هتتعدّل ؟
ورب الكعبة بتمنى
هتتبدل ؟
وعايش عمري بستنى
هتستنى ؟
مجبش نتيجة مـ الأول
وهتكمل ؟
بقدرة ربّي هتحمل
هتتعافى ؟
عشان اليأس مش مخرج
هتتصافى ؟
ما عشنا العمر بنهرّج
وهتشارك ؟
وهبعد حبّة ولذلك
على الآفة ؟
هبص شوية واتفرج
هتتشطر ؟
بإيد المولى مش إيدي
هتتنطور ؟
هتقلب ليه تراجيدي
هتلحقها ؟
وجايز جداً اسبقها
هتتحجّر ؟
حسب ما يقولّي تجديدي
هتتكلم ؟
هكلم نفسي - يكفيني
هتتعلم ؟
دي غاية دنيتي وديني
هتتأنى ؟
بمثل الصبر عالجنة
وهتسلّم ؟
مسلّم أمري من حيني
وهتلاقي ؟
هلاقي السر في ذاتي
وأشواقي ؟
هتطفّي نارها كلماتي
وهتعافر ؟
في رحلة عمري ومسافر
وللساقي ؟
ليهدي العائد الآتي
هتتعدل ؟
ما قلنا أيوة مش سيرة
هتتأمل ؟
أموري تدعو للحيرة
هتتسائل ؟
ورد سؤالي في كتابه
هتتجمل ؟
جمال الحُب والخيرة
هتتوقف ؟
يقرب عمري للتوقيف
هتتلأف ؟
ما بين ربيعين تلاقي خريف
هتتكامل ؟
بأمر الواحد الكامل
وهتسقف ؟
مفيش ما يدعو للتسقيف
وإيه أصلك ؟
عرب مغلوب على أمري
وإيه أمرك ؟
أواجه محنتي وقدري
وهتواجه ؟
بدل ما اموت وانا تافه
وإيه جبرك ؟
هيسألني على عمري
وأفنيته ؟
في عقدين يكملوا فـ ستة
ولبّيته ؟
ومش عارف هموت امتا
وافرض مُت ؟
هيبقا ولا كأني كُنت
ومن بيته ..
تلف جنازتي في الحتة .
ليست هناك تعليقات:
إرسال تعليق