ماقدمتش بديل مقنع يبقى انتَ ماتملكش سبب كافي تقول بيه لحد سيبك من اللي قدامك ده وبص للبديل ده , طول ما الثورة ناقصة التنظيم والوعي والأساس القوي محدش يستنى ان الثورة تحكم .